Job 41 - Bible in Tzeltal Bachajón

¹ ¿Ya bal xhu' yac aluc loq'uel ta anzuelo te Leviatán, o ya bal xhu' yac achucbe yac' ta lazo?

² ¿Ya bal xhu' yac ac'asesbe lazo ta sni', o ya bal xhu' yac asohltesbe gancho ta yahlan-e?

³ ¿Ya bal xbic'talti'ij ta atojol? ¿Ya bal sc'oponat ta c'unil c'op?

⁴ ¿Ya bal achap ac'op soc yu'un yac amosohin spisil ora?

⁵ ¿Ya bal x'ixtajat soc hich te bin ut'il tut ha'mal mut, o ya bal achucbe yixtalan atut ach'ix?

⁶ Te jchombajeletic ¿ya bal spasic trato ta stojol? ¿Ya bal sesenic yu'un ya schonic?

⁷ ¿Ya bal xhu' yac alowbe snuhculel ta lanza, o ya bal alow ta slowojibal chay te sjole?

⁸ Teme yac awac' ac'ab ta stojol, ¡ya me ana' te tsactamba ta guerra, ma ba yac apasix yan buelta!

⁹ Tojol ya smuc'ulin awo'tan te yac awalbe stsaquel, yu'un tic' ya xch'ay awo'tan a teme yac awile.

¹⁰ Mayuc mach'a te hich ay yip yo'tan te ya stij hahchel. Teme hiche, ¿mach'a c'an hu'uc yu'un te ya stehc'an sba ta jtojol hiche?

¹¹ ¿Mach'a ay bin la ya'bon yu'un ya sc'an ya jsutbe sjelol? ¡Spisil bintic ay ta ye'tal ch'ulchan ho'on cu'un!

¹² Ma ba ya xquechajon ta yalbeyel sc'oblal te yoc sc'ab, soc te yip soc te st'ujbilal.

¹³ ¿Mach'a ya sloq'uesbe te smahquil? ¿Mach'a ya xnohpoj bahel ta ya'beyel freno?

¹⁴ ¿Mach'a ya xhu' ya sjambe sti'il ye? ¡Te chohlolchohl sbaquel ye ya yaq'uic xiwel!

¹⁵ Ta spat ay chohlochohl mahquilaletic te sjaloj sbahic ta maquel.

¹⁶ Mero slac'oj sbahic, ma xc'ax ic' tey a.

¹⁷ Slap'ticlanej sbahic; slapticlanej sbahic, ma xhu' ya yich'ic jamel.

¹⁸ Ya shu'xiy tsantsehwal ta sni'; te site hich sts'anabul te bin ut'il sjahts' c'ahc'al te ya xloc' tal ta sab.

¹⁹ Ya xloc' yat c'ahc' ta ye; ya xloc' nich c'ahq'uetic a.

²⁰ Ya xloc' ch'ahil ta sni', hich te bin ut'il oxom yac ta buhl ya'lel.

²¹ Ta yic'al sni' ya stihltes ac'al, soc ya xloc' c'ahc' ta ye.

²² Ay ta snuc' te yipe; ay xiwel ta stojol.

²³ Te wec'ajtic snuhculel slac'ticlanej sbahic; tulanic, ma stij sbahic.

²⁴ Tulan yo'tan hich te bin ut'il ton, tulan hich te bin ut'il ye molino.

²⁵ Te c'alal ya xhahch, ya xiwic te mach'atic ay yipic; ya xloq'uic ta ahnel ta scaj te ya slihlin sba.

²⁶ Mayuc bin ya xpasbot teme ya xtahot yu'un espada, o lanza, ya'tejibaluc t'ihmalte', o tut lanza.

²⁷ Te taq'uin hich c'ohem yu'un te bin ut'il ac, te bronce hich c'ohem yu'un te bin ut'il c'a'al te'.

²⁸ Ma ba ya xloc' ta ahnel yu'un te ya'tejibalul t'ihmalte', te tonetic yu'un jihmuch'il hich c'ohem yu'un te bin ut'il suhlil trigo.

²⁹ Te maz hich c'ohem yu'un te bin ut'il sahmul-te'; ya stse'lay te xjanlajan sc'op tut lanza.

³⁰ Xet'emtic te ye'tal sch'uht, scholet ya xhil yoc ta lum hich te bin ut'il yoc swuyojibal trigo.

³¹ Ya yac' buhlanuc te sc'ubulil mar hich te bin ut'il ha' ta oxom; ya yac' te hich ya xc'oht te bin ut'il oxom banti ya yich' capel poxetic.

³² Saclimlim ya xhil yu'un te ha' te banti ya xbaht, hich c'ohem te sac sjol te sc'ubulil mar.

³³ Mayuc yan ta bahlumilal te pajal soc; ha chambahlam te ma xiw.

³⁴ Mayuc sc'oblal ta yo'tan spisil yantic chambahlametic te ya stoy sbahic; ha ajwalil yu'un spisil jtoyba chahmbahlametic, xchi te Jehová.