Jeremías 5 - Bible in Tzeltal Bachajón

Ma ba ya sch'uhunic Dios Jerusalén soc Judá

¹ Behenanic ta callehetic yu'un Jerusalén, ila me awilic ta lec, nopa awa'iyic, lehahic ta plazahetic; teme yac atahic jtuhluc te ya spas te bin toj, te ya sle te bin smelelil, yu'un ya jpasbe perdón.

² Aunque ya yalic: Yiloj Jehová, te xchihique, ma meleluc ya yalic ta jamal, xchi te Jehová.

³ Jehová, ¿ma bal yacuc yil asit te bin melele? La amajticlan, pero ma ba c'ux la ya'iyic; la alajinlan, pero ma ba la sc'anic tojobtesel. La stulantes sit yelawic c'ax hich a te bin ut'il ton, ma ba la sc'an la suhtes yo'tanic.

⁴ La jcal ta co'tan: Melel ha pobrehetic ini, sohquem sjolic, ma sna'beyejic sba te be yu'un Jehová, te bin ya sc'an te Dios yu'unique.

⁵ Ya xbaht jc'opon te mach'atic muc' sc'oblalic, como ya sna'ic te be yu'un Jehová, te bin ya sc'an te Dios yu'unique, xchihon. ¡Pero ha'ic nix la swuyic te yugo, la stuch'ticlanic te schucojbilique!

⁶ Ha yu'un ya xmilotic yu'un choj ta montaña, ya xlajinotic yu'un ha'mal ts'i' ta jochol taquin q'uinal, ay c'an bo'olay choj te ya spahcan sba ta nopol te pueblohetic yu'unic. Mach'ayuc a te ya xloc' tal ya xbutsticlanot yu'un, como bayel te stoybahilic, bayel banti ch'ayemic.

⁷ Hich ya yal te Jehová: ¿Bin ut'il ya jpasbat perdón yu'un spisil ini? Te anich'nabic la yihquitayonic, soc la yalic ta jamal ta scuenta te bin ma diosuc. La jcac'ticlambe spisil te bintic tuhun yu'unic, pero la ya'iyic antsiwej soc la stsob sbahic ta sna j'antsinel antsetic.

⁸ Hich ayic te bin ut'il cawuhetic te bayel swe'elic soc te ya sc'an ya xcuchawanic, jujutuhl x'i'i'et ta st'unel te yihnam spat-xuhc.

⁹ ¿Ma bal yacuc ca'be castigo yu'un? xchi te Jehová. Te jun nación hich te bin ut'il ini ¿ma bal yacuc ca'be spacol?

¹⁰ C'axanic bahel ta chohlochohl te sts'usubilic, jinticlanahic; pero ma jc'axeluc xajin. Jepticlambeyahic te sc'abc'ab, como ma yu'unuc Jehová.

¹¹ Te sts'umbal Israel soc te sts'umbal Judá jc'axel ma ba jun yo'tanic ta jtojol, xchi te Jehová.

¹² La smuc ta yo'tanic te Jehová; la yalic: Mayuc te Diose. Mayuc bin chopol ya xtal ta jtojoltic, ma ba ya quiltic espada o wi'nal, xchihic.

¹³ Te jalwanejetic hich ayic te bin ut'il ic', ma ba yich'ojic te c'ope; te bin hich ya yalic hich ac'a c'ohtuc ta pasel ta stojolic.

¹⁴ Ha yu'un hich ya yal te Jehová te Dios te scuentahinej spisil: Te bin ut'il hich la yalic, ya cac' jc'op ta awe hich ya xc'oht te bin ut'il c'ahc', soc te pueblo ini hich ya xc'oht te bin ut'il si' te ya xchic'ot yu'un.

¹⁵ Sts'umbalex Israel, ya quic' tal ta atojol jun nación te namal ay, xchi te Jehová; jun nación te ay yip soc te nameyix, te ma xana'beyic sc'op, ma xawa'iy te bin ya yalique.

¹⁶ Te ya'tejibal t'ihmalte' yu'unic hich c'ohemic te bin ut'il muquenal te jamal ay; spisilic ay yipic yu'un guerra.

¹⁷ Ya me slajimbat te sit ats'un-awawal soc te we'elil awu'un, ya slajimbat aquerem-nich'nab soc awantsil-nich'nab; ya me slajimbat te tuminchijetic soc wacaxetic awu'un, te ts'usubiletic soc te higuerahetic awu'une; ya me sjimbat ta espada te pueblohetic te ay sts'ahcul te smuc'ulinej awo'tanique.

¹⁸ Pero te bin c'ahc'alil te hich ya xc'oht ta pasel, xchi te Jehová, ma ba jc'axel ya jlajinex.

¹⁹ C'alal ya sjoc'oyic: ¿Bin yu'un te hich la spasbotic te Jehová te Dios cu'untic? teme xchihique, hich yac awalbe: Hich te bin ut'il la awihquitayonic soc la awac' abahic ta a'batinel ta stojol yan diosetic ta aq'uinalic, hich yac awac' abahic ta a'batinel ta stojol jyanlumetic ta yan q'uinal, uta me, xchi.

²⁰ Hich me yac apuc ta halel ta stojol te sna Jacob soc hich me yac awal ta Judá:

²¹ A'iya awa'iyic ini, ha'ex pueblohex te sonsohex soc mayuc awo'tanic, te ay asitic, pero ma xawilic q'uinal, te ay achiquinic, pero ma xawa'iyic q'uinal.

²² ¿Ma bal yac axi'onic? xchi te Jehová. ¿Ma bal ya xnihquex ta jtojol, ho'on te la jcac' te hi' scuenta sti'il te mar, ha te sti'il te stalel ay, te ma xhu' ya xc'ax tey a? Aunque ya xhahch tselajanel, ma xc'ax bahel; aunque ya x'awonic, ma xhu' ya xc'ax tey a.

²³ Pero te pueblo ini tulan yo'tan soc toyba-o'tan; la yihquitayonic, loq'uic bahel.

²⁴ Ma hichuc la yal ta yo'tanic: Ya quich'cotic ta muc' te Jehová te Dios cu'untic, te ya yac' tal ha'al ta yorahil ya sicub q'uinal soc ta yorahil ya xyaxub q'uinal, soc te ya ya'botic yorahil stsobel sit awal-ts'unubil, ma xchihuquex.

²⁵ Ta scaj achopolilic te yanijem spisil ini; ta scaj amulic ma ba la atahic bintic lec.

²⁶ Como ta yohlil te pueblo cu'un ay mach'atic chopol yo'tanic, te hich ya xmacliywanic te bin ut'il mach'atic ya stsaquic mutetic, ya yaq'uic yaquil yu'un ya stsaquic ants-winiquetic.

²⁷ Hich te bin ut'il na nojel ta mutetic, hich nojel ta lo'loywanej te snahique; hich muc' c'ohtic soc te ay sc'ulejalic.

²⁸ Juhp'ic soc t'ujbil ta ilel, c'ax bayel bintic chopol ya spasic. Ma ba toj la schahpanic te me'ba' yu'un lec ya xc'ohtic. ¡Ma ba c'opojic yu'un te pobrehetique!

²⁹ ¿Ma bal yacuc ca'be castigo yu'un? xchi te Jehová. ¿Ma bal yacuc ca'be spacol te nación te hich yilel stalel?

³⁰ Ay bin xiweltic sba soc c'ax chopol c'ohem ta pasel ta q'uinal:

³¹ Te jalwanejetic ya yalic lot, te sacerdotehetic ya xcuentahinwanic ha chican bin ya sc'an yo'tanic. ¡Hich ya sc'an te pueblo cu'une! Pero ¿bin yac apasic c'alal ya xtal slajibal? xchi te Jehová.