Job 21 - Bible in Tzeltal Bachajón

Te yutsil slequil soc swocol te mach'atic chopolic

¹ La sjac' te Job, hich la yal:

² A'iya me awa'iyic ta lec te jc'ope, ha'uc me te smuc'ul co'tan ya xc'oht te yac awa'bonic.

³ Cuhchuc me awu'unic, ya xc'opojon; teme laj co'tan ta c'op, labanahic.

⁴ ¿Yacon bal ta yalel jwocol ta stojol winic? Ay scuentahil te xut'ul co'tan.

⁵ Ilawonic, xiwanic yu'un, maca awehic ta ac'ab yu'un.

⁶ Ho'onix xcham co'tan yu'un te c'alal ya jna', ya xnihc te jbaq'uetal yu'un.

⁷ ¿Bin yu'un cuxulic te mach'atic chopol yo'tanic, te ya xmamalubic, te ya yich' xan sc'ulejalic?

⁸ Ya yilic te ya xmuc'ubic te snich'nabic, ay ta stojol sitic te sts'umbalique.

⁹ Mayuc xiwel ta snahic, xuht' mayuc castigo ya x'a'botic yu'un Dios.

¹⁰ Spisil ora ya xnich'naj te torohetic yu'unic, ya xtohc yal te wacaxetic yu'unic, mayuc ya xc'ax yalic.

¹¹ Ya xloq'uic bahel te alaletic yu'unic hich te bin ut'il tuminchijetic, ya xwihlic ta ixta' te yal-snich'anic.

¹² Ya xc'ayojinic yu'un te sc'op te c'ayob soc arpa; tse'el yo'tanic yu'un te sc'op te amay.

¹³ Lec ya xc'ax scuxlejalic soc lamal q'uinal ya ya'iyic a ya xcohic bahel ta stsobojibal mach'atic chamenic.

¹⁴ Hich ya yalbeyic te Diose: ¡Ihquitayawotcotic, ma jc'ancotic snopel te mandariletic awu'une!

¹⁵ ¿Mach'a a te Spisil ya xhu' yu'un te ya cac' jbahtic ta a'batinel yu'une? ¿Bin ya jtahtic a te ya jc'opontique? xchihic.

¹⁶ Pero ma ba ay ta sc'abic te bin ut'il lec ayique. ¡Namal ay ta jtojol te j'ac'-o'tanil yu'un te mach'atic chopolic!

¹⁷ ¿Jayeb buelta tup'en sc'ahq'uic te mach'atic chopolic, te ya xtal jinel ta stojolic, te ya x'a'bot swocolic yu'un te yilimba Dios?

¹⁸ Pajalic soc ac te ya xlichot ta ic', hich te bin ut'il suhlil trigo te ya x'ic'ot yu'un sutu-ic'.

¹⁹ Ay ta halel: Dios ya ya'be stoj yal-snich'nab te smul te sme'stat, te xchihe. ¡Pero Dios ac'a a'botuc stoj yu'un scuenta yu'un hich ya sna'ic a!

²⁰ Ac'a yil ta sitic te sjinel, ac'a yuch'be te yilimba te Mach'a spisil ya xhu' yu'une.

²¹ Te c'alal lajix yorahil ¿bin xan yochel a te bin ya xc'oht ta stojol te mach'atic ay yu'un te hilemic yu'une?

²² ¿Ay bal mach'a ya sp'ijubtes te Diose, te ha nix mach'a ya yilbe ya'tel te mach'atic toyolique?

²³ Ay mach'a ya xcham te c'alal ay to yip a, te lec ay soc te lamal q'uinal ya ya'iy a;

²⁴ buen juhp'en sbaq'uetal, soc nojel ta stutana te sbaquele.

²⁵ Te yane, pich'il yo'tan a ya xcham, mayuc bin ora la ya'iy te bin leque.

²⁶ Pero pajal ya xwayic ta ts'u'lum, soc ya xmucotic ta yal ha.

²⁷ Ya jna' te bin anopoj ta awo'tanic, soc te bin chapal awu'unic ta jcontra.

²⁸ Como hich yac awalic: ¿Banti ay te sna te príncipal, banti ay te snahilpaq'uic banti nahinemic te mach'atic chopol yo'tanic? xchihex.

²⁹ ¿Ma bal ayuc la ajoc'obeyic te mach'a ya xc'axic ta be? ¿Ma bal ayuc awa'iyejic te suhtibe,

³⁰ ha te mach'a chopol yo'tan mayuc bin ya xc'oht ta stojol ta yorahil jinel, te ha canantaybil ta yorahil ilimba?

³¹ ¿Mach'a ya yalbe ta sit te bin yilel te ya'tele? ¿Mach'a ya ya'be stojol te bin la spas?

³² Ya yiq'uic bahel ta muquel, ya scanantaybeyic te smuquenale.

³³ Buhts'an ya ya'iy te ch'uyuy lum; ta spat ya xbaht spisil winiquetic, soc c'ax bayelic te ya xnahilijic bahel yu'un.

³⁴ ¡Mero mayuc scuentahil te yac amuc'ubtesbon co'tan ta ac'opic! Ha nax puro lot te suhtib awu'unique, xchi te Job.