Job 16 - Bible in Tzeltal Bachajón

Te mel-o'tan yu'un Job

¹ La sjac' te Job, hich la yal:

² Bayel buelta ca'iyejix te c'opetic ini. ¡Ma ba lequil jmuc'ubtesej q'uinalex!

³ ¿Ay bal slajibal te c'ope? ¿Bin scuentahil ta awo'tanic te yac asutbelonic ta c'op?

⁴ Ha nix hichon ya xhu' ya xc'opojon hich te bin ut'il te ha'exe, te ha'uc hich ayex te bin ut'il ayon; ya xhu' ya cal bayel c'opetic ta acontrahic, soc ya xhu' ya jimulan jol ta atojolic.

⁵ Pero ya ca'beyex yip awo'tanic ta scuenta bintic ya cal, soc ya xch'ay sc'uxul awocol yu'un te smuc'ul q'uinal yu'un te jc'op te hichuque.

⁶ Pero aunque ya xc'opojon, ma ba ya xquehchaj yu'un te ban c'ux ya ca'iy, soc teme ma ba ya xc'opojon, ma ba ya yihquitayon.

⁷ Pero yo'tic Dios la slajimbonix quip; la slajimbonix spisil te mach'atic ay cu'un.

⁸ La xuch'ubtesbonix jnuhculel, ha ya yalon te jyahubenale, ha ya xhahch scontrahimbelon te jyahubenal, yu'un ya yac'on ta halel ta jsit.

⁹ La stuch'ticlanon ta yilimba soc la snutson, ya sc'ux ye yu'un scontrahimbelon; jchahp sit ya yilon a te jcontra.

¹⁰ Te winiquetic ya sjam yehic yu'un scontrahimbelonic, la yehchentesbonic jcho, ¡spisilic la stsob sbahic ta scontrahimbelonic!

¹¹ Te Dios la yac'onix ta sc'ab mach'atic jlotetic, la yac' yahlucon ta sc'ab te mach'atic chopol yo'tanic.

¹² Lec ayon a, pero ha la stuch'ticlanon; la stsacon ta jnuc', la sesenon soc la spason ta blanco yu'un.

¹³ Ya sjoytayonic te j'ac't'ilmalte'etic yu'un, ya sjatbon jriñon, ma ba ya sna'bon yo'bolil jba, soc ya smalbon ta lum te jch'a.

¹⁴ Bayel buelta ya yehchenteson, ahnimal ya xtal scontrahinon hich te bin ut'il mach'a ya yac' guerra.

¹⁵ La jts'is ch'ixal pac' ta sba jnuhculel, la jcac' jol ta ts'u'lum.

¹⁶ Siht'em jsit quelaw yu'un oq'uel, ihc'ubenix te sti'il jsit,

¹⁷ aunque mayuc bin chopol jpasoj soc lec la jc'opon te Diose.

¹⁸ ¡Lumq'uinal, ma me xamucbon te jch'ich'ele, soc ma me ayuc banti ya scux yo'tan te caw!

¹⁹ Ayix ta ch'ulchan te testigo-c'op cu'un, te mach'a ya xc'opoj cu'un ay ta toyol.

²⁰ Ya slabanonic te camigotac, pero ya jmal ya'lel jsit ta stojol Dios.

²¹ ¡Te ayuc bin ut'il ya xhu' ya sitin sba ta c'op soc Dios te winic hich te bin ut'il ya xc'opoj jtuhl winic yu'un te yamigo!

²² Che'oxeb xanix ha'bil ya xc'ax te ya xbohon te banti ma xhu' ya suhton tale.