Jeremías 35 - Bible in Tzeltal Bachajón

Sc'oblal te sts'umbal Recab

¹ Te sc'op Jehová te tal ta stojol Jeremías ta yorahil Joacim snich'an Josías, ajwalil yu'un Judá, hich la yal:

² Bahan ta stojol te sts'umbal Recab, ic'a ochel ta junuc stsalul sna te Jehová, soc a'beya yuch'ic vino, xchi.

³ Ha yu'un bohon ta stojol Jaazanías snich'an Jeremías, snich'an Habasinías, soc te yermanotac soc spisil snich'nab, soc spisil te sts'umbal Recab.

⁴ La jquic'ticlan tal ta sna Jehová, ta jtsahl-na yu'un te snich'nab Hanán snich'an Igdalías, te swinic Dios, te ay ta sts'ehl te jtsahl-na yu'un te príncipaletic, ta sba te stsalul sna te Maasías snich'an Salum, te jcanan-ti'nahile.

⁵ La jcac'ticlan vasohetic soc copahetic nojelic ta vino ta stojol te sts'umbal Recab, soc hich la jcalbe: Uch'anic te vino, la jcut.

⁶ Pero la sjaq'uic: Ma ba ya cuch'cotic vino, como te Jonadab snich'an Recab, te jtatcotic hich la spasotcotic ta mandar: Ma me ayuc bin ora yac awuch'ic vino, ha'ex soc te ats'umbalique.

⁷ Soc ma me xapas anahic, ma me xawa'iyic ts'umbajel soc ma me xats'unic ts'usubiltic. Ya me xnahinex ta nahilpac' te jayeb c'ahc'al cuxulex, scuenta yu'un bayel c'ahc'al ya xcuxajex ta lumq'uinal banti c'axel nax ayex.

⁸ Te ho'otcotic jch'uhunejcotic spasel spisil te bintic la yalbotcotic ta mandar te Jonadab snich'an Recad, ha te ma ba ya cuch'cotic vino te jayeb c'ahc'al cuxulotcotic, ho'otcotic soc te antsetic cu'uncotic soc te jnich'nabcotic ach'ix queremetic;

⁹ soc ma ba ya jpascotic jnahcotic banti ya xnahinotcotic, mayuc jts'usubilcotic o jq'uinalcotic o ts'unubiletic cu'uncotic.

¹⁰ Nahinemotcotic ta nahilpac', soc jch'uhunejcotic spasel spisil te bin la spasotcotic ta mandar te jtatcotic Jonadab.

¹¹ Pero c'alal la yochintay te q'uinal te Nabucodonosor ajwalil yu'un Babilonia, hich la jcalcotic: La'ic, ya jnac' jbahcotic ta Jerusalén ta stojol te soldadohetic yu'un te caldeohetic soc yu'un te siriahetic, xchihotcotic. Ha yu'un te nahinemotcotic ta Jerusalén, xchihic.

¹² Hich tal te sc'op Jehová ta stojol Jeremías, hich la yal:

¹³ Hich yaloj te Jehová te scuentahinej spisil, te Dios yu'un Israel: Bahan, halbeya te winiquetic yu'un Judá soc te mach'atic nahinemic ta Jerusalén: ¿Ma bal yacuc anopic te yac ach'uhumbonic te jc'ope? xchi te Jehová.

¹⁴ Ch'uhumbil te sc'op Jonadab snich'an Recab, te la spas ta mandar te snich'nab te ma me xyuch'ic vino, hich c'alal ora mayuc yuch'ojic vino, yu'un sch'uhumbeyejic smandar te state. Yan te ho'one, bayel buelta la jc'oponex, pero ma ba la awich'onic ta cuenta.

¹⁵ Bayel buelta la jticombeyex te jalwanejetic te a'batetic cu'une, yu'un hich ya yalbeyex: Jujutuhlex, ihquitayahic hilel te chopol be awu'unic, ach'ubtesa awa'telic; ma me xat'unic yantic diosetic yu'un yac awac' abahic ta a'batinel yu'unic. Hich ya xcuxajex ta q'uinal te la jca'beyex soc ame'atatic, xchihon. Pero ma ba la awa'iybonic jc'op soc ma ba la awich'onic ta cuenta.

¹⁶ Te sts'umbal Jonadab snich'an Recab la sch'uhunic spasel te mandar halbotic yu'un te statique, pero te pueblo ini ma ba sch'uhumbeyejon te jc'ope.

¹⁷ Ha yu'un hich yaloj te Jehová, te Dios te scuentahinej spisil, te Dios yu'un Israel: Ilawil, ya cac' ta stojol Judá soc spisil te mach'atic nahinemic ta Jerusalén spisil te bintic chopol calbeyejix ta scontrahinel, como la jc'opon pero ma ba la ya'iybonic jc'op, la jquic'ticlan, pero ma ba la sjac'bonic te jc'ope, xchi.

¹⁸ Te Jeremías hich la yalbe te sts'umbal Recab: Hich yaloj te Jehová te scuentahinej spisil, te Dios yu'un Israel: Te bin ut'il la ach'uhumbe smandar te atat Jonadab soc la apasic spisil te bintic la yalbeyex ta mandar,

¹⁹ ha yu'un hich yaloj te Jehová te scuentahinej spisil, te Dios yu'un Israel: Te Jonadab snich'an Recab mayuc bin ora ya spas falta jtuhluc sts'umbal te ya x'ayin ta jtojol spisil ora, xchi.