Job 40 - Bible in Tzeltal Bachajón

¹ Te Jehová hich la yalbe xan te Job:

² Te mach'a ya shach c'op ¿ya bal stsac sba ta c'op soc te Mach'a spisil ya xhu' yu'une? Te mach'a ya sten ta c'op te Dios ¡ac'a sjac' te c'op ini! xchi sc'oblal.

³ Ha yu'un te Job la sjac'be sc'op te Jehová, hich la yal:

⁴ Mayuc jtuc ya ca'iy; ¿bin ya xhu' ya jsuhtesbat? Ya jmac que ta jc'ab.

⁵ Junax buelta c'opojon, ma ba ya jaq'uix; cheb nax buelta, pero ma ba ya xc'opojonix, xchi.

Ya xchicnaj te yu'el Dios

⁶ Te Jehová la sjac'be sc'op te Job ta yohlil te sutu-ic', hich la yal:

⁷ Chuca ach'uht, pasa me tulan winiquil; ay bin ya joc'obat, ya me asutbon.

⁸ ¿Ya bal alajimbon sc'oblal te stojil chahpanel cu'un? ¿Ya bal awalbon jmul yu'un toj ya xc'ohat ha'at?

⁹ ¿Ay bal ac'ab hich te bin ut'il ay yu'un Dios? ¿Ya bal at'omtes ac'op hich te bin ut'il ya xc'opoje?

¹⁰ Ch'ala aba ta smuc'ul awu'el soc awutsilal, c'u'ina te ich'el ta muc' soc at'ujbilal.

¹¹ Mala te yip awilimba, ilawil spisil jtoybahetic soc cohteslana.

¹² Ilawil spisil te jtoybahetic, pehc'anlana, ts'oticlana ta teq'uel te mach'atic chopolic bayuc ayic.

¹³ Mucticlana spisilic ta ts'u'lum, macticlambeya sit yelawic ta yihc'al q'uinal.

¹⁴ Teme hich ya xhu' awu'un spasel, ho'on ya cal ta jamal te ya xhu' ya scoltayat te awa'el ac'ab.

¹⁵ Ila awil te Behemot ho'on la jpas hich te bin ut'il la jpasat. Ya swe' ha'mal hich te bin ut'il j'a'tel-wacax.

¹⁶ Ay ta scub te yipe, bayel yip ay ta schihal sch'uht.

¹⁷ Te sne ya stij sba hich te bin ut'il cedro, jalbil te smuc'ul chihaletic.

¹⁸ Te sbaquel pajal soc tubo pasbil ta bronce, te yoc sc'ab hich te bin ut'il bahlal taq'uin.

¹⁹ Ha shahchibal ya'tel te Diose, ha nax te Jpaswanej yu'un ya xhu' ya xnohpoj tal soc espada.

²⁰ Te witsiltic ya yac' coluc ha'mal scuenta swe'el, te banti ya ya'iyic ixta' spisil te ha'mal chambahlametic.

²¹ Ya spahcan sba ta ye'tal te loto-te'etic, ya snac' sba ta ye'tal jalaletic ta ha'lumiletic.

²² Te loto-te'etic ya ya'be yaxinal, te sauce-te' yu'un te uc'um ya sjoytayic.

²³ Teme xju'et snojel ha', ma ba ya xi'; jun yo'tan ay aunque ya xmajot ta ye yu'un spisil te muc'ul-ha' Jordán.

²⁴ ¿Mach'a ya xhu' ya stsac te c'alal wiq'uil sit, o te ya shotbe sni'?