Job 39 - Bible in Tzeltal Bachajón

¹ ¿Ya bal ana' bin ora ya xtohc yalic te ha'mal tentsunetique? ¿Ya bal awil te c'alal ya xtohc te chije?

² ¿Ya bal awahtay te jayeb u a ya xtohc? ¿Ya bal ana' bin ora ya xtohc?

³ Ya scox sbahic, ya xtohc yalatac, ya xc'ax te sc'uxule.

⁴ Ya yich' yipic te yalatac soc ya xmuc'ubic ta aquiltic; ya xbahtic, ma ba ya suhtiquix tal.

⁵ ¿Mach'a la yac' ta libre te ha'mal burrohetic? ¿Mach'a la scoltaybe te schuhquile?

⁶ Ho'on la jca'be sna ta jochol q'uinal soc te chi'il lum banti ya xnahin.

⁷ Ya stse'lay te c'opetic ta pueblo, soc ma ba ya ya'iybe sc'op te jtij-chambahlametique.

⁸ Ya sbehentay te witsiltic yu'un slehel yaxal ha'mal, ya sle spisil yaxal ha'mal.

⁹ ¿Ya bal yac' sba ta a'batinel awu'un te ha'mal toro? ¿Ya bal xhil ta canoa awu'un?

¹⁰ ¿Ya bal xhu' yac achuc yu'un ya stop'lum ta chohlolchohl? ¿Ya bal st'unat bahel ta stop'el te spamlejetic?

¹¹ ¿Ya bal smuc'ulin awo'tan yu'un te bayel yip, soc ya bal awa'be spasbat te awa'tele?

¹² ¿Ya bal ach'uhun te ya suht tal yu'un ya stso'bat te sit ats'unub awawal soc ya yac' ta yawil swuyojibal atrigo?

¹³ Tse'el yo'tan ya slichulan xic' te avestruz-mut, pero te sc'uc'umal ma hichuc te bin ut'il te cigüeña-mut.

¹⁴ Ya yac' ston ta lum, ya yac' ya xq'uixnaj ta hi',

¹⁵ ma sna' teme ay mach'a ya xtec'bot yu'une, o teme ya xt'usticlambot yu'un ha'mal chambahlametic.

¹⁶ Ya yuts'in te yalatac, hich ya xc'oht te bin ut'il ma ha'uc yalatac, ma yocheluc teme tojol te ya'tele,

¹⁷ como ma ba a'bot sp'ijil yu'un Dios, ma ba a'bot snopojibal yu'un.

¹⁸ Pero te c'alal ya xhahch ta ahnimal, ya stse'lay te cawu soc te mach'a mohem a.

¹⁹ ¿Ha'at bal yac awa'be yip te cawu? ¿Ha'at bal yac ach'albe snuc' ta sbanac?

²⁰ ¿Ha'at bal yac awac' wihluc hich te bin ut'il c'ulub? Ya yac' xiwel te ya xhu'xiy sni'.

²¹ Ya shot'ticlan lum, tse'el yo'tan yu'un te yipe, ya xloc' bahel sta sbahic ta guerra.

²² Ya stse'lay te xiwele, ma ba ya xiw soc ma ba ya sut sit ta spat ta stojol te espada.

²³ Xchahc'lajan te yawil ya'tejib t'ihmalte' te scuchoj, xliplajan te lanza soc te tut lanza.

²⁴ Mero tulan ya x'ahnimaj; ma ba ya xcomot yu'un yoq'uel te corneta.

²⁵ C'alal ya x'oc' te corneta, x'ihi'et ta sjaq'uel. Namal ya yich' ta ic' te tsactamba ta guerra, te yaw te capitanetic soc te awetic yu'un guerra.

²⁶ ¿Ya bal xwihl te jxic ta scuenta ap'ijil, soc ya slich xic' ta stojol sur awu'un?

²⁷ ¿Ha'at bal ta scuenta amandar te ya xwihl mohel te muc'ul jxic soc te toyol ya yac' spechech?

²⁸ Nahinem ta sacal ch'en, ya spas sna ta sba tontiquil.

²⁹ Tey to ya smacliy a te sti'bal te namal ya yil bahel.

³⁰ Te yalatac ya yuch'be sch'ich'el; te banti ay chamen-baq'uet, tey ay a.