Job 13 - Bible in Tzeltal Bachajón

Job ya yal ya xchicnaj te mayuc smul

¹ Spisil ini, ho'on nix quiloj ta jsit, soc la jca'iy ta jchiquin soc la jna'be scuentahil.

² Te bin ana'ojic, ha nix hich jna'oj te ho'one; ma ba peq'uel ayon awu'unic.

³ Pero ha ya jc'an ya xc'opojon soc te Mach'a spisil ya xhu' yu'un, co'tanuc ya juc ta c'op soc te Diose.

⁴ Te ha'exe yac anaq'uic ta lot te bin melel; apisilic jpoxtaywanejex te ma xtuhunique.

⁵ ¡Te yacuc xch'abex ta c'op, ha ap'ijilic ya xc'oht te hichuque!

⁶ A'iybon awa'iyic te jc'ope, a'iya awa'iyic te bin ya cale.

⁷ ¿Ya bal awalic bin chopol ta scuenta scoltayel te Diose? ¿Ya bal awa'iyic lot ta scuenta?

⁸ ¿Ya bal acoltayic ta c'op te Diose? ¿Ya bal xc'opojex yu'un?

⁹ ¿Lec bal ya xc'ohex te ha'uc ya yilbeyex awo'tanic? ¿Ya bal alo'loyic hich te bin ut'il ya xlo'loyot te winique?

¹⁰ Ya me stijex ta c'op teme tsahbil nax mach'a yac ac'uxultay.

¹¹ ¿Ma bal yacuc xiwtesex te yutsilal? ¿Ma bal yacuc xtal ta atojol te xiwel yu'une?

¹² ¡Te p'ijil c'op awu'unic ha p'ijil c'op yu'un tan, soc te ts'ahquetic awu'unic ha ts'ahquetic te pasbilic ta ahch'al!

¹³ Ch'abanic ta jtojol, ya xc'opojon; ac'a taluc ta jtojol te bin ya xtale.

¹⁴ ¿Bin yu'un ya jti' loq'uel te jbaq'uetal, soc ya cac' jcuxlejal ta jc'ab?

¹⁵ Aunque ya smilon, ha smuc'ulinej co'tan te Diose. Ya jcoltay jba ta stojol, ya calbe te lec te behetic cu'un,

¹⁶ ha nix Dios ya scoltayon, como ma xhu' ya x'och ta stojol te mach'a chopol yo'tan.

¹⁷ A'iybon me awa'iyic ta lec te bin ya cal, ac'a ochuc ta achiquinic te jc'ope.

¹⁸ Yo'tic, chapalix te bin ya cale; ya jna' te ya quich' halbeyel te mayuc jmul.

¹⁹ ¿Mach'a a te ya slehbon jmul? Teme aye, ya xch'abon ha to c'alal ya xchamon.

²⁰ Ha nax cheb bin ya jc'ambat ta atojol, hich ma ba ya jnac' jba ta atojol a:

²¹ Loq'uesa ac'ab ta jtojol, soc ma xawa'bon jxi' te xiwel awu'une.

²² Ic'awon, ya jac'bat; o ac'a te ho'on ya xc'opojon, ha'at yac ajac'bon.

²³ ¿Jayeb te bin chopol jpasoj soc jayeb te jmule? A'bon jna' banti jc'axuntayej mandar soc a'bon jna' te jmule.

²⁴ ¿Bin yu'un yac anac' asit ta jtojol soc te ha acontra yac acuyon?

²⁵ ¿Ya bal awuts'in te ya'binal te' lichbil ta ic', ya bal anuts taquin ac?

²⁶ Yac ats'ihbay ta jcontra te xut'ul q'uinal ya ca'iy, soc yac apasbon ta jcuenta te muliletic cu'un c'alal queremon to a.

²⁷ Yac awotsesbon coc ta hotbil te', yac atsahtay awil spisil te behetic cu'un, yac ap'is ban c'alal ya xc'oht te stahn coc.

²⁸ Yaconix ta uhlel hich te bin ut'il te bin yac ta c'a'el, hich te bin ut'il c'u'ul te ya xlaj ta joch'obel ta chane.