Jeremías 41 - Bible in Tzeltal Bachajón

¹ Ta shuquebal u te Ismael snich'an Netanías, snich'an Elisama, te ha sts'umbal ajwalil, soc lajuntuhl winiquetic talic ta stojol te Gedalías snich'an Ahicam ta Mizpa. C'alal yacalic ta we'el ta Mizpa a,

² te Ismael snich'an Netanías soc te lajuntuhl winiquetic te joquimbil yu'un hahch smilic ta espada te Gedalías snich'an Ahicam, snich'an Safán. Hich la smilic te gobernador yu'un te q'uinal te otsesbil yu'un te ajwalil yu'un Babilonia.

³ Te Ismael ha nix hich la smil spisil te judiohetic te sjoquinejic te Gedalías ta Mizpa soc te caldeo soldadohetic te tey ayic a.

⁴ Ta schebal c'ahc'al slajel a te Gedalías, te c'alal ma to ayuc mach'a sna'oj a,

⁵ ay winiquetic te talic ta Siquem, Silo soc Samaria, chanwinic (80) ta tuhl te sloq'uesej yisimic, chi'emic sc'u' spaq'uic soc yehchentesej sbahic, yich'ojic tal mahtanil harina soc pom ta sna Jehová.

⁶ Te Ismael loc' bahel ta Mizpa ta stahel, yac ta oq'uel bahel. C'alal la sta sba soc, hich la yalbe: La' ta stojol te Gedalías snich'an Ahicam, xchi.

⁷ Te c'alal c'ohtic ta yutil te pueblo, te Ismael snich'an Netanías soc te swinictac la smilic soc la sch'ojic cohel ta hotbil ch'en.

⁸ Pero ay lajuntuhl te la yalbeyic te Ismael: Ma xamilotcotic, yu'un ay trigo, cebada, aceite soc chab te jnac'ojtic hilel ta q'uinal, xchihic. Ha yu'un ma ba la smilticlan hich te bin ut'il la smilticlan te yermanotaque.

⁹ Te hotbil ch'en te banti la sch'ojticlambe cohel sbaq'uetal te winiquetic te la smilticlan ta scaj te Gedalías, ha nix te hotbil ch'en te la spas te ajwalil Asa yu'un hich ya scoltay sba a yu'un te Baasa ajwalil yu'un Israel. Te Ismael snich'an Netanías la snojes ta chamen baq'uet.

¹⁰ Patil te Ismael la schucticlan spisil te mach'atic hilemic ta Mizpa, te yantsil-nich'nab te ajwalil soc spisil te ants-winiquetic te hilemic ta Mizpa, te a'botic hilel ta scuenta Gedalías snich'an Ahicam yu'un te Nabuzaradán, capitán yu'un te soldadohetic te ya scanantayic ajwalil. Te Ismael la schucticlan bahel yu'un ya xc'ax bahel ta stojol te amonetique.

¹¹ Te Johanán snich'an Carea soc spisil te capitanetic yu'un soldadohetic te sjoquinejic, c'alal la ya'iyic spisil te bintic chopol la spas te Ismael snich'an Netanías,

¹² la stsob tal spisil te swinictac, bahtic ta ya'beyel guerra te Ismael snich'an Netanías. La stahic ta nopol te muc'ul yawil ha' te ay ta Gabaón.

¹³ Spisil te mach'atic sjoquinejic te Ismael, c'alal la yilic te Johanán snich'an Carea soc spisil te capitanetic yu'un soldadohetic te sjoquinejique, bayel yutsil yo'tanic yu'un.

¹⁴ Spisil te mach'atic ic'otic loq'uel tal ta chuquel yu'un Ismael ta Mizpa c'axic bahel ta stojol te Johanán.

¹⁵ Pero te Ismael soc waxactuhl swinictac loq'uic ta ahnel ta stojol te Johanán, bahtic ta stojol te amonetique.

¹⁶ Te Johanán soc spisil te capitanetic yu'un te soldadohetic te joquimbilic yu'un la yic'ticlanic bahel spisil te mach'atic cuxul hilic, te ic'otic loq'uel tal ta chuquel ta Mizpa yu'un te Ismael te c'alal laj smilbel a te Gedalías snich'an Ahicam: ha te soldadohetic, antsetic, alaletic soc eunuco-winiquetic te ic'bilic loq'uel tal ta Gabaón yu'un te Johanán.

¹⁷ Hahchic ta behel, c'ohtic ta Gerut-quimam te nopol ay ta Belén, snopojic te ya xbahtic ta Egipto

¹⁸ ta scaj te caldeohetique. Ha la xi'ic yu'un te milot yu'un Ismael te Gedalías te otsesot ta gobernador ta slumal yu'un te ajwalil yu'un Babilonia.