Job 6 - Bible in Tzeltal Bachajón

Job la sjac'be sc'op Elifaz

¹ Hich la sjac' te Job:

² ¡Te yacuc xhu' ta p'isel yalal te jwocol, soc te yacuc x'och ta balanza te jmel-o'tan!

³ C'ax hich yalal ya xloc' a te bin ut'il yalal te shi'al mar. Ha yu'un te tulan ta a'iyel te c'opetic cu'un,

⁴ como ay ta jbaq'uetal te ya'tejibalul st'ihmalte' te Mach'a spisil ya xhu' yu'un, te jch'uhlel ya yuch'be te svenenohil, soc ya scontrahinon te bintic xiweltic sba yu'un Dios.

⁵ ¿Ya bal x'oc' te ha'mal burro teme ay ha'mal ya swe'e? ¿Ya bal x'oc' te toro teme ay ac ya swe'e?

⁶ ¿Ya bal yich' we'el te we'elil te mayuc yats'amul? ¿Ay bal sbuhts' te sacal tomut?

⁷ Te bintic yihlayej co'tan a, ha jwe'elinej yo'tic.

⁸ Ayuc bin ut'il ya x'a'boton te bin ya jc'ane; ayuc bin ut'il ya ya'bon Dios te bin ya jmulan;

⁹ te lecuc ya ya'iy te Dios te ya sp'e'on, te yacuc yac' sc'ab yu'un ya slajinon.

¹⁰ Ha xanix smuc'ul co'tan ini, ha yutsil co'tan ta yohlil te sc'uxul tulan wocol, ha te ma ba la jmucbe sc'op te Ch'ul Dios.

¹¹ ¿Bin a te quipinej te ha ya yac' ya jmahliy xan? ¿Bin a te jlajibal, yu'un ya to jmahliy xan?

¹² Te quip ¿pajal bal soc te yip te tone? ¿Ha bal bronce te jbaq'uetale?

¹³ ¿Ho'on ni bal ya xhu' ya jcoltay jba, te bin ut'il la yich'ix loq'uesel spisil te coltayele?

¹⁴ Te mach'a ay swocol ya xmuc'ubtesbot q'uinal yu'un te smohlol, soc nix te mach'a yihquitayej yich'el ta muc' te Mach'a spisil ya xhu' yu'une.

¹⁵ Pero te quermanotac la yac'on ta c'abal hich te bin ut'il yacan ha'; hich c'axic bahel te bin ut'il tulan yacan ha'

¹⁶ te ihc'ubenic yu'un te uhlem hielo, soc muculic ta me'sic;

¹⁷ te ya xch'ay bahel c'alal ya xq'uixnaj q'uinal, ta yorahil c'ux c'ahc'al ya xch'ay bahel ta yawil.

¹⁸ Ya showiyic bahel ta be te jbeheletic; ya xch'ayic ta jochol taquin q'uinal.

¹⁹ Ya slehic te jbeheletic te talemic ta Temán, soc te jbeheletic te talemic ta Sabá ya smuc'ulin yo'tanic;

²⁰ pero q'uexawic yu'un te la smuc'ulin yo'tanic c'alal c'ohtic tey a, ma ba la sna' bin ya spasic yu'un.

²¹ Yo'tic hich pajal c'ohemex soc, awilojiquix te bin xiweltic sba, xiwex yu'un.

²² ¿Ho'on bal la jcal: Ich'bonic tal, tojbonic jcoltayel ta ac'ulejalic;

²³ o coltayawonic loq'uel ta sc'ab jcontra, coltayawonic loq'uel ta sc'ab te j'uts'inwanej, xchihon bal?

²⁴ nohptesawonic, ho'on ya xch'abon; a'bonic jna' banti howiyemon.

²⁵ ¡Bayel ya xtuhun te tojil c'opetic! Pero ¿bin ya xchicnaj a ta c'opetic yac awalique?

²⁶ ¿Ya bal acuyic te yac atojobtesbeyic sc'op te mach'a ay bayel swocol, te hich c'ohem te bin ut'il ic'?

²⁷ Ha'ex yac apasbeyic seña ta na'el ta stojol te me'ba', soc biluc nax yac alomchonic a te awamigo.

²⁸ Yo'tic, awocoluc, ilawonic; ilawilic teme yac jlotiybelexe.

²⁹ Nohpahic xan ta yach'il, soc ma me ayuquix bin ma stojiluc xapasic; nohpahic xan, na'ahic te stojil bin ya cal.

³⁰ ¿Ay bal bin ma stojiluc bin ya cal? ¿Yu'un bal ma jna' stsahtayel te jc'op te ma stojiluque?