Jeremías 48 - Bible in Tzeltal Bachajón

Sc'op-jalwanej ta stojol Moab

¹ Hich ay sc'oblal te Moab. Hich yaloj te Jehová te scuentahinej spisil, te Dios yu'un Israel: ¡Obol sba te Nebo, la yich'ix jinel! ¡Pehc'anot soc tsalot te Quiriataim; te joyob ts'ahc yu'un la yich' pehc'anel soc jinel!

² ¡Ma ba ya xhalbotix yutsil sc'oblal te Moab! ta Hesbón la schahpambeyic chopol sc'oblal, hich la yalic: La'ic, jc'axel ac'a jlajintic ta yohlil te nacionetic. Ha nix hichat, Madmén, yac awich' jinel, ya me snutsat te espada.

³ ¡Ya xchicnaj tal awetic ta Horonaim, muc'ul jinel soc lajinel!

⁴ Yich'ojix jinel te Moab; la yac' chicnajuc yawic te alaletic yu'unic,

⁵ como yaquic ta oq'uel a ya xmohic bahel ta Luhit; como ta cohel bahel yu'un Horonaim la ya'iyic te awetic yu'un jinel.

⁶ ¡Ahnanic bahel, coltaya acuxlejalic, hichuquex te bin ut'il ch'ix ta jochol taquin q'uinal!

⁷ Te bin ut'il ha smuc'ulinej awo'tanic te awa'telic soc ac'ulejalic, ha nix hich ya me awich' tsaquel. Te Quemos ya x'ic'ot bahel ta chuquel soc te sacerdotehetic soc te príncipaletic yu'une.

⁸ Ya xtal te jinaw ta jujun pueblo, mayuc junuc pueblo te ma xtahot. Ya yich' jinel te sjuclej soc ya xlaj te spamlej, como hich yaloj te Jehová.

⁹ A'beya xic' te Moab yu'un ya xwihl bahel, como jochol ya xhilic te pueblohetic yu'un, mayuc mach'a ya xnahin tey a.

¹⁰ ¡Ma me lecuc sc'oblal te mach'a ma ba jun yo'tan ya spasbe ya'tel te Jehová! ¡Ma me lecuc sc'oblal te mach'a ya scom ta smalel ch'ich' te espada yu'une!

¹¹ Te Moab lamal q'uinal la ya'iy c'alal ta squeremil, hich te bin ut'il vino te ya sts'aban sba ta yawil, ma ba yich'oj aq'uel ta yan yawil, mayuc bin ora te bahem ta chuquel. Ha yu'un stalel ay yutsil a, ma ba yanijem te sumet yiq'ue.

¹² Pero ya xc'oht sc'ahc'alel, xchi te Jehová, te ya jticon bahel mach'atic ya sohltesic ta yan yawil, ya sjochobtesbeyic te yawilic soc ya swuyticlanic te oxometic yu'unique.

¹³ Hich te Moab ya xq'uexawan yu'un te Quemos, hich te bin ut'il Israel q'uexawan yu'un Bet-el, te ha smuc'ulinej yo'tan.

¹⁴ ¿Bin ut'il te hich yac awalic: Tulan soldadohotic, ay quiptic yu'un guerra, te xchihexe?

¹⁵ La yich'ix jinel te Moab, la yich'ic ochintayel te pueblohetic yu'une; te tsahbil ach'ix-queremetic yu'un cohemic bahel ta milel, xchi te Ajwalil te ha Jehová te scuentahinej spisil te sbihile.

¹⁶ Nopol ya sta yorahil ya xjihn te Moab, nopol ya xtal te swocole.

¹⁷ Oq'uetayahic apisilic te ayex ta sjoyobal soc apisilic te ana'beyejic sba; hich me xawalbeyic: Ilawil bin ut'il wac' te bastón te ay yip, te bastón te bayel yutsilal, xchihuquex me.

¹⁸ Cohanic tal ta banti ay te utsilal awu'unic, huclanic ta taquin lum, ha'at te nahinemat ta Dibón, como te jinaw yu'un Moab mohem tal scontrahimbelat, la sjimbat te toyol ts'ahquetic awu'une.

¹⁹ Tehc'ana aba ta ti'be, soc ilawil, ha'at te nahehinemat ta Aroer; joc'obeya awa'iy te winic te yac ta ahnel bahel, te ants te yac ta loq'uel bahel: ¿Bin a te c'ohem ta pasele? xchihat.

²⁰ Pehc'anotic te Moab como la yich'ix jinel. Oq'uetayahic, awonanic yu'un. Pucahic ta halel ta Arnón te la yich'ix jinel te Moab, xchi te Jehová.

²¹ Hul tal castigo ta stojol te spamlej, ta stojol Holón, Jahaza, Mefaat,

²² Dibón, Nebo, Bet-diblataim,

²³ Quiriataim, Bet-gamul, Bet-meón,

²⁴ Queriot, Bosra soc spisil te pueblohetic yu'un Moab te nopol soc namal ayique.

²⁵ Hich ya yal te Jehová: Lajix yip te Moab soc waq'uix sc'ab, xchi.

²⁶ ¡Yacubtesahic te Moab, como la stoy sba ta stojol te Jehová! ac'a sbal sba ta xe te Moab, soc ac'a yich' labanel.

²⁷ Moab, ¿ma bal lajuc alaban te Israel, hich te bin ut'il tahbil ta yohlil j'eleq'uetic? Como te c'alal la awalbe sc'oblal, la ajimulan ajol ta slabanel.

²⁸ ¡Ihquitayahic te pueblohetic awu'unic, nahinanic ta ch'entiquil, ha'ex te nahinemex ta Moab! ¡Hich ac'a c'ohucat te bin ut'il stsuhmut te ya spas spechech ta sc'uhb tontiquil!

²⁹ Ca'iybeyejtic sc'oblal te stoybahil Moab, te c'ax bayel ya stoy sba, ya scuy sba ta muc', te ay bayel toybahil ta yo'tan.

³⁰ Hich ya yal te Jehová: Ya jna'be te stulanil yo'tane, pero tojol, te stoybahil mayuc bin ya sta a.

³¹ Ha yu'un tulan ya x'oc'on yu'un Moab, ya x'awonon yu'un spisil Moab, ya x'ahcanajon yu'un te mach'atic yu'un Kir-hares.

³² Ya coq'uetayat, ha'at sts'usubil Sibma, hich te bin ut'il la yich' oq'uetayel Jazer. Te ac'abc'ab c'axic bahel ta mar, c'ohtic c'alal ta mar yu'un Jazer. Tal te jinaw ta stojol te sit ats'unub-awawal soc ats'usubil.

³³ Lajix te yutsil-o'tanil soc yutsil q'uinal ta yaxal q'uinal yu'un Moab. La jcac' te mayuquix vino ta yawil, ma ba ya sp'e'iquix ta teq'uel soc yutsil yo'tanic; mayuquix aw yu'un yutsil q'uinal.

³⁴ Te aw yu'un Hesbón ya xc'oht c'alal ta Eleale; c'alal Jahaza awonic, ta Zoar c'alal ta Horonaim soc Eglat-selisiyá, como taquijiquix te ha'etic yu'un Nimrim.

³⁵ Hich ya yal te Jehová: Ya jlajin ta Moab te mach'atic ya yaq'uic chic'bil mahtaniletic ta toyol awilaletic soc te ya schic'beyic pom te diosetic yu'unic, xchi.

³⁶ Ha yu'un ya x'ahcanaj co'tan yu'un Moab hich te bin ut'il amay, soc hich te bin ut'il amay ya x'ahcanaj co'tan yu'un te swinquilel Kir-hares, como ch'ayix te sc'ulejalic te stsobojique.

³⁷ Como loq'uesbil stsotsel sjolic spisilic, soc spisil yisimic loq'uesbilic; ehchentesbil spisil sc'abic soc spisil slapojic ch'ixal pac'.

³⁸ Ta spisil te ba nahetic yu'un Moab soc ta spisil te callehetic yu'une, puro oq'uel, como la jwuy te Moab hich te bin ut'il oxom te mayuc mach'a ya sc'an, xchi te Jehová.

³⁹ ¡Oq'uetaya! ¡Ilawil bin ut'il jc'axel laj! ¡Ilawil bin ut'il la sut spat te Moab soc la sta q'uexlal! Te Moab la yich' labanel soc xi'bil yu'un spisil te mach'atic ayic ta sjoyobal.

⁴⁰ Como hich yaloj te Jehová: Hich te bin ut'il ya xwihl te jxic, hich ya sjam xic' ta scontrahinel te Moab.

⁴¹ Ya yich'ic ochintayel te pueblohetic, soc tsalbilic te toyol ts'ahquetic. Ta hich ora hich ya xc'oht te yo'tanic te soldadohetic yu'un Moab te bin ut'il te yo'tan ants te ya x'alaje.

⁴² Jc'axel ya xjihn te Moab, ma ba nación ya xhilix, como la stoy sba ta stojol Jehová.

⁴³ Ya xc'oht ta atojol xiwel, hotbil ch'en soc yaquil, ha'ex te nahinemex ta Moab, xchi te Jehová.

⁴⁴ Te mach'a ya x'ahn loq'uel yu'un xiwel, ya xyahl cohel ta hotbil ch'en, soc te mach'a ya xloc' tal ta hotbil ch'en, ya x'och ta yaquil. Como ya quich' tal ta stojol Moab te yorahil castigo, xchi te Jehová.

⁴⁵ Ta axinal yu'un Hesbón mayuquix yipic a ya stehc'an sbahic te mach'atic loq'uic ta ahnel; como loc' c'ahc' ta Hesbón, soc yat c'ahc' ta yohlil Sehón; la schic'be yohlil sjol te Moab, soc te sbaquel sjol te mach'atic la shachic te c'opetique.

⁴⁶ ¡Obol aba, Moab! ¡Ch'ayic te pueblohetic yu'un Quemos! como te aquerem-nich'nab soc awantsil-nich'nab ic'otic bahel ta chuquel.

⁴⁷ Pero ta patil bahel ya cac' suhtuc xan tal te jchuqueletic yu'un Moab, xchi te Jehová. Li' ya xlaj sc'oblal te castigo yu'un Moab.