Job 1 - Bible in Tzeltal Bachajón

Swocol Job

¹ Ta sq'uinal Uz ay jtuhl winic Job sbihil, lec soc toj yo'tan ta winiquil, yich'oj ta muc' te Dios soc mayuc bin chopol ya spas.

² Ayin huqueb squerem-nich'nab soc oxeb yantsil-nich'nab.

³ Ay lajunwinic swaxaclajunbahc' (7,000) tuminchijetic, lajunwinic swaxacbahc' (3,000) camellohetic, ho'winic scha'bahc' (500) ta chahp j'a'tel-wacaxetic, ho'winic scha'bahc' (500) me' burrahetic soc bayel a'batetic yu'un. Ha te winic te c'ax hich muc' sc'oblal a te bin ut'il spisil te yantic ayic ta stojol banti ya xloc' tal c'ahc'al.

⁴ Te snich'nab ya spasic q'uinetic ta snahic, jujutuhl ta sc'ahc'alel; ya sticonic ta iq'uel te oxeb yantsilelic yu'un ya sjoquinic ta we'el uch'el.

⁵ Ta jujun buelta te ya xlaj te q'uin yu'unic, te Job ya sticon ta iq'uel soc ya slecubtesbe sc'oblalic. Ya xhahch ta sab, ya yac' scohtol chic'bil mahtaniletic ta scuenta jaytuhlic, yu'un hich ya yal te Job: Ay wan la sta smulic te jnich'nab soc ay wan la slabanic Dios ta yo'tanic, xchi. Hich la spasulan ta spisil ora.

⁶ Ay jun c'ahc'al te tal stehc'an sbahic ta stojol Jehová te yal-snich'nab Dios, soc ha nix hich tal tey a te Satanás.

⁷ Hich joc'obot yu'un Jehová te Satanás: ¿Banti talat? xchi sc'oblal. Te Satanás la sjac'be te Jehová: Ayon ta behel ta yocliyel swohlol te bahlumilale, xchi.

⁸ ¿La bal awil te ca'bat Job te mayuc mach'a yan hich pajal soc ta bahlumilal te lec soc toj ta winiquil, te yich'oj ta muc' te Dios soc mayuc bin chopol ya spas? xchi te Jehová.

⁹ Te Satanás la sjac'be sc'op te Jehová: ¿Yu'un bal tojol yich'oj ta muc' Dios te Job?

¹⁰ ¿Ma bal ajoytayej soc te mach'atic ay yu'un soc te bintic ay yu'une? Awa'beyej bendición spisil te ya'tel, ha yu'un te bayel p'ohlem te bintic ay yu'un ta q'uinal.

¹¹ Pero te yacuc ahach ac'ab yo'tic ta spojbeyel spisil te bintic ay yu'une, ya me awil teme ma ba ya sbohlc'optayat ta atojol, xchi.

¹² Te Jehová la yalbe te Satanás: Ilawil, ay ta ac'ab spisil te bintic ay yu'un; ha nax ma me xawac' bahel ac'ab ta stojol stuquel, xchi. Hich loc' bahel te Satanás ta stojol Jehová.

¹³ Ay jun c'ahc'al c'alal yacalic ta we'el soc ta yuch'el vino ta sna smuc'ul banquilic a te squerem-nich'nab soc yantsil-nich'nab Job,

¹⁴ tal jtuhl winic ta stojol Job, hich c'oht ta halbeyel yu'un: Te c'alal yacalic ta a'tel ta arado a te j'a'tel-wacaxetic soc yacalic ta we'el ta nopol a te me' burrahetic,

¹⁵ ochintayotic yu'un te sabeohetic, la yelc'anic bahel te chambahlametic soc la smilic hilel ta espada te a'batetic; ho'on xanix colon hilel te tal calbat awa'iy, xchi.

¹⁶ Yac to ta c'op a, tal yan te hich c'oht yal: Co tal c'ahc' yu'un Dios ta ch'ulchan te la schic' te tuminchijetic soc te jcananetic yu'unic; ho'on xanix colon hilel te tal calbat awa'iy, xchi.

¹⁷ Yac to ta c'op a, tal yan te hich c'oht yal: Te caldeohetic oxchahp la yac' sbahic, la yochintayic soc la yelc'anic bahel te camellohetic, soc la smilic ta espada te a'batetic; ho'on xanix colon hilel te tal calbat awa'iy, xchi.

¹⁸ Yac ta c'op a tal yan te hich c'oht yal: Te aquerem-nich'nab soc te awantsil-nich'nab yacalic ta we'el soc yuch'el vino ta sna te smuc'ul banquilalic,

¹⁹ tal tulan ic' ta stojol jochol taquin q'uinal te la smaj schanxuhcul te na, yahl cohel ta sbahic, hich chamic. Ho'on xanix colon hilel te tal calbat awa'iy, xchi.

²⁰ Ha yu'un te Job la stehc'an sba, la sch'i' snahtil-c'u', la sjoch stsotsel sjol yu'un, la squejan sba ta lum, la sch'uhuntay,

²¹ hich la yal: Watalon a la yayinteson jnan, watalon a ya suhton bahel. Jehová la yac', Jehová la sloq'ues. ¡Bayeluc me yutsil sbihil te Jehová! xchi.

²² Ta spisil ini ma ba la sta smul te Job soc ma ba la ya'be smulin te Diose.