Josué 11 - Bible in Tzeltal Bachajón

Sjinel Jabín soc mach'atic schapoj sbahic soc

¹ C'alal hich la ya'iy te Jabín ajwalil yu'un Hazor la sticonlambe ta halbeyel te Jobab ajwalil yu'un Madón, soc te ajwaliletic yu'un Simrón, Acsaf,

² soc te ajwaliletic te ayic ta witsiltic ta norte, ta Arabá te ay ta stojol sur yu'un Mar Cineret, ta spamlejetic soc ta q'uinal ay ta Dor ta stojol smahlib c'ahc'al,

³ te cananeohetic te ayic ta stojol banti ya xloc' tal c'ahc'al soc ta stojol smahlib c'ahc'al, te amorreo, heteo, ferezeo, soc jebuseohetic te ayic ta witsiltic, soc te heveohetic ta ye'tal wits Hermón ta sq'uinal Mizpa.

⁴ Hich loq'uic tal soc spisil te soldadohetic yu'unic, mero bayelic, hich te bin ut'il shi'al mar, soc c'ax bayel cawuhetic soc carretahetic yu'un guerra.

⁵ Spisil te ajwaliletic la stsob sbahic, junax tal spas scampamentohic ta nopol te ha'etic yu'un Merom yu'un ya ya'beyic guerra te Israel.

⁶ Pero te Jehová la yalbe te Josué: Ma me xaxi', como ta hichilan ora pajel spisilic lajemic a ya cac'ticlan ta stojol Israel; yac abojbe schihal yacan scawuhic soc yac achic'be te scarretahic yu'un guerra, xchi.

⁷ Te Josué soc spisil te winiquetic yu'un guerra, ch'ayal yo'tanic a la yochintayic ta banti te ha'etic yu'un Merom.

⁸ Te Jehová la yac'ticlambe ta sc'ab Israel, hich la yehchentesic soc la snutsic bahel ta stojol norte c'alal ta Muc'ul Sidón, ta Misrefot-maim soc ta spamlej yu'un Mizpa te ay ta stojol banti ya xloc' tal c'ahc'al. La smilticlanic ha to c'alal mayuc jtuhluc cuxul hil yu'unic.

⁹ Te Josué hich la spasbe te bin ut'il pasot ta mandar yu'un Jehová: la sbojticlambe schihal yacan te scawuhic soc la schic'ticlambe te scarretahic yu'un guerra.

¹⁰ Suhtic tal te Josué, la yu'untay te Hazor soc la smil ta espada te ajwalil yu'une; te Hazor ha jolal yu'un spisil te ajwaliletic ini.

¹¹ La smilic ta espada spisil mach'atic cuxulic tey a, jc'axel la slajinic, mayuc mach'a cuxul hil; soc la schiq'uic te Hazor.

¹² Ha nix hich te Josué la yu'untay spisil te pueblohetic yu'un te ajwaliletic, soc la smilticlan ta espada spisil te ajwaliletic yu'unic, jc'axel la smilticlan hilel, hich te bin ut'il pasot ta mandar yu'un Moisés te a'bat yu'un Jehová.

¹³ Pero te Israel ma ba la schiq'uic spisil te pueblohetic te ayic ta but'bil tsehletic; ha nax la schic' te Hazor te Josué.

¹⁴ Te snich'nab Israel la yich'ic spisil te biluquetic soc chambahlametic yu'un te pueblohetique; pero spisil te winiquetic la smilic ta espada ha to c'alal jc'axel la slajinic, mayuc mach'a cuxul hil yu'unic.

¹⁵ Hich te bin ut'il Jehová la spas ta mandar Moisés te a'bat yu'un, hich nix te Moisés la spas ta mandar te Josué, soc hich nix la spas te Josué, mayuc la sch'ay jp'ahluc te bin pasot ta mandar yu'un Jehová te Moisés.

Josué la yu'untay spisil te q'uinal

¹⁶ Hich te Josué la yu'untay spisil te q'uinal: ha te witsiltic, spisil te Neguev, spisil te sq'uinal Gosén, te spamlejetic, te Arabá, te witsiltic yu'un Israel soc te spamlejetic yu'un,

¹⁷ c'alal ta wits Halac te mohem bahel ta stojol Seir, ha to ta Baal-gad te ay ta spamlej yu'un Líbano ta ye'tal wits Hermón. Soc la stsac spisil te ajwaliletic yu'unic soc la smilticlan.

¹⁸ Te Josué bayel tiempo la ya'be guerra te ajwaliletique.

¹⁹ Mayuc junuc pueblo te la schap sc'op scuenta lamal q'uinal soc te snich'nab Israel, ha nax te heveohetic te nahinemic ta Gabaón; spisil te yantic la stsalic ta scuenta guerra.

²⁰ Como ha nix Jehová te la ya'be tulanijuc yo'tanic scuenta yu'un ya ya'beyic guerra te Israel, scuenta yu'un jc'axel ya yich'ic lajinel, ma ba na'bot yo'bolil sbahic, hich te bin ut'il pasot ta mandar yu'un Jehová te Moisés.

²¹ Soc ha nix ta yorahil a te Josué baht slajin te sts'umbal Anac te ayic ta wits Hebrón, ta Debir, ta Anab, ta spisil te witsiltic yu'un Judá soc spisil te witsiltic yu'un Israel; te Josué la slajinlan soc te pueblohetic yu'unique.

²² Mayuc hil ni jtuhluc sts'umbal Anac ta sq'uinal te snich'nab Israel; ha nax hilic stuquel ta Gaza, ta Gat soc ta Asdod.

²³ Hich te Josué la yu'untay spisil te q'uinal, hich te bin ut'il pasot ta mandar yu'un Jehová te Moisés; la yac'ticlambe yich'ic te q'uinal te snich'nab Israel, chican jayeb ya yich'ic te jujuchahp. Hich la scux yo'tan yu'un guerra te q'uinale.