Job 8 - Bible in Tzeltal Bachajón

Bildad ya yal te Dios toj ya xchahpanwan

¹ La sjac' te Bildad te talem ta Súa, hich la yal:

² ¿Jayeb xan tiempo te hich yac awal, te hich ya xc'opojat te bin ut'il tulan ic'?

³ ¿Ya bal showiytes Dios te bin toj ay, o ya bal showiytes te stojil chahpanel te Mach'a ya xhu' yu'un spisil?

⁴ Teme la sta smulic te anich'nab ta stojol Dios, ha la ya'be scuch smulic.

⁵ Teme yac ale te Diose, teme yac awalbe wocol te Mach'a ya xhu' yu'un spisil;

⁶ te sacuc awo'tan soc te tojuc awo'tan, ora me ya xhahch scoltayat soc ya xcha'lecubtesat ta awocol te hichuque.

⁷ Aunque tut te shahchibal awu'un, muc' ya xc'oht ta patil.

⁸ Joc'obeya te jaycaj te c'axiquix ta q'uinal, nopa te bintic sna'ojic te me'iltatiletic;

⁹ como te ho'otic wojey to nax chicnajotic ta q'uinal, mayuc bin jna'ojtic; te jcuxlejaltic li' ta q'uinal, hich nax ya xc'ax te bin ut'il axinal.

¹⁰ ¿Ma bal yacuc ya'bat anop soc ya sc'oponat, soc ta yo'tanic ya xloc' tal c'opetic?

¹¹ ¿Ya bal xcol papiro te banti mayuc uhlub? ¿Ya bal xcol jalal te banti mayuc ha'?

¹² Aunque yax to soc ma to ba yich'oj bojel, ha nahil ya xtaquij yu'un spisil yantic ha'maletic.

¹³ Hich ay te behetic yu'un spisil mach'atic ya sch'ayic ta yo'tanic te Diose, soc hich ya xtup' bahel smuc'ul yo'tan te mach'a chopol,

¹⁴ como te smuc'ul yo'tan, hich c'ohem te bin ut'il na, soc te bin yipinej yo'tan, hich c'ohem te bin ut'il jala am.

¹⁵ Teme ya xihc'an sba ta sna, ya xpuch' bahel yu'un, teme ya stsac, ma ba ya xcuhch yu'un.

¹⁶ Hich c'ohem te bin ut'il yaxal te' te ts'umbil ta c'ahc'alel, te ya spuc bahel sba ta nichimaltic;

¹⁷ ya schucticlan sba slohp' ta banti busul ton, soc ya x'och bahel ta c'ub tontiquil.

¹⁸ Pero teme ya xbulot loq'uel te banti aye, te lugar ya smuc ta yo'tan: Mayuc bin ora la jquilat, xchi.

¹⁹ Hich ya xc'oht yutsilal te be yu'une, patil ya xch'ihy tal sjelol ta lum.

²⁰ Te Dios ma ba ya sp'aj te mach'a toj, soc ma ba ya scoltay te mach'a chopol.

²¹ Ya me yac' stse'ejinat xan soc te ya x'awonat scuenta yutsil q'uinal yac awa'iy.

²² Te mach'atic ya yihlayat ya me sc'u'inic q'uexlal, soc te banti nahinem te mach'atic chopolic ya me xtup' bahel, xchi te Bildad.