Job 10 - Bible in Tzeltal Bachajón

Job ya smel yo'tan yu'un swocol

¹ ¡C'axix co'tan yu'un te jcuxlejal! Jamal ya cal te ahcan cu'un, ya me xc'opojon ta scuenta te xut'ulil q'uinal ya ca'iy.

² Hich ya calbe te Dios: Ma me xawal te ay jmul; a'bon jna' te bin yu'un te yac atijbelon ta c'op.

³ ¿Lec bal yac awa'iy te yac awuts'inon, te yac ap'aj te ya'tel ac'ab, soc te lec awo'tan yu'un te bin snopoj te mach'atic chopolique?

⁴ ¿Hich bal asit te bin ut'il ch'ich'-baq'uet? ¿Hich bal yac awil te bin ut'il ya yil te winique?

⁵ Te c'ahc'aletic awu'un ¿pajal bal soc te c'ahc'aletic yu'un te winique? Te ha'biletic awu'un ¿pajal bal soc te ha'biletic yu'un te ants-winic,

⁶ yu'un yac ajoc'oy te falta cu'un, soc yac ale te jmule,

⁷ aunque ana'oj te mayuc jmul, soc te mayuc mach'a ya xhu' ya scoltayon ta ac'ab?

⁸ Ha'at nix ac'ab te la spason soc la schahpanon; ¿yo'tic bal yac asuht aba soc yac alajinon?

⁹ Na'a me te la achahpanon hich te bin ut'il ahch'al; ¿ya bal asutp'inon ta ts'u'lum?

¹⁰ ¿Ma bal lajuc amalon hich te bin ut'il leche, soc hich te bin ut'il queso te la ataquijteson?

¹¹ La awa'bon jlap nuhcul soc baq'uet, soc la ajalon ta baquetic soc chihetic;

¹² la awa'bon jcuxlejal soc c'uxultayel, soc la scanantaybon jch'uhlel te canantayel awu'un.

¹³ Pero ay bin amacoj ta awo'tan, jna'oj te bin ay ta awo'tan:

¹⁴ yac awil teme la jta jmul, ma ba yac awal te mayuc jmul.

¹⁵ Teme chopolon, ¡ay me jwocol! teme tojon ta winiquil, ma ba ya jach te jole, c'axix co'tan ta q'uexlal soc yac quilbel jwocol.

¹⁶ Teme ya jach te jole, ha'at yac anutson hich te bin ut'il choj, soc yac apas jchahp a'teliletic ta jcontra.

¹⁷ Yac awach'ubtes pruebahetic ta jcontra, yac atoy xan awilimba ta jtojol, soc yac acontrahinon soc jchahp yach'il soldadohetic.

¹⁸ ¿Bin yu'un la aloq'ueson ta ch'uhtul? Lec te chamucon, te mayuc mach'a la yilon.

¹⁹ Lec te ayuc bin ut'il ma ba chicnajon, te ic'otucon loq'uel ta ch'uhtul c'alal ta muquenal.

²⁰ ¿Ma bal jtebuc nax te c'ahc'aletic cu'un? ¡Tic'uquix a! ihquitaywon scuenta yu'un ya jmuc'ubtesbe jba q'uinal ca'iy

²¹ te ma to xbohon te banti ma ba ya suhtonix tal, ta ihc'al q'uinal soc ta axinal yu'un lajel,

²² ta pimil ihc'al q'uinal soc te banti mayuc bin toj ay, hich te bin ut'il axinal yu'un lajel te hich xanix ay, te banti pajal soc pimil yihc'al q'uinal te sacal q'uinale, xchi te Job.