Jonás 1 - Bible in Tzeltal Bachajón

Jonás ahn loq'uel ta stojol Dios

¹ Te sc'op Jehová tal ta stojol Jonás snich'an Amitai, hich la yalbe:

² Hahchan, bahan ta muc'ul pueblo Nínive, c'opojan ta scontrahinel, como mohix tal ta jtojol te schopolile, xchi.

³ Pero te Jonás loc' ta ahnel ta stojol Jehová, ya c'an bahtuc ta Tarsis. Hich co bahel ta Jope banti la sta jun barco te ya xbaht ta Tarsis. La stoj spasaje, och ta barco, yu'un ya sjoquin bahel ta Tarsis, namal ta stojol te Jehová.

⁴ Pero te Jehová la yac' hahchuc tulan ic' ta mar, c'ax tulan te yic'al ha'al ta mar, c'an jatuc te barco yu'un.

⁵ Xiwic te j'a'teletic ta barco, jujutuhl la yawtay te dios yu'unique. Soc la sch'ojticlanic ochel ta mar te ihcatsiletic te ayic ta barco, yu'un ya xco yalal. Pero te Jonás cohemix bahel ta yutil te barco, ochem swayel a.

⁶ Te capitán yu'un te barco nohpoj tal ta stojol, hich la yalbe: ¿Bin yac apas te wayalate? Hahchan, c'opona te Dios awu'une; ya wan sna'botic yo'bolil jbahtic, hich ma ba ya xlajotic, xchi.

⁷ Talel c'axel hich la yalbe sbahic te j'a'teliletic ta barco: La', ya jpasbetic seña ta na'el yu'un hich ya jna'tic a mach'a ta scuenta te talem ta jtojoltic te wocole, xchihic. Hich la spasic seña ta na'el, ha c'oht ta scuenta Jonás.

⁸ Ha yu'un hich la yalbeyic: Hala ca'iycotic bin scuentahil te talem ta jtojoltic te wocol ini. ¿Bin awa'tel, soc banti talemat? ¿Banti ay aq'uinal, soc banti ay alumal? xchihic.

⁹ La sjac' te Jonás: Te ho'one hebreohon, quich'oj ta muc' te Jehová te Dios ta ch'ulchan, te la spas te mar soc te lumq'uinal, xchi.

¹⁰ Bayel xiwic yu'un te winiquetic, hich la yalbeyic: ¿Bin yu'un te hich la apas? xchihic, como sna'ojic te loc' ta ahnel ta stojol Jehová, como hich halbotic yu'un.

¹¹ Yac ta yich'bel xan yip te mar, ha yu'un hich la sjoc'obeyic: ¿Bin ya jpascotic ta atojol scuenta yu'un ya xlahmaj te mare? xchihic.

¹² La sjac' te Jonás: Tsacawonic, ch'ojawonic ochel ta mar, hich ya xlahmaj a te mar; como jna'oj te ho'on ta jcuenta te talem ta atojolic te tulan yic'al ha'al ini, xchi.

¹³ Te j'a'teletic ta barco la yaq'uic xan fuersa te yacuc xc'oht ta q'uinal te barco, pero ma ba hu' yu'unic, como tulan xan yac ta bahq'uel te mar ta scontrahinel.

¹⁴ Ha yu'un la yawtayic te Jehová, hich la yalic: Awocoluc, Jehová, manchuc ya xlajucotic ta scuenta scuxlejal te winic ini; ma xawac' ta jtojolcotic te sch'ich'el te mach'a mayuc smule; como ha'at, Jehová, la apas te bin la sc'an awo'tan, xchihic.

¹⁵ Hich la stsaquic te Jonás, la sch'ojic ochel ta mar; hich lahmaj te tulan sbahq'uel mar.

¹⁶ Hich te winiquetic bayel la xi'ic te Jehová; la ya'beyic milbil smahtan soc ay bin la yalic ta jamal ta stojol.

¹⁷ Pero te Jehová ay schahpanej jcoht muc'ul chay te ya sbic' te Jonás. Oxeb c'ahc'al soc oxeb ahc'abal ay ta sch'uht te chay te Jonás.