Job 42 - Bible in Tzeltal Bachajón

Job ya yal ay sp'ijil yo'tan te Diose

¹ Te Job la sjac'be sc'op te Jehová, hich la yal:

² Ya jna' te spisil ya xhu' awu'un, soc te ma xhu' ta comel te bin anopoje.

³ La ajoc'oy: ¿Mach'a a te mayuc sp'ijil yo'tan te ya slajimbe sc'oblal te j'ac'-o'tanil cu'un? xchihat. Ha la jcal te bin ma ba jna'oj, ha te bintic jelawen yutsil te ma ba la jna'be scuentahil.

⁴ La awalbon: A'iya awa'iy, ya jc'oponat; ya joc'obat, ha'at yac asuhtesbon, xchihat.

⁵ La jca'iybat ac'oblal ta jchiquin, pero yo'tic ya quilatix ta jsit.

⁶ Ha yu'un ya quihlay jba soc ya jsuhtes co'tan ta ts'u'lum soc ta tan, xchi te Job.

Slajibal c'op

⁷ Ta patil, te c'alal hich halbot yu'un Jehová te Job, te Jehová hich la yalbe te Elifaz te talem ta Temán: Tihl quilimba ta atojol soc ta stojol te cheb amohloltac, como ma stojiluc la awalbonic jc'oblal, hich te bin ut'il la yal te ca'bat Job.

⁸ Ha yu'un yo'tic ya me atsaquic huqueb jcolel torohetic soc huqueb tat tuminchijetic, bahanic ta stojol te ca'bat Job, ac'ahic scohtol chic'bil mahtanil ta acuentahic. Te ca'bat Job ya sc'opombeyex Dios, soc ya quich'be ta cuenta te sc'op scuenta yu'un ma ba ya ca'beyex awocolic yu'un te ma ba stojil la awalbonic jc'oblal, hich te bin ut'il la yal te ca'bat Job, xchi.

⁹ Ha yu'un te Elifaz te talem ta Temán, Bildad te talem ta Súa, soc Zofar te talem Naamat, baht spasic te bin halbotic yu'un te Jehová. Hich te Jehová la yich'be ta cuenta te sc'op te Job.

Job ya sta xan sc'ulejal

¹⁰ Te c'alal la sc'opombeyix Dios a yu'un te yamigotac a te Job, te Jehová la slecubtes a te ta swocol, soc la ya'be xan sc'ulejal cheb buelta te bin ut'il ta nahil to.

¹¹ Talic ta stojol spisil te sbanquil yihts'in soc spisil te mach'atic la sna'beyic sba ta nahil to, we' uch'ic ta sna. Pajal la smel yo'tanic yu'un soc la smuc'ubtesbeyic q'uinal ya'iy yu'un spisil swocol a'bot yu'un Jehová. Ta jujutuhl la ya'beyic taq'uin soc jujun ch'ocowil oro.

¹² Te Jehová c'ax hich la ya'be bendición a te Job te bin ut'il ay ta nahil to. Ay jpic soc ho'lajunbahc' (14,000) tuminchijetic, ho'lajunbahc' (6,000) camellohetic, lajunwinic yoxbahc' (1,000) ta chahp j'a'tel-wacaxetic, soc lajunwinic yoxbahc' (1,000) me' burrahetic.

¹³ Soc ayin huctuhl queremetic soc oxtuhl ach'ixetic yu'un.

¹⁴ Te wixile la ya'be sbihilin Jemima, te schebale, Cesia, te yoxebale, Keren-hapuc.

¹⁵ Mayuc yan antsetic hich st'ujbilalic ta bahlumilal a te bin ut'il te yantsil-nich'nab Job. Te static pajal la ya'be yich' sq'uinalic soc te yermanotaque.

¹⁶ Ta patil cuxaj hucwinic (140) xan ha'bil te Job, la to yil te snich'nab soc te smamatac c'alal ta schancajal sts'umbal.

¹⁷ Mero mamalix a te cham te Job.