Job 2 - Bible in Tzeltal Bachajón

¹ Ta yan c'ahc'al tal stehc'an sbahic ta stojol Jehová te yal-snich'nab Dios, soc ha nix hich tey tal a te Satanás.

² Hich joc'obot yu'un Jehová te Satanás: ¿Banti talat? xchi sc'oblal. Te Satanás la sjac'be te Jehová: Ayon ta behel ta yocliyel swohlol te bahlumilal, xchi.

³ ¿La bal awil te ca'bat Job te mayuc mach'a yan hich pajal soc ta bahlumilal, te lec soc toj ta winiquil, yich'oj ta muc' te Dios soc mayuc bin chopol ya spas? Soc stalel jun yo'tan, aunque ha'at la awa'bon jlajimbe te bintic ay yu'un ta tojol nax, xchi te Jehová.

⁴ Te Satanás la yalbe te Jehová: ¡Nuhcul ta scuenta nuhcul! Spisil bintic ay yu'un te winic ya yac' yu'un te scuxlejale.

⁵ Pero hacha ac'ab yo'tic, ehchantesbeya sbaquel soc sbaq'uetal, ya me awil teme ma ba ya sbohlc'optayat ta atojol, xchi.

⁶ Te Jehová la yalbe te Satanás: Ilawil, ay ta ac'ab, pero ma me xalajimbe scuxlejal, xchi.

⁷ Ha yu'un te Satanás loc' bahel ta stojol te Jehová, la yehchentes ta c'a'el chin te Job, hahch ta stahn yoc c'alal ta sjol.

⁸ Te Job hucul ta tan a, la stsac xeht'elul oxom yu'un ya sjot' sba a.

⁹ Hich halbot yu'un te yihnam: ¿Stalel bal jun awo'tan a? Halbeya chopol sc'oblal te Dios, chamenix, xchi.

¹⁰ La yal te Job: Pajal ya xc'opojat soc antsetic te ma sna'ic q'uinal. Teme ya quich'tic te bintic lec yu'un Dios, ¿ma bal ha'uc nix hich ya quich'tic te bintic ma lecuc? xchi. Ta spisil ini ma ba la sta smul te Job yu'un te bin la yal.

¹¹ Ay oxtuhl yamigotac te Job, ha te Elifaz te talem ta Temán, Bildad te talem ta Súa, soc Zofar te talem ta Naamat. Te c'alal la ya'iyic spisil te bin wocol c'oht ta stojol, jujutuhl hahchic tal ta slumalic, como schapojic te pajal ya xtal sjoquinic ta sc'asesel swocol soc ta smuc'ubtesbeyel q'uinal ya'iy.

¹² C'alal namal to ayic a, la shach sitic, ma ba la sna'beyic sba te Job, hich hahchic ta tulan oq'uel. Jujutuhl la sch'i'ic snahtil-c'u'ic, soc yoxebalic la sbuhquiyic mohel ts'u'lum ta sjolic.

¹³ La sjoquinic ta huclej ta lum huqueb c'ahc'al soc huqueb ahc'abal. Mayuc mach'a la sjuc ta c'op, como la yilic te mero muc' te sc'uxul swocole.