Jeremías 4 - Bible in Tzeltal Bachajón

¹ Teme ya suhtat talel, Israel, xchi te Jehová, suhtan tal ta jtojol. Teme yac aloq'ues bahel te loc'ombahetic awu'un te ihlaybilic soc teme ma ba bayuc nax ya xbahex,

² soc teme smelelil, stojil soc ta scuenta bintic lec ta pasel hich yac awal ta jamal: Cuxul Jehová, teme xchihexe, hich te nacionetic ya me yich'ic bendición yu'un Dios soc ya me yalbeyic yutsil sc'oblal, xchi.

³ Te Jehová hich ya yalbe spisil te mach'atic yu'un Judá soc Jerusalén: Chahpanahic te lum te ma chahpambiluc awu'unic; soc ma me xawa'iyic ts'umbajel ta yohlil ch'ixileltic.

⁴ Ich'ahic circuncisión ta stojol Jehová, a'beyahic circuncisión ta awo'tanic, ha'ex winiquex yu'un Judá soc Jerusalén, manchuc hich ya xloc' quilimba te bin ut'il c'ahc', te ya xtihl soc mayuc mach'a ya xhu' ya stup' ta scaj schopolil awa'telic.

Ay mach'a ya yochintay Judá

⁵ Pucahic ta halel ta Judá, halbeyahic sc'oblal ta Jerusalén, hich me yac awalic: Oq'uesinahic corneta ta q'uinal, xchihex; awonanic, hich me yac awalic: Tsoba abahic, ochucotic bahel ta pueblohetic te ayic sts'ahcul, xchihanic me.

⁶ ¡Toyahic te bandera ta stojol Sión, ahnanic, ma me xacom abahic! Como ya xbaht quic' tal ta stojol norte tulan wocol soc muc'ul jinel.

⁷ Loq'uemix tal choj ta yawil, te jinawal yu'un nacionetic yaquix ta behel; loq'uemix tal ta slumal scuenta yu'un ya sjimbat te alumale, jimbil soc jochol ya xhilic te pueblohetic awu'une.

⁸ Ha yu'un lapahic paq'uetic yu'un mel-o'tan, oc'anic soc ahcanajanic, como te sc'ahc'al yilimba Jehová ma ba yihquitayejotic.

⁹ Ta hich ora, xchi te Jehová, ya me xiw yo'tanic te ajwalil soc te príncipaletic, te sacerdotehetic ya me ya'iyic tulan xiwel, te jalwanejetic xcham yo'tanic ya ya'iyic yu'un, xchi.

¹⁰ Hich la jcal: Ay, Jehová, Dios, mero la alo'loy te pueblo ini soc te Jerusalén, yu'un hich la awal: Ay me lamal q'uinal awu'unic, xchihat, pero ay ta jnuc'cotic te espadahe, xchihon.

¹¹ Ta hich ora hich ya xhalbot te pueblo ini soc Jerusalén: Ya xtal ta stojol te pueblo cu'un q'uixin ic' te ya xloc' tal ta toyol jochol taquin q'uinal, ma ha'uc yu'un ya sten bahel spat trigo o ya yic'ay;

¹² te ic' te ya cac' taluc, c'ax hich ay yip a, como yo'tic ho'onix ya calbe smulic, xchi.

¹³ Ilawil, ya xmo tal hich te bin ut'il tocal, te carretahetic yu'un hich te bin ut'il sutu-ic'. Te cawuhetic yu'unic c'ax hich tulan ya xbehenic a te bin ut'il ya xwihlic te jxiquetique. ¡Obol jbahtic, ac'bilotic ta pojel!

¹⁴ Jerusalén, poca loq'uel te bin chopol ay ta awo'tan, yu'un hich ya xcolat. ¿Jayeb xan c'ahc'al ya xhil ta awo'tan te chopol snopojibal?

¹⁵ Ay c'op ya xtal c'alal ta Dan, c'alal ta witsetic yu'un Efraín ya yalbe sc'oblal jinel.

¹⁶ Hich me xawalbe te nacionetic, halbeya te Jerusalén: Yac ta talel ta namal q'uinal mach'atic ya x'ochintaywanic, ya x'awonic yu'un guerra ta scontrahinel te pueblohetic yu'un Judá.

¹⁷ Ha ya sjoytayic hich te bin ut'il mach'atic ya scanantayic q'uinal, como la stoy sba ta jtojol, xchi te Jehová.

¹⁸ Ha nix ta scaj te atalel soc te bintic apasoj la yac' c'ohtuc ta pasel ini. Ha awocol ini, mero ch'a, c'ohemix c'alal ta awo'tan, xchi.

¹⁹ ¡Ay jwocol, ay jwocol! ¡Ya xc'uxub co'tan, ya xwihl te co'tan, ma xch'abon; como la jca'iy sc'op corneta, la jca'iy aw yu'un guerra!

²⁰ Ya yich' halbeyel sc'oblal jinel soc yan jinel, spisil te q'uinal jihnemix. Ora nax la yich'ic jinel te nahilpaq'uetic cu'un, ora nax jihn te spac'al te nahilpac' cu'un.

²¹ ¿Jayeb xan c'ahc'al ya sc'an te ya quil te bandera soc te ya ca'iybe sc'op te corneta?

²² Ha sonso te pueblo cu'un, ma sna'bon jba; ha al-nich'anetic te mayuc bin ya sna'ic, ma sna'ic q'uinal. Ay sp'ijilic ta spasel te bin chopol, pero ma sna'ic spasel te bin leque, xchi te Jehová.

²³ La jquil te lumq'uinal, jihnem soc jochol; la jquil te ch'ulchan, mayuc sacal q'uinal yu'un.

²⁴ La jquil te witsiltic, yacalic ta nihquel; spisil te tsehletic xyuq'uinaj ta nihquel.

²⁵ La jquil, mayuc jtuhluc ants-winic, loq'uemiquix ta ahnel spisil te mutetic ya xwihlic ta toyol.

²⁶ La jquil, c'atp'ujem ta jochol taquin q'uinal te yaxal q'uinale, soc spisil te pueblohetic yu'un jihnticlambilic ta stojol te Jehová, ta stojol te sc'ahc'al yilimba.

²⁷ Hich la yal te Jehová: Spisil te q'uinal ya me yich' jinel, pero ma ba ya jin ta jc'axel.

²⁸ Ha yu'un ya me smel yo'tan te lumq'uinal, soc te ch'ulchan ta toyol ya me x'ihc'ub, como c'opojemon, la jnopix, ma ba ya jsut te jc'ope, ma ba ya suhton ta jpat.

²⁹ Ta scuenta yawic te mach'atic mohemic ta cawu soc te mach'atic ya yaq'uic t'ihmalte', spisil te pueblohetic ya xloq'uic ta ahnel; ya snac' sbahic ta pimil q'uinal, ya xmohic bahel ta toyol tontiquil; spisil te pueblohetic ihquitayotic hilel, mayuc mach'a ya xnahin tey a.

³⁰ Ha'at te jihmbilat, ¿bin yacat ta spasel? Aunque yac alap tsajal c'u'ul, aunque yac ach'al aba ta oro, aunque yac abon te asite, tojol yac ach'al aba, como ya sp'ajat te mach'atic smulanejat, ya slehbat acuxlejal.

³¹ La jca'iy aw hich te bin ut'il yaw ants te ya x'ayin yal, hich bin ut'il swocol ants c'alal ya x'ayin ba-alal yu'un; ha te aw yu'un te yantsil-nich'an Sión, te ya shach sc'ab soc te hich ya yal: ¡Obol jba, ya xlaj quip ta scaj te jmilawetic! xchi te Jehová.