Jeremías 30 - Bible in Tzeltal Bachajón

Dios ya yal te ya suht tal te jchuqueletic

¹ Ha te sc'op Jehová te tal ta stojol te Jeremías, hich la yal:

² Hich yaloj te Jehová, te Dios yu'un Israel: Ts'ihbaya ta libro spisil te bin la jcalbate.

³ Como ya xtal sc'ahc'alel, xchi te Jehová, te ya cac' te ya suhtic tal te jchuqueletic yu'un te pueblo cu'un, ha te Israel soc te Judá. Ya quic'ticlan tal ta q'uinal te la jca'be te sme'static, ya me yu'untayic, xchi.

⁴ Ha te sc'op Jehová te la yalbe sc'oblal Israel soc Judá:

⁵ Hich yaloj te Jehová: ¡Chican awetic yu'un xiwel, tulan xiwel, ma ha'uc sc'op lamal q'uinal!

⁶ Joc'oya awa'iyic soc ilawilic, teme ay winic te ya x'alaje. ¿Bin yu'un te ya quil spisil te winiquetic te hich stsacojic sch'uhtic te bin ut'il ants te ya x'ayinix yal, te ch'ayem sch'ich'el spisil sit yelawic?

⁷ ¡C'ax wocol ya xc'oht te sc'ahc'alel; mayuc yan pajal soc! Ha yorahil wocol yu'un Jacob; pero ya xcol ta libre ta stojol.

⁸ Ta hich ora, xchi te Jehová te scuentahinej spisil, ya jwac'be te yugo ay ta snuc' soc ya jtuch'be schucojbil, ma ba ya xmosohinotiquix yu'un jyanlumetic.

⁹ Ya me yac' sbahic ta a'batinel yu'un Jehová, te Dios yu'unic, soc ta stojol David te ajwalil yu'unic, te ya jchicnajtesbe.

¹⁰ Ha'at, Jacob, a'batat cu'un, ma me xiwat, xchi te Jehová, ma me xnihc awo'tan, Israel, como ilawil, ho'on ya jcoltayat tal ta namal q'uinal, ha'at soc ats'umbal ta q'uinal banti chuculex. Ya suht tal te Jacob, lamal q'uinal soc jun yo'tan ya x'ayin, mayuc mach'a ya xiwtesot yu'un.

¹¹ Como ho'on joquinejat yu'un ya jcoltayat, xchi te Jehová. Ya jlajinlan spisil te nacionetic te banti la jpucticlanex bahele, yan te ha'ate ma ba ya jlajinat atuquel, aunque stojil ya ca'bat castigo; ma yu'unuc ma ba ya ca'bat castigo, xchi.

¹² Hich yaloj te Jehová: Ma xhu' ta lecubtesel awehchen, mayuc spoxil te ac'a'emal.

¹³ Mayuc mach'a ya xc'opoj awu'un, mayuc spoxil awehchen, ma xhu'at ta poxtayel.

¹⁴ Spisil te mach'atic smulanejat ya xch'ayat ta yo'tanic; ma ba ya slehat, yu'un la jquehchentesat hich te bin ut'il acontra, ha te castigo yu'un j'uts'inwanej, ta scaj te c'ax muc' achopolil soc te bayel amul.

¹⁵ ¿Bin yu'un ya x'awonat ta scaj awehchen? Mayuc spoxil te bin c'ux yac awa'iy, como ta scaj bayel te c'ax muc' achopolil soc bayel amul te hich la jpasbate.

¹⁶ Pero ya xlajinot spisil te mach'atic ya slajinat; soc spisil acontratac ya x'ic'otic bahel ta chuquel; ya yich' pojel sbiluquic spisil te mach'atic ya spojbat abiluc, spisil te mach'atic ya yelc'anat ya cac' te ya yich'ic elc'anel.

¹⁷ Pero ya cac' te ya xcha'lecubat xan soc ya jc'asesbat awehchen, xchi te Jehová, como Ch'aybilat, xchi te abihile, yu'un hich la yalic: Ha te Sión te mayuc mach'a ya xna'otix yu'une, xchihic.

¹⁸ Hich yaloj te Jehová: Ilawil, ya cac' suhtuc tal te yutsil slequil te snahilpac' Jacob, soc ya me jna'be yo'bolil sba banti nahinemic; te pueblo ya yich' cha'pasel ta sba te banti jimbil, soc te sna ajwalil ya xc'oht ta mero yawile.

¹⁹ Ya xloc' ta stojolic c'ayoj yu'un yalel wocol soc aw yu'un yutsil q'uinal. Ya cac' te ya xp'ohlic, ma ba ya xpehc'aj awahtalulic; ya cac'ticlan ta ich'el ta muc', ma ba ya xp'ajotic.

²⁰ Te yal-snich'nabic hich ya xc'ohtic te bin ut'il ta nahil; soc te pueblo yu'unic ya me yich' yip ta jtojol. Ya ca'be castigo spisil te j'uts'inwanejetic yu'unique.

²¹ Ya xloc' ta yohlilic te príncipal yu'unic, tey nix ya xloc' tal ta yohlilic a te ajwalil yu'unique. Ya cac' te ya xnohpoj tal ta jtojol, hich ya xtal ta jtojol, como ¿mach'a ya c'an nohpojuc tal ta jtojol ta stuquel nax? xchi te Jehová.

²² Hich pueblohex cu'un ya xc'ohex, soc ho'on Dioson awu'unic ya xc'ohon, xchi.

²³ Ilawil, te yic'al-ha'al yu'un Jehová ya xloc' bahel soc ilimba; tulan yic'al ha'al ya xc'oht ta sjolic te mach'atic chopolique.

²⁴ Ma ba ya xlahmaj te sc'ahc'al yilimba Jehová ha to c'alal ya xc'oht ta pasel yu'un te bin snopoj ta yo'tane. Ta patil bahel ya xc'oht ta awo'tanic ini.