Job 3 - Bible in Tzeltal Bachajón

Job ya yal bohloben sc'oblal te ayin

¹ Ta patil a ini, hahch ta c'op te Job, la yalbe te bohloben sc'oblal te bin c'ahc'alil ayin.

² Hich la yal te Job:

³ Ch'ayuc te bin c'ahc'al ayinon, soc te ahc'abal te hich halot: Ic'bilix ta ch'uhtul tut querem, te xchihe.

⁴ Ayuc bin ut'il ihc'ub q'uinal ta hich ora, te manchuc ya yich' ta cuenta te Dios ta toyol, te manchuc ya sacub q'uinal ta stojol.

⁵ Ac'a yich' maquel yu'un yihc'al q'uinal soc yaxinal lajel; ac'a yich' potsel ta tocal te ya yac' te xiweltic sba ya xc'oht hich te bin uti'il jun c'ahc'al te macal ta ihc'al tocal.

⁶ Ac'a u'untayec yu'un yihc'al q'uinal ta hich ahc'abal; manchuc ya yich' ahtayel ta yohlil te c'ahc'aletic yu'un te ha'bil, soc manchuc ya yich' ahtayel te yahtalul uhetic.

⁷ Ayuc bin ut'il mayuc bin chicnaj a te ahc'abal ini, manchuc chicnaj junuc c'ayoj tey a.

⁸ Te mach'atic ya yalic te bohloben sc'oblal te c'ahc'al ac'a yalic te bohloben sc'oblal te c'ahc'al ini, ha te mach'atic ya xhu' ya stijic hahchel te Leviatán.

⁹ Ac'a ihc'ubicuc te jsacubel eq'uetic, manchuc ya smahliy te sacal q'uinal, manchuc ya yil te sjahts' te sacubel q'uinal,

¹⁰ yu'un ma ba la smac te puertahetic yu'un te ch'uhtul te banti ayon a, soc ma ba la snac' ta jsit te wocole.

¹¹ ¿Bin yu'un te ma ba chamon ta ch'uhtul, o chamucon a te c'alal ayinone?

¹² ¿Bin yu'un la yic'onic te jol-acaniletic soc te ay chu'uletic te la jchu'une?

¹³ Chamenonix soc cuxojix co'tan te hichuque, wayalonix soc yaconix ta cux-o'tan te hichuque,

¹⁴ joquinejix te ajwaliletic soc j'ac'-o'taniletic ta q'uinal te la scha'pasic xan te bintic jihnemic;

¹⁵ o joquinejix te príncipaletic te ay oro yu'unic, te la snojesic ta plata te snahique.

¹⁶ ¿Bin yu'un ma ba la jquich' muquel ta lum hich te bin ut'il c'axem alal, hich te bin ut'il alaletic te ma ba la yilic te sacal q'uinale?

¹⁷ Tey ya xquehchaj uts'inwanej yu'un a te jchopol-o'tanetic; soc tey ya scux yo'tanic a te mach'atic mayuc lec yipic.

¹⁸ Tey nix ya scux yo'tanic a te jchuqueletic, ma xya'iybeyiquix sc'op te jsujawetic ta a'tel.

¹⁹ Tey ayic a te muc' biq'uit, soc colemix tey a te a'bat ta stojol te yajwale.

²⁰ ¿Bin yu'un ya x'a'bot sacal q'uinal te mach'a ay swocol soc te ya x'a'bot scuxlejal te mach'a pich'il yo'tan;

²¹ te mach'atic yac smahliybelic te lajel, pero ma xtal, aunque c'ax hich ya slehic a te bin ut'il nac'bil c'ulejalil;

²² te mach'atic mero tse'el yo'tanic soc ay yutsil yo'tanic yu'un la stahic te muquenal?

²³ ¿Bin yu'un ya x'a'bot scuxlejal te mach'a ma sna' banti ya xbaht, te macbil yu'un Dios te be yu'une?

²⁴ Te c'alal ma to xtal jwe'el a ya jac' co'tan; te jac'jac'-o'tanil cu'un hich ya xbehen te bin ut'il ha'.

²⁵ Talem ta jtojol te bin yac xiwtesbelon, c'oht ta jtojol te bin jxi'oj.

²⁶ ¡Mayuc lamal q'uinal soc mayuc yutsil q'uinal ya ca'iy, ma jta cux-o'tan, ha nax ay wocol! xchi te Job.