Jeremías 38 - Bible in Tzeltal Bachajón

Jeremías ta hotbil ch'en

¹ Te Sefatías snich'an Matán, Gedalías snich'an Pasur, Jucal snich'an Selemías, soc Pasur snich'an Malquías la ya'iyic te bin yac yalbel te Jeremías ta stojol spisil te pueblo, te hich la yal:

² Hich yaloj te Jehová: Te mach'a ya xhil ta pueblo ya me xlaj ta espada, ta wi'nal o ta jmilawal-chamel; yan te mach'a ya xc'ax bahel ta stojol te caldeohetic, ya xcuxaj. Te scuxlejal hich ya xc'oht te bin ut'il bin pojbil ta guerra, cuxul ya xhil, xchi.

³ Hich yaloj te Jehová: Te pueblo ini ya me x'och ta sc'ab te soldadohetic yu'un te ajwalil yu'un Babilonia; ya me yu'untayic, xchi.

⁴ Te príncipaletic hich la yalbeyic te ajwalil: Ac'a yich' milel te winic ini, yu'un ta scuenta sc'op ya slajimbe yip yo'tanic te soldadohetic te ay to hilemic ta pueblo ini, soc spisil te ants-winiquetique. Te winic ini ma ba yac ta slehbeyel yutsilal te pueblo, ha yac ta slehbeyel te bin chopole, xchihic.

⁵ La sjac' te ajwalil Sedequías: Ay ta ac'abic, mayuc bin ya xhu' ya spas te ajwalil yu'un ya scomex, xchi.

⁶ Ha yu'un la stsaquic te Jeremías, la yotsesic ta hotbil ch'en yu'un Malquías snich'an te ajwalil, te ay ta yamaq'uil te cárcel. La scohtesic ta lazo. Mayuc ya'lel te hotbil ch'en, ha nax ahch'al; te Jeremías co bahel ta ahch'al.

⁷ Te etíope-winic, Ebed-melec, jtuhl eunuco ta sna te ajwalil, la ya'iy te otsesot ta hotbil ch'en te Jeremías. C'alal hucul ta Ochibal yu'un Benjamín a te ajwalil,

⁸ te Ebed-melec loc' bahel ta sna ajwalil, hich la yalbe te ajwalil:

⁹ Ajwalil cu'un, mero chopol bin la spasbeyic te jalwanej Jeremías. La yotsesic ta hotbil ch'en, tey ya xcham ta wi'nal a, como mayuquix pan ta pueblo, xchi.

¹⁰ Ha yu'un te ajwalil la spas ta mandar te Ebed-melec te etíope-winic, hich la yalbe: Ic'a bahel lajuneb scha'winic (30) ta tuhl winiquetic, loq'uesahic te Jeremías ta hotbil ch'en scuenta yu'un ma ba ya xcham tey a, xchi.

¹¹ Hich te Ebed-melec la yic' bahel te winiquetic, och bahel ta sna ajwalil, ta ye'tal banti q'uejbil te taq'uine; la stsac c'a'-paq'uetic soc poco' c'u'uletic, la scohtesic bahel soc lazo ta banti ay te Jeremías ta hotbil ch'en.

¹² Te Ebed-melec te etíope-winic, hich la yalbe: Ac'a ta ach'ehlap te c'a'-paq'uetic scuenta yu'un ma ba ya yehchentesat te lazohetic, xchi. Hich la spas te Jeremías.

¹³ Hich te winiquetic la sloq'uesic mohel ta lazohetic ta hotbil ch'en. Te Jeremías hil ta yamaq'uil te cárcel.

Sedequías ay bin muquen la sjoc'obe Jeremías

¹⁴ Patil, te ajwalil Sedequías la sticon ta iq'uel tal te jalwanej Jeremías ta yoxebal ochibal yu'un te sna Jehová. Te ajwalil hich la yalbe te Jeremías: Ay bin ya joc'obat, ma me ayuc bin xamuc ta awo'tan, xchi.

¹⁵ Hich la sjac' te Jeremías: Teme jamal ya calbat, ¿ma bal yac amilon? Soc teme ay bin ya ca'bat ana', ma ba yac awich'bon ta cuenta, xchi.

¹⁶ Pero te ajwalil Sedequías muquen la yal ta jamal ta stojol Jeremías: ¡Yiloj Jehová te la ya'botic jcuxlejaltic, ma ba ya jmilat soc ma ba ya cac'at ta sc'abic te winiquetic te ya slehbelat acuxlejal! xchi.

¹⁷ Ha yu'un te Jeremías la yalbe Sedequías: Hich yaloj te Jehová te scuentahinej spisil, te Dios yu'un Israel: Teme yac awac' aba ta sc'ab te príncipaletic yu'un te ajwalil yu'un Babilonia, hich ya xcuxajat soc te mach'atic ay awu'un, soc ma ba ya yich' chiq'uel te pueblo ini.

¹⁸ Pero teme ma ba yac awac' aba ta sc'ab te príncipaletic yu'un te ajwalil yu'un Babilonia, ya me x'och ta sc'ab te caldeohetic te pueblo ini soc ya me ya'beyic sc'ahc'al; te ha'ate ma ba ya xcolat ta sc'abic, xchi.

¹⁹ Te Sedequías hich la yalbe te Jeremías: Ya jxi' te judiohetic te ay c'axemiquix ta stojol te caldeohetique; teme ya x'ochon ta sc'abic ya wan yuts'inonic, xchi.

²⁰ La sjac' te Jeremías: Ma ba ya yac'at ta sc'abic. Ch'uhumbeya sc'op Jehová te la jcalbatix awa'iy, hich lec ya xc'ohat soc hich ya xcuxajat.

²¹ Yan teme ma xac'an yac awac' aba ta sc'abic, hich la ya'bon quil te Jehová:

²² Spisil te antsetic te ya xhilic ta sna te ajwalil yu'un Judá ya me yich'ic loq'uesel bahel ta stojol te príncipaletic yu'un te ajwalil yu'un Babilonia; hich ya yalbat te antsetic: La slo'loyat, la stsalat te mach'atic jun awo'tan aba soc. Co bahel ta ahch'al te awoque, suht ta spatic te mach'atic jun awo'tan aba soc, xchihic.

²³ Spisil te antsetic awu'un soc te anich'nab ya me x'ac'otic ta sc'ab te caldeohetique. Te ha'ate ma ba ya xcolat ta sc'abic, ya me x'ochat ta sc'ab te ajwalil yu'un Babilonia, te ha ya schic' te pueblo ini, xchi.

²⁴ Te Sedequías la yalbe te Jeremías: Ma me ayuc mach'a ya sna' te c'op ini, hich ma ba ya xchamat.

²⁵ Teme ya ya'iyic te príncipaletic te la jc'oponat, teme ya xtalic ta atojol soc ya yalbat: Hala ca'iycotic te bin la awalbe te ajwalil soc te bin la yalbat; ma me xamuc, hich ma ba ya jmilatcotic, teme xchihique,

²⁶ hich me xawalbe: La jcalbe wocol te ajwalil te ma ba ya sticonon xan bahel ta sna Jonatán scuenta yu'un ma xlajon tey a, ya me awut, xchi te Sedequías.

²⁷ Ta patil spisil te príncipaletic tal sjoc'obeyic te Jeremías; hich la yalbe te bin ut'il pasot ta mandar yu'un te ajwalil. Hich la yihquitayic hilel, como mayuc mach'a la ya'iy te bin la yalique.

²⁸ Te Jeremías hil ta yamaq'uil te cárcel ha to c'alal ochintayot te Jerusalén.