Jeremías 33 - Bible in Tzeltal Bachajón

Halbil te ya yich' cha'pasel xan Jerusalén

¹ Tal sc'op Jehová ta schebal buelta ta stojol Jeremías te c'alal ay to ta chuquel a ta yamaq'uil te cárcel, hich la yal:

² Hich yaloj te Jehová, te la spas te bahlumilal, te Jehová te la schahpan soc la ya'be yich' yip, ha Jehová te sbihile:

³ Awtayawon, ya jac'bat, soc ya calbat bintic muc' sc'oblal soc te bintic muquen ay te ma ba ana'oje.

⁴ Como te Jehová, te Dios yu'un Israel, hich yalbeyej sc'oblal te nahetic ta pueblo ini soc te nahetic yu'un te ajwaliletic yu'un Judá te la yich'ic jinel yu'un ya scoltay sbahic a ta stojol te busambil mohel lum soc ta stojol te espada,

⁵ (como teme ya xloq'uic bahel ta ya'beyel guerra te caldeohetic, ha nax ya xtuhun te nahetic te ya xnojic yu'un ta chamen baq'uet te ya cac'ticlan ta lajel ta scuenta quilimba, yu'un la jnac' jsit quelaw ta stojol te muc'ul pueblo ini),

⁶ hich la yal: Ya cac' te ya xlecubic soc te lec q'uinal ya ya'iyic, ya jpoxtay soc ya ca'be yilic bayel lamal q'uinal soc jun-o'tanil.

⁷ Ya cac' suhtuc tal te jchuqueletic yu'un Judá soc yu'un Israel, soc ya jcha'pas xan hich te bin ut'il ayic ta nahil to.

⁸ Ya jpocbe loq'uel spisil schopolilic te la sta smulic a ta jtojol; ya jpasticlambe perdón yu'un spisil smulic te la spasic ta jtojol soc te la stoyticlan sbahic ta jtojole.

⁹ Te muc'ul pueblo ini ya me yac' chicnajuc ta stojol spisil nacionetic ta bahlumilal te ay yutsil co'tan, stse'elil co'tan soc cutsilal, c'alal ya ya'iybeyic sc'oblal spisil te bintic lec ya jpasbe te muc'ul pueblohe. Ya me xiwic soc ya me xnihquic yu'un spisil bintic lec soc spisil te lamal q'uinal te ya ca'be, xchi.

¹⁰ Hich yaloj te Jehová: Ta lugar ini te yac awalic te ha jochol q'uinal, te mayuc ants-winiquetic o chambahlametic, ya me schicnaj ta pueblohetic yu'un Judá soc ta callehetic ta Jerusalén te jochol, te mayuc mach'a nahinem tey a, ni ants-winiquetic ni chambahlametic,

¹¹ ya me xchicnaj sc'op yutsil-o'tanil soc tse'el-o'tanil, te sc'op mach'atic slecolinej sbahic, soc sc'op te mach'atic ya yich'ic tal ta sna Jehová mahtaniletic yu'un yalel wocol, te hich ya yalic: ¡Halbeyahic wocol te Jehová te scuentahinej spisil, como lec yo'tan te Jehová, te sc'uxul yo'tan stalel ay sbahtel q'uinal! xchihic. Yu'un ya ca'be xan yutsil slequil te lumq'uinal hich te bin ut'il ay ta nahil to, xchi te Jehová.

¹² Hich yaloj te Jehová te scuentahinej spisil: Ta lugar ini te jochol, te mayuc ants-winiquetic soc chambahlametic, soc ta spisil te pueblohetic yu'un, ay me aquiltic yan buelta te banti ya ya'be scux yo'tan stuminchijic te jcanan-tuminchijetique.

¹³ Ta pueblohetic ta witsiltic, ta tsehletic, ta Neguev, ta sq'uinal Benjamín, ta sjoyobal Jerusalén soc ta pueblohetic yu'un Judá, ya me xcha'c'axic xan tuminchijetic ta ye'tal sc'ab te mach'a ya yahtaylan, xchi te Jehová.

¹⁴ Ya me xc'oht sc'ahc'alel, xchi te Jehová, te ya xc'oht ta pasel cu'un te bintic lec calbeyej te sna Israel soc te sna Judá.

¹⁵ Ta hich sc'ahc'alel soc ta hich ora ya cac' puhlinuc ta stojol David te Spuhl te toj yo'tan, te stojil ya schahpanwan soc toj bin ya spas ta q'uinal.

¹⁶ Ta hich ora ya xcol te Judá soc jun yo'tan ya xnahin te Jerusalén. Hich ya x'a'bot sbihilin: Jehová, ha te mach'a cu'untic te toj yo'tan, xchi.

¹⁷ Como hich yaloj te Jehová: Mayuc bin ora ya spas falta te ay sts'umbal David te ya xhuhcaj ta shuctajib ta sna Israel,

¹⁸ soc te sacerdotehetic te ha sts'umbal Leví mayuc bin ora ya spas falta te ay mach'a ay ta jtojol yu'un ya yac' scohtol chic'bil mahtanil, yu'un ya schic' mahtanil harina soc ya yac' milbil mahtanil jujun c'ahc'al, xchi.

¹⁹ Tal sc'op te Jehová ta stojol Jeremías, hich la yal:

²⁰ Hich yaloj te Jehová: Teme ya xhu' slajimbeyel sc'oblal te bin jchapoj soc te c'ahc'alel soc te ahc'abal, te mayuc c'ahc'al o ahc'abal ta yorahil,

²¹ hich ya xhu' slajimbeyel sc'oblal te chapbil-c'op cu'un soc te ca'bat David, te mayuc snich'an te ya xhuhcaj ta shuctajib, soc ha nix hich te chapbil-c'op soc te sacerdotehetic soc te sts'umbal Leví te ya x'a'tejic ta jtojol.

²² Hich te bin ut'il ma xhu' ta ahtayel te eq'uetic ta ch'ulchan o te shi'al mar, hich ya cac' te ya xp'ohl te sts'umbal te ca'bat David soc te levitahetic te ya x'a'tejic ta jtojol, xchi.

²³ Tal sc'op te Jehová ta stojol Jeremías:

²⁴ ¿Ma bal lajuc awa'iy te hich yac yalbelic te ants-winiquetic ini: Te Jehová la sp'aj yo'tan te cha'chahp ts'umbalil tsahbil yu'une, te xchihique? Hich mayuc sc'oblal ta yo'tanic te pueblo cu'un, soc hich c'ohemix ta yo'tanic te ma ha'uquix nación te pueblo cu'une.

²⁵ Hich yaloj te Jehová: Teme ma ba ca'beyej yich' yip te chapbil-c'op cu'un soc te c'ahc'al soc te ahc'abal, teme ma ba cac'oj te leyetic te ya scuentahinic te ch'ulchan soc te bahlumilal,

²⁶ hich ya sp'aj co'tan te sts'umbal Jacob soc David te a'bat cu'un, yu'un ma ba ya jtsa te sts'umbal David te ha ya scuentahin te sts'umbal Abraham, Isaac soc Jacob. Ya me cac' suhtuc te jchuqueletic yu'unic soc ya me jc'uxultay, xchi.