Job 11 - Bible in Tzeltal Bachajón

C'opoj Zofar

¹ La sjac' te Zofar te talem ta Naamat, hich la yal:

² ¿Ma bal yacuc sc'an suhtib te bayel c'opetic ini? Te mach'a bayel ya xc'opoj ¿hich bal toj ya xc'oht a?

³ ¿Ya bal yac' ch'abuc winiquetic te bin ut'il bayel ya xc'opojat? ¿Ya bal awa'iy labanwanej, te mayuc mach'a ya stsitsat yu'une?

⁴ Ha'at yac awal: Toj te snopojibal cu'un, soc mayuc jmul ta atojolic, xchihat.

⁵ ¡Te ha'uc ya xc'opoj te Diose, te ha'uc ya sc'oponat

⁶ soc ya yalbat bintic muquen ay yu'un te p'ijil-o'tanil, te wocol ta na'beyel scuentahil! Hich yac ana' a te ma hichuc la ya'bat castigo te Dios te bin ut'il ya sc'an te amule.

⁷ ¿Ya bal xhu' yac ana'be scuentahil te bintic muquen ayic yu'un te Diose? ¿Ya bal xhu' awu'un stahel te c'ax lec stalel te Mach'a spisil ya xhu' yu'une?

⁸ C'ax hich stoyolil a te bin ut'il te ch'ulchane: ¿Bin yac apas yu'un? C'ax hich sc'ubulil a te bin ut'il te stsobojibal mach'atic chamenic: ¿Bin ya xhu' awu'un sna'el?

⁹ C'ax hich snahtil a te bin ut'il te q'uinal, soc c'axem hich sjamalil a te bin ut'il te mar.

¹⁰ Teme ya xc'ax te Dios soc ya xchucawan, teme ya x'ic'awan ta chahpajibal, ¿mach'a ya xhu' ya scom?

¹¹ Ya sna'be sba te jlo'loywanej winiquetic; c'alal ya yil te bin chopol ¿ma bal yacuc yich' ta cuenta?

¹² Ya me sta sp'ijil yo'tan te sonso winic te bin ora te ha'mal burra ya yayintes jtuhl winic.

¹³ Teme toj yac awac' awo'tan, soc teme yac ahach ac'ab ta stojol te Diose;

¹⁴ teme ay smul te ac'ab, soc teme yac ach'ay hilel, teme ma ba yac awac' ayinuc ta ana te bin ma stojiluc,

¹⁵ hich ma xq'uexawat te yac ahach asit, ay me awip soc mayuc bin yac axi'.

¹⁶ Ya me ach'ay ta awo'tan te awocole, yac ana' awocol hich te bin ut'il ha' te c'axem bahele.

¹⁷ Te acuxlejal c'ax hich sacal ya xc'oht a te bin ut'il ohlil c'ahc'al; aunque ya x'ihc'ub q'uinal hich ya xc'oht te bin ut'il sacubel q'uinal.

¹⁸ Jun me awo'tan, como ay smuc'ul awo'tan; yac awil ta ajoyobal, jun awo'tan ya xwayat.

¹⁹ Ya xwayat, mayuc mach'a ya xiwtesat; soc bayel mach'atic ya sc'ambat coltayel.

²⁰ Yan te sit te mach'atic chopolic ya me xtup'; ma ba ya stahic banti ya snac' sbahic, soc ta spisil bin ya smahliyic ha te slajibal jac'-o'tanil, xchi te Zofar.