Job 36 - Bible in Tzeltal Bachajón

Eliú ya yalbe sc'oblal te smuc'ul yutsilal Dios

¹ La yal xan te Eliú:

² Mahliyawon jtebuc, ya jnohptesat, como ay to bintic chapal cu'un ta scuenta scoltayel ta c'op te Diose.

³ Namal ya quich' talel te jp'ijil yu'un ya cal te toj bin ya spas te Jpaswanej cu'une.

⁴ Ma lotiluc te bintic ya cal: ha sjoquinejat te mach'a ts'acal te sp'ijile.

⁵ Mero muc' te Diose, pero mayuc mach'a ya sp'aj; bayel yip te sp'ijile.

⁶ Ma ba ya yac' cuxajuc te mach'a chopol yo'tan, pero toj bin ya spasbe stuquel te mach'atic ay swocolic.

⁷ Spisil ora ya yil te mach'atic toj yo'tanic; ya yac' huhcajuc ta shuctajib ajwaliletic, soc spisil ora ya stoybe sc'oblalic.

⁸ Teme ay chuculic ta cadenahetic, teme chuculic ta scuenta uts'inele,

⁹ yu'un ya ya'be sna'ic te bin spasojic soc bin ut'il la yac' sbahic ta tsalel yu'un te toybahile.

¹⁰ Ya sjambe schiquinic yu'un ya stojobteslan, soc ya yalbe te yacuc yihquitayic te mulile.

¹¹ Teme ya ya'iyic soc ya yac' sbahic ta a'batinel yu'une, lec ya xc'ohtic te jayeb xan tiempo ya xcuxajic soc ay me yutsil ya xc'ax yu'unic te ha'biletique.

¹² Pero teme ma ba ya ya'iyique, ya me xlajic ta espada, ya sch'ayic bahel ta scaj te mayuc sp'ijil yo'tanic.

¹³ Te mach'atic chopol yo'tanic ya stsob yilimbahic, soc ma x'awonic ta sc'anel coltayel te c'alal chuculic yu'un.

¹⁴ Jcolel-jch'ihyeletic a ya xchamic; ya xlaj scuxlejalic ta yohlil te sodomtahetic

¹⁵ Ta scuenta swocol, Dios ya scoltay te mach'a ay swocol; ya sjambe schiquin ta scuenta swocol.

¹⁶ Ha nix hich ya scoltayat loq'uel ta wocol, ya yac'at ta muc'ul jamal lugar, soc ya snojesbat ta bayel lequil we'elil te mesa awu'un.

¹⁷ Pero awich'beyejix te castigo yu'un te mach'a chopol yo'tane, stsacojat te castigo soc te stojil chahpanel.

¹⁸ Tsahtaya aba te manchuc ya slo'loybat awo'tan te c'ulejaliletic, ma me xawac' showiytesat te yich'el taq'uin yu'un chahpanwanej.

¹⁹ C'alal ay awocol ¿ya bal xhu' ya scoltayat te c'ulejaliletic awu'un o spisil te awipe?

²⁰ Ma me xajac' awo'tan a te ya xtal te ahc'abal te ya xch'ay bahel te pueblohetic ta lugar yu'unic.

²¹ Tsahtaya me aba, ma me suhtat ta spasel te bin chopol, te bin ut'il la awich'ix tsajel ta scuenta te wocole.

²² Ha toyol sc'oblal te Dios ta scuenta te yu'el; ¿mach'a jp'ijubteswanej te pajal soque?

²³ ¿Mach'a a'bot sna' yu'un te be yu'une? ¿Mach'a ya xhu' ya yalbe: Ma lecuc bin la apas, te xchihe?

²⁴ Na'a me stoybeyel sc'oblal te ya'tel, te ha yich'oj halel ta c'ayoj yu'un winiquetic.

²⁵ Spisilic ya yilic, te ants-winiquetic namal to ya yilic.

²⁶ C'ax muc' te Diose, ma xhu' cu'untic sna'el; ma xhu' ta ahtaybeyel te ya'bilale.

²⁷ Ha ya stsob mohel ta t'uhlut'uhl te ha'e, ya sc'ahtajtes ta ha'al te sahbe;

²⁸ te tocaletic ya smalic cohel te ya'lel, xchajet ya xco ta stojol te ants-winiquetique.

²⁹ ¿Mach'a ya xhu' yu'un sna'el ban c'alal slimoj sba te tocaletic, soc bin ut'il tulan ya xloc' sc'op te banti nahinem?

³⁰ Ya slim bahel te sacal q'uinal ta sjoyobal, soc ha ya smuc a te sc'ubulil te mar.

³¹ Hich ya smac'lin te pueblohetic, hich ya yac' bayel we'eliletic a.

³² Ya stsac ta sc'ab te tsantsehwal, ya yalbe mandar ta banti ya stojlin bahel.

³³ Te chahwuc ya yal te ya xtal ic'al ha'al, ha nix hich te wacaxetic ya yaq'uic ta na'el te yac ta talele.