Job 25 - Bible in Tzeltal Bachajón

Bildad ya yal mayuc mach'a ya xhalbot te toj yo'tan ta stojol Dios

¹ La sjac' te Bildad te talem ta Súa, hich la yal:

² Te Dios ay yu'el soc ay ta xi'el; ha ya yac' lamal q'uinal ta ch'ulchan.

³ ¿Ya bal xhu' ta ahtayel te soldadohetic yu'une? ¿Mach'a a te ma ba sacuben q'uinal ta stojol yu'une?

⁴ Ha yu'un ¿bin ut'il ya xhu' ya xhalbot te toj yo'tan ta stojol Dios te winique? ¿Bin ut'il c'an lecuc yo'tan te mach'a ayintesot yu'un ants?

⁵ Teme mayuc lec te sts'anabul te u, soc teme ma ba lec sc'oblalic te eq'uetic ta stojol,

⁶ ¿ha'uc to balix a te winic te pajal soc yal ha, te snich'an winic te pajal soc lucum? xchi te Bildad.