Job 22 - Bible in Tzeltal Bachajón

Elifaz ya slehbe smul Job

¹ La sjac' te Elifaz, hich la yal:

² ¿Ya bal xhu' ya xtuhun yu'un Dios te winique? Te mach'a ay sp'ijil, ha nax ya xtuhun yu'un ta stuquel.

³ Te Mach'a spisil ya xhu' yu'un ¿ya bal smulan teme tojat ta winiquil? ¿Ay bal bin ya sta a teme yac atojobtes te be awu'une?

⁴ ¿Ya bal ya'bat castigo yu'un te ha yac awich' ta muc', ya bal yich'at ta c'op yu'un?

⁵ Ha ya ya'bat castigo yu'un te c'ax muc' te amul soc mayuc slajibal te achopolile.

⁶ Mayuc scuentahil a la ac'ambe prenda te awermanotac soc la apojticlambe sc'u'ic te mach'atic mayuc sc'u'ic.

⁷ Ma ba la awa'be ha' yuch' te mach'a luhben soc ma ba la awa'be swe'el te mach'a ay swi'nal.

⁸ ¡Ha'at te winicat te ay awip, la awich'be sq'uinal, ha'at te ich'bilat ta muc' tey nahinat a!

⁹ Mayuc bin la awa'be bahel yich' te me'ba' antsetic soc la awac'ticlambe sc'abic te me'ba' alaletique.

¹⁰ Ha scuentahil te joytaybilat ta lazohetic soc te ya ya'bat xiwel ta ora nax;

¹¹ ayat ta yihc'al q'uinal, hich ma ba yac awil q'uinal, soc bayel snojel ha' ya smucat.

¹² ¿Ma bal ayuc ta stoyolil ch'ulchan te Diose? ¡Ilawil te eq'uetic te toyol ayique, mero toyol ayic!

¹³ Pero ha'at yac awal: ¿Bin ya sna' te Diose? ¿Ya bal xhu' ya ya'iy chahpanwanej ta yihc'al q'uinal?

¹⁴ Potsol ta tocal, ma xhu' ya yil te c'alal yac ta behel ta sjoyobal sti'il ch'ulchan, xchihat.

¹⁵ ¿Ha bal yac at'un te antiguo be, ha te la stuhunic te chopol winiquetic

¹⁶ te chamic te ma to yorahiluc a, te ic'otic bahel hich te bin ut'il yich'o-ip ta snojel ha'?

¹⁷ Hich la yalbeyic te Diose: ¡Ihquitayawotcotic! ¿Bin ya xhu' ya spasbotic te Mach'a spisil ya xhu' yu'un? xchihic.

¹⁸ Pero ha nix te Dios te la snojesbe ta biluquetic te snahique. ¡Namal ayuc ta jtojol te j'ac'-o'tanil yu'unique!

¹⁹ Te mach'atic toj yo'tanic ya yilic, soc tse'el yo'tanic yu'un; te mach'atic mayuc smulic ya stse'layic, hich ya yalic:

²⁰ La yich'ic jinel te jcontratic, soc laj ta c'ahc' te bin hilem yu'unic, xchihic.

²¹ Junuc me awo'tan soc Dios, lamaluc me q'uinal awu'un ta stojol, hich me lec ya xc'ohat.

²² Ich'a te nohptesel te yac yalbele, ac'a ta awo'tan te sc'ope.

²³ Teme yac apehc'an aba soc teme ya suhtat ta stojol te Mach'a spisil ya xhu' yu'un, soc yac aloq'ues ta anahilpac' te bin chopole,

²⁴ teme yac awac' ta ts'u'lum te oro awu'un, teme yac awac' ta tonetic ta uc'um te oro yu'un Ofir,

²⁵ ha oro ya xc'oht awu'un te Mach'a spisil ya xhu' yu'un, ha bayel plata awu'un ya xc'oht.

²⁶ Hich yac amulan a te Mach'a ya xhu' yu'un soc yac ahach asit ta stojol Dios.

²⁷ Yac ac'opon, ha ya ya'iybat ac'op; soc yac apas te bin awaloj ta jamal.

²⁸ Te bin anopoj ta awo'tan, lec ya xc'oht ta loq'uel, soc ya me sacub q'uinal ta behetic awu'un.

²⁹ Teme ay mach'a ya xpehc'anot, ha'at yac awal te ha ta scaj toybahil, como Dios ya scoltay te mach'a peq'uel aye.

³⁰ Ha ya scoltay te mach'a mayuc smul; ya xhil ta libre ta scuenta te mayuc mulil ta sc'ab, xchi te Elifaz.