Job 15 - Bible in Tzeltal Bachajón

Elifaz ya shultesbe yo'tan Job

¹ La sjac' te Elifaz te talem ta Temán, hich la yal:

² Te mach'a ay sp'ijil, ¿biluc nax bal bin ya sjac', soc ya bal snojes sch'uht ta q'uixin ic'?

³ ¿Ya bal ya'iy tsaltamba c'op te tojol nax ay, o ta c'opetic te mayuc bin ya xloc' a?

⁴ Pero te ha'ate yac alajimbel te yich'el ta muc' te Diose, soc yac acom te bin ay ta na'ulanel ta stojol Dios.

⁵ Hich ya xc'opojat ta scaj te amule, la atsa te sc'op te jlo'loywanej.

⁶ Ha nix ya yalbat amul te awe, ma ho'ucon; ha nix ac'op te ya yalat ta acontra.

⁷ ¿Ha'at bal nahil ayinemat yu'un te sba winic, o nahil bal ayinemat yu'un te witsiltic?

⁸ ¿Ya bal awa'iy ha'at te bin muquen ay yu'un Dios? ¿Ha'at nax bal ay ap'ijil?

⁹ ¿Bin ana'oj ha'at te ma ba jna'ojcotic te ho'otcotique? ¿Bin c'ohem ta awo'tan te ma ba c'ohem ta co'tancotic te ho'otcotique?

¹⁰ Ay ta cohlilcotic winiquetic te saquix sjolic soc te mero mamaliquix, c'ax hich ya'bilalic a te bin ut'il te atate.

¹¹ ¿Ma bal tic'ucat a te ya smuc'ubtesbat q'uinal awa'iy te Diose, soc te yutsil c'op te ya xhalbotate?

¹² ¿Bin yu'un namal ya yac'at te awo'tan, bin yu'un yac amuts'ilan asit,

¹³ te yac awihlintay te Diose, soc te hich yac awale?

¹⁴ ¿Bin a te winic, te lec ya xhu' ya xc'oht, te ya xhalbot mayuc smul te mach'a ya x'ayintesot yu'un ants?

¹⁵ Teme Dios ma ba ya smuc'ulin yo'tan te ch'ul a'batetic yu'un, ni ha'uc c'ax lec ya yil te ch'ulchan,

¹⁶ ¿ha'uc to balix a te winic te bohloben soc chopol, te ya yuch' te mulil hich te bin ut'il ha'?

¹⁷ A'iybon awa'iy jc'op, ho'on ya ca'bat awil, ya calbat awa'iy te bin quiloj,

¹⁸ ha te bin la yalbotic te mach'atic ay sp'ijilic, te mayuc bin la smuquic te bin a'bot sna'ic yu'un te sme'statique,

¹⁹ te ha'ic nax a'botic te q'uinal, soc te mayuc jtuhluc jyanlum te c'ax ta yohlilic.

²⁰ Te chopol winic ay sc'uxul swocol te jayeb c'ahc'al cuxul ta q'uinal, te jayeb ha'biletic te chahpambil yu'un te j'uts'inwanej.

²¹ Ay bin xnilet ya ya'iy ta schiquin te xiweltic sba; te c'alal lamal q'uinal ya ya'iy, ya xtal te jlajinwanej ta stojol.

²² Ma xch'uhun te ya suht loq'uel ta yihc'al q'uinal, ha ac'bil te ya xlaj ta espada.

²³ Bayuc ya xbaht ta slehel swe'el, hich ya yal: ¿Banti ay? xchi. Sna'oj te nopol ya xlaj.

²⁴ Ha ya xiwtesot yu'un te wocol soc mel-o'tan, hich ya xcontrahinot yu'unic te bin ut'il ajwalil te chapal yu'un guerra,

²⁵ como la shach sc'ab ta scontrahinel te Diose, la stoy sba ta stojol te Mach'a spisil ya xhu' yu'un;

²⁶ ste'anej snuc' ta ahnimal ta scontrahinel soc stulan mahquil yu'un guerra.

²⁷ Aunque mero juhp'en te sit yelaw, soc weq'uel sjuhp'el sch'uht,

²⁸ ya xnahin ta pueblohetic te jihnemic, ta nahetic te ihquitaybilic soc quechelic ta jinel.

²⁹ Ma ba ya xc'ulejub soc ma ba ya xhalaj te sc'ulejal, ma ba ya xpuhc ta q'uinal te bintic ay yu'un.

³⁰ Ma ba ya xcol loq'uel ta yihc'al q'uinal; ya xtaquij spuhl yu'un yat c'ahc' soc ya x'ehanot bahel ta yic'al ye Dios.

³¹ Ma me ha'uc ya smuc'ulin yo'tan te bintic mayuc scuentahil, como ha nax lo'loyel ya sta a.

³² Te c'alal ma to sta yorahil a ya me x'a'bot stojol, ma ba ya xyaxub te spuhle.

³³ Pajal ya xc'oht soc syaxal ts'usub te ya xluhbaj, pajal soc te olivo te ya xluhbaj te sniche.

³⁴ Como te jtsohb yu'un te mach'atic chopolic mayuc sts'umbalic ya xhil ta q'uinal, soc ya xlaj ta c'ahc' te sna te mach'a hich nax stahoje.

³⁵ Ya swolic te bin chopol, ya yayintesic mulil, ta yo'tanic ya xhahch lo'loyel, xchi te Elifaz.