Jeremías 50 - Bible in Tzeltal Bachajón

Sc'op-jalwanej ta stojol Babilonia

¹ Te sc'op Jehová te la yal ta scuenta te jalwanej Jeremías te la yalbe sc'oblal te Babilonia, te sq'uinal te caldeohetique:

² Pucahic ta halel ta stojol te nacionetic, a'beya sna'ic; toyahic bandera, halbeyahic sc'oblal, ma me xamuquic, hich me xawal: ¡Och ta c'abal te Babilonia! ¡Ay ta q'uexlal te Bel! ¡Nojel ta xiwel te Marduc! La yich'ic q'uexlaltesel te loc'ombahetic yu'un, jimbilic te sloc'ombahic, xchihex me.

³ Como ta norte ya xmo tal jun nación te ya scontrahin, te jochol ya yihquitay hilel te sq'uinale. Mayuc ants-winic ni chambahlam te ya xnahinic tey a, spisilic bahtic ta ahnel.

⁴ Ta hich sc'ahc'alel, ta hich ora, xchi te Jehová, ya xtalic te yal-snich'nab Israel soc te yal-snich'nab Judá, yacalic ta oq'uel a ya xtal slehic te Jehová te Dios yu'unique.

⁵ Ya me sjoc'oyic bahel te sbehlal Sión, tey ya stojlinic bahel a, hich ya yalic: Conic, junax ya cac' jbahtic soc te Jehová ta scuenta chapbil-c'op te sbahtel q'uinal ay, te ma xch'ay ta o'tanil, xchihic me.

⁶ Te pueblo cu'un hich ayic te bin ut'il tuminchijetic te ch'ayemic, howiytesotic ta be yu'un te jcanan yu'unique, ac'otic hilel yu'un ta witsiltic. Bayuc behenic bahel ta yantic witsiltic, ch'ay ta yo'tanic te corral yu'unique.

⁷ Lajinotic yu'un spisil te mach'atic tahotic yu'une; hich la yalic te scontratac: Ma jmulticuc ho'otic, como ha la sta smulic ta stojol Jehová, te banti ya xnahin te bin stojil ta pasel, te ha smuc'ul yo'tanic te sme'static, xchihic.

⁸ Loc'anic ta ahnel ta Babilonia, loc'anic tal ta sq'uinal caldeohetic, hich ya xc'ohex te bin ut'il tat tentsunetic te nahil ya xbahtic ta stojol te jtsohb tentsunetique.

⁹ Como ya jtij hahchel jtsohb muc'ul nacionetic ta stojol norte te ya xtal scontrahinic Babilonia. Tey ya xchahpan sbahic ta ya'beyel guerra a, ya me stsalic. Te ya'tejibal st'ihmalte'ic pajal soc ya'tejibal st'ihmalte'ic te mach'atic ya sna'ic ta lec guerra, te ma ba jochol sc'ab ya suhtic talel.

¹⁰ Ya yich' pojbeyel sbiluc te Caldeo; spisil te mach'atic ya spojic, tic' ya xloq'uic a, xchi te Jehová.

¹¹ Como tse'el awo'tanic soc ay yutsil q'uinal la awa'iyic a c'alal la apojic te bintic ay cu'un, wihlex hich te bin ut'il tut wacax ta aquiltic, soc x'ilajanex hich te bin ut'il cawuhetic,

¹² pero bayel ya xq'uexaw te ananic, ya xpehc'anot te mach'a la yayintesex. Ha peq'uel ya xc'oht yu'un spisil te nacionetic, ha taquin q'uinal, taquin lum, jochol taquin q'uinal ya xc'oht.

¹³ Ta scaj yilimba Jehová mayuc mach'a ya xnahin tey a, jc'axel jochol ya xhil. Spisil te mach'atic ya xc'axic bahel ta stojol Babilonia xcham yo'tanic soc ya slabanic yu'un te swocole.

¹⁴ ¡Chola abahic ta sjoyobal te Babilonia, apisilic te ay at'ihmalte'ic! ¡T'imahic bahel ta stojol, ma me ayuc ya'tejibalul t'ihmalte' ya xhil awu'unic, como la sta smul ta stojol Jehová!

¹⁵ ¡Awtayahic ta sjoyobal! ¡La yac' sba ta c'abal! ¡Yahlix cohel te bahlal ts'ahquetic yu'un, jihnix cohel te ts'ahquetic yu'une! ¡Ha te spacol yu'un Jehová! A'beyahic spacol; pasbeyahic hich te bin ut'il la spas.

¹⁶ Lajina ta Babilonia te mach'a ya ya'iy ts'umbajel soc te mach'a ya sboj ta hoz ta yorahil stsobeyel sit. Ta stojol te espada yu'un te j'uts'inwanej jujutuhl ya suht bahel ta slumal, jujutuhl ya x'ahn bahel ta sq'uinal.

¹⁷ Te Israel ha jtsohb tuminchijetic te puhquemic ta bayuc yu'un chojetic. Ha nahil lajinotic yu'un te ajwalil yu'un Asiria; ta slajibal wac'ticlambot sbaquel yu'un Nabucodonosor ajwalil yu'un Babilonia.

¹⁸ Ha yu'un hich yaloj te Jehová, te Dios yu'un Israel: Ya ca'be castigo te ajwalil yu'un Babilonia soc te slumale, hich te bin ut'il la jca'be castigo te ajwalil yu'un Asiria.

¹⁹ Ya quic' xan suhtel tal ta sq'uinal te Israel, ya swe'be yacul ta Carmelo soc ta Basán, ya xnoj sch'uht ta witsiltic yu'un Efraín soc ta Galaad.

²⁰ Ta hich ora, xchi te Jehová, ya yich' lehel te schopolil te Israel, pero ma ba ya xchicnajix; soc ya yich' lehel te smul te Judá, ma ba ya xtahbot; yu'un ya jpasbe perdón te mach'atic cuxul ya xhilic cu'une.

²¹ ¡A'beyahic guerra te Merataim, soc te mach'atic nahinemic ta Pecod! Milticlana, jc'axel lajinlana, xchi te Jehová, pasa spisil te bintic la jcalbat ta mandar.

²² ¡Chican sc'op guerra ta q'uinal, soc sc'op muc'ul jinel!

²³ ¡Ilawil bin ut'il laj soc wac' te martillo yu'un swohlol bahlumilal! ¡Ilawil bin ut'il c'atp'uj te Babilonia ta bin xiweltic sba ta yohlil te nacionetique!

²⁴ La jca'bat ayacol, Babilonia, ma ba la ana' te tey ochat a. La awich' tahel soc tsaquel, como la ahachbe yo'tan te Jehová.

²⁵ Te Jehová la sjambe yawil te a'tejibaletic yu'un guerra, la sloq'ues tal te a'tejibaletic yu'un te yilimba, como te Jehová te Dios te scuentahinej spisil ay ya'tel te ya spas ta sq'uinal te caldeohetique.

²⁶ La'ic ta bayuc ta ya'beyel guerra, jambeyahic te nahetic yu'un swe'elic, busanahic hilel hich te bin ut'il busul jimbil nahetic, jinahic ta jc'axel; ¡ma me ayuc bin ya xhil!

²⁷ Milbeyahic spisil te torohetic yu'un, ac'a bahtuquic ta milojibal, ¡Obol sbahic! ¡C'ohtix yorahilic, yorahilix te castigo yu'unique!

²⁸ Ya xchicnaj sc'op te mach'atic loq'uic ta ahnel ta sq'uinal Babilonia, yu'un ya yalbeyic ta Sión sc'oblal te spacol a'botic yu'un Jehová te Dios cu'untic, te a'botic spacol yu'un te templo yu'une.

²⁹ Ic'ahic tal ta scontrahinel Babilonia j'ac'-t'ihmalte'etic, spisil mach'atic ya yaq'uic t'imalte'; joytayahic ta sjoyobal, ma me ayuc mach'a ya xcol loq'uel. A'beyahic stoj chican bin yilel te ya'telic; ha chican bin la spas, hich me yac apasbe, como la shachbe yo'tan te Jehová, te Ch'ul Dios yu'un Israel.

³⁰ Ha yu'un te queremetic yu'un ya me xlajic ta plazahetic, spisil te winiquetic yu'un guerra ya xlajic ta hich ora, xchi te Jehová.

³¹ Jcontrahinejat, ha'at jtoybahat, xchi te Cajwaltic, te Jehová te scuentahinej spisil; como c'ohtix aworahil, te yorahil te ya ca'bat castigo.

³² Te mach'a toyba ya me sc'ohchin yoc soc ya me xyahl, mayuc mach'a ya xhahchot yu'un. Ya me ca'be sc'ahc'al te pueblohetic yu'un, ya me jlajin ta c'ahc' spisil sjoyobal, xchi.

³³ Hich yaloj te Jehová te scuentahinej spisil: Uts'inot te pueblo yu'un Israel soc te pueblo yu'un Judá; spisil te mach'atic ic'otic ta chuquel yu'unic tulan tsacotic yu'unic, ma ba la yaq'uic ta libre.

³⁴ Pero te j'ac'aw ta libre yu'unic ha te mach'a ay yip; ha Jehová te scuentahinej spisil te sbihile. Ha me ya xc'opoj yu'unic scuenta yu'un ya ya'be scux yo'tan te q'uinal soc yu'un ya ya'be xiwel te mach'atic nahinemic ta Babilonia, xchi.

³⁵ Ac'a yich'ic contrahinel yu'un espada te caldeohetic, xchi te Jehová, soc te mach'atic nahinemic ta Babilonia, soc te príncipaletic soc te p'ijil winiquetic yu'une.

³⁶ Ac'a yich'ic contrahinel yu'un espada te jna'ojeletic, hich sonso ya xc'ohtic; ac'a yich'ic contrahinel yu'un espada te mach'atic ay yipic, hich ya yich'ic lajinel.

³⁷ Ac'a yich'ic contrahinel yu'un espada te cawuhetic soc te carretahetic yu'unic, soc spisil te jyanlumetic te ay ta yohlil, hich ya xc'ohtic te bin ut'il antsetic; Ac'a yich'ic contrahinel yu'un espada te sc'ulejalic, ya me yich'ic pojbeyel te sbiluquic.

³⁸ Ac'a taquijuc te ha'etic yu'un, ya me xtaquijic; como ha sq'uinal loc'ombahetic, ya sohc sjolic yu'un te loc'ombahetic yu'unique.

³⁹ Ha yu'un tey ya xnahinic ta jochol taquin q'uinal ti'awal chambahlametic soc ha'mal ts'i'etic, soc tey ya xnahinic a te avestruz-mutetique. Mayuquix bin ora te ay mach'atic ya xnahinic tey a ta cajalcaj ts'umbalil.

⁴⁰ Hich te bin ut'il jinot yu'un Dios te Sodoma soc Gomorra soc te pueblohetic ta sjoyobalic, xchi te Jehová, hich mayuc mach'a ya xnahinic tey a, ni jtuhluc mach'a ya xnahin tey a.

⁴¹ Ilawil, ya xtalic soldadohetic ta stojol norte, jun muc'ul nación soc bayel ajwaliletic ya xhahchic tal ta sti'il te q'uinale.

⁴² Chapalic soc t'ihmalte' soc lanza; ha j'uts'inwanejetic soc mayuc sc'uxul yo'tanic. Te sc'opic hich te bin ut'il sc'op yip mar, cajajtic ta cawu. ¡Hich scholoj sbahic te bin ut'il winiquetic yu'un guerra ta scontrahinelat, yantsil-nich'anat Babilonia!

⁴³ Te ajwalil yu'un Babilonia la ya'iybe sc'oblal, laj yip sc'ab yu'un, u'untayot yu'un tulan mel-o'tan soc sc'uxul hich te bin ut'il ants te ya x'alaj.

⁴⁴ Hich te bin ut'il ya xloc' tal choj ta pimil q'uinal yu'un Jordán soc ya xbaht ta yaxal c'unil ha'maletic, ora nax ya cac' ahnuc loq'uel tey a te Edom, soc ya cac' tey a te mach'a tsahbil cu'une, como ¿mach'a pajalon soc? ¿Mach'a ya xhu' ya stsalon? ¿Mach'a jcanan-tuminchij te ya xhu' ya scontrahinon?

⁴⁵ Ha yu'un a'iya awa'iyic te bin schapoj te Jehová ta stojol Babilonia, te bin snopoj te ya spasbe te mach'atic nahinemic ta Temán. Ya me stasic bahel te tut tuminchijetic yu'un te jtsohb tuminchijetic, pajal ya slajinic soc te yaxal aquiltic yu'unique.

⁴⁶ Ya xnihc te q'uinal yu'un te sc'op te stsalel te Babilonia, te aw yu'un ya xchicnaj ta yohlil te nacionetique, xchi.