Jeremías 25 - Bible in Tzeltal Bachajón

Lajuneb schanwinic (70) ha'bil chuquel bahel

¹ Tal sc'op Jehová ta stojol Jeremías sc'oblal spisil te pueblo yu'un Judá ta schanebal ha'bil ay ta ajwalil yu'un Judá a te Joacim snich'an Josías, ha te shahchibal ha'bil ay ta ajwalil yu'un Babilonia a te Nabucodonosor.

² Te jalwanej Jeremías hich la yalbe spisil te pueblo Judá soc te mach'atic nahinemic ta Jerusalén:

³ C'alal ta yoxlajunebal (13) ha'bil te ay ta ajwalil yu'un Judá te Josías snich'an Amón c'alal ora yo'tic, ha oxeb scha'winic (23) ha'bil, talem ta jtojol te sc'op Jehová, soc spisil ora la jc'oponlanex, pero ma ba la awa'iyic.

⁴ Aunque te Jehová bayel buelta la sticon tal ta atojolic te a'batetic yu'un, ha te jalwanejetic, ma ba la awa'iyic, ma ba la awich'ic ta cuenta.

⁵ Hich la yalic: Ihquitayahic hilel te chopol be awu'unic soc te chopol a'teliletic awu'unic, hich ya xhu' ya x'ayinex ta q'uinal te la ya'beyex awu'untayic sbahtel q'uinal te Jehová, ha'ex soc te ame'atatique.

⁶ Ma me xat'unic bahel yantic diosetic yu'un yac awac' abahic ta a'batinel yu'unic soc yac ach'uhuntayic; soc ma me xawac' ilinucon ta scaj ya'tel ac'abic. Hich mayuc bin chopol ya jpasbe, xchihic.

⁷ Pero ma ba la awa'iybonic te jc'ope, xchi te Jehová, la awac' ilinucon ta scaj te bin la apas ta ac'abic, te hich tal te bin chopol ta atojolique.

⁸ Ha yu'un hich ya yal te Jehová te scuentahinej spisil: Te bin ut'il ma ba la awa'iybonic te jc'ope,

⁹ ya jticon tal spisil ta chahp ants-winiquetic ta stojol norte soc te ca'bat Nabucodonosor ajwalil yu'un Babilonia, xchi te Jehová, ya quic'ticlan tal ta scontrahinel te q'uinal ini soc te mach'atic nahinemic tey a, soc ta scontrahinel spisil te nacionetic te ayic ta sjoyobal. Ya jinticlan ta jc'axel, soc ya cac' ta tse'layel, ta labanel soc te stalel jimbil ya xhilic.

¹⁰ Ya cac' ch'ayuc bahel te sc'op tse'el-o'tanil soc yutsil-o'tanil, te sc'op mach'atic slecolinej sbahic, te sc'op molino soc te sc'ahc'al tsumbil c'ahc'.

¹¹ Spisil te q'uinal ini ya xc'atp'uj ta jimbil q'uinal; soc te nacionetic ini ya me yac' sbahic ta a'batinel ta stojol te ajwalil yu'un Babilonia lajuneb schanwinic (70) ha'bil.

¹² Te c'alal ya sts'acay te lajuneb schanwinic (70) ha'bil, ya ca'be castigo te ajwalil yu'un Babilonia soc te nación yu'un, ha te sq'uinal te caldeohetic, ta scaj smulic, xchi te Jehová, soc ya jc'atp'un ta jochol jimbil q'uinal te stalel ya xhile.

¹³ Ya cac' ya xc'oht ta stojol te q'uinal spisil te bintic caloj ta scontrahinel, spisil te bintic ts'ihbabil ta libro ini, te bin yaloj te Jeremías ta scontrahinel spisil te nacionetique.

¹⁴ Ha nix hich ya x'ochic ta mosohil yu'un bayel nacionetic soc muc'ul ajwaliletic; ya ca'be stojolic ha chican bin spasojic soc te ya'tel te sc'abique, xchi.

Te copa yu'un ilimba ta stojol nacionetic

¹⁵ Hich la yalbon te Jehová, te Dios yu'un Israel: Tsacbon ta jc'ab te copa nojel ta vino yu'un quilimba, a'beya yuch'ic spisil te nacionetic te banti ya jticonat bahele.

¹⁶ Ya me yuch'ic, xhanlajanic soc ya sohc sjolic ta scaj te espada ya jticon talel ta stojolic, xchi.

¹⁷ Ha yu'un la jtsac te copa ay ta sc'ab te Jehová, la jca'be yuch'ic spisil te nacionetic te banti la sticonon bahele:

¹⁸ ta Jerusalén, ta pueblohetic yu'un Judá, ta stojol te ajwaliletic soc te príncipaletic yu'une, scuenta yu'un jimbil soc jochol ya xc'ohtic, ya yich'ic tse'layel, labanel, soc halel ma lecuc sc'oblalic, hich te bin ut'il ta ora ini.

¹⁹ La jca'be yuch' te faraón ajwalil yu'un Egipto, te a'batetic yu'un, te príncipaletic soc spisil te pueblo yu'un,

²⁰ soc spisil te jyanlumetic ta yohlilic; spisil te ajwaliletic yu'un te sq'uinal Uz soc spisil te ajwaliletic yu'un te sq'uinal filisteohetic: ha yu'un Ascalón, Gaza, Ecrón soc te mach'atic hilemic ta Asdod;

²¹ te Edom, Moab soc Amón;

²² spisil te ajwaliletic yu'un Tiro soc Sidón; te ajwaliletic yu'un te pueblohetic ta ti'mar ta sjehchelul;

²³ te Dedán, Tema soc Buz, soc spisil te mach'atic ya squits' stsotsel sjolic,

²⁴ spisil te ajwaliletic yu'un Arabia; spisil te ajwaliletic yu'un chahpalchahp pueblohetic te nahinemic ta jochol taq'uin q'uinal;

²⁵ spisil te ajwaliletic yu'un Zimri, Elam soc Media;

²⁶ spisil te ajwaliletic ta stojol norte, te nopol ayic soc namal ayic, ta tuhlultuhl, spisil te ajwaliletic te ayic ta bahlumilal. Ta slajibal ya me yuch' te ajwalil yu'un Babilonia.

²⁷ Soc hich me xawalbe: Hich yaloj te Jehová te scuentahinej spisil, te Dios yu'un Israel: Uch'anic, yacubanic soc xehenanic, yahlanic, ma xhahchexix, ta scaj te espada te ya jticon tal ta atojolique.

²⁸ Teme ma sc'an ya stsaquic te copa ay ta ac'ab yu'un ya yuch'ic bin ay tey a, hich me xawalbe: Hich yaloj te Jehová te scuentahinej spisil: ¡Ya me awuch'ic!

²⁹ Como ya xhahchon ta spasel bin chopol ta stojol te pueblo banti ya yich' halel te jbihile. ¿Yu'un bal ya xcolex te ha'exe? Ma ba ya xcolex, como ya jticon tal espada ta stojol spisil mach'atic nahinemic ta q'uinal, xchi te Jehová te scuentahinej spisil.

³⁰ Ha'at, Jeremías, halbeya spisil te c'opetic ini: Te Jehová xnilet ya xc'opoj c'alal ta toyol, c'alal ta ch'ul awilal yu'un ya xc'opoj tal. Tulan xnilet ya xc'opoj ta scontrahinel te jtsohb tuminchijetic yu'une, ya me x'awon hich te bin ut'il mach'atic ya sp'e'ic ta teq'uel ts'usub, ta scontrahinel spisil mach'atic nahinemic ta q'uinal.

³¹ Te yip sc'op ya xc'oht c'alal ta sti'il te bahlumilal, como te Jehová ya yich' ta c'op te nacionetique; ya xhahch schahpan spisil ch'ich'-baq'uet, soc ya yac' lajuc ta espada te mach'atic chopolic, xchi te Jehová.

³² Hich yaloj te Jehová te scuentahinej spisil: Ya me xc'ax bahel tulan wocol ta stojol jujun nación; ya xhahch tulan ic'al-ha'al c'alal ta sti'il bahlumilal, xchi.

³³ Te mach'atic ya x'ac'otic ta milel yu'un Jehová ta hich ora, limil ya xhilic ta jujujehch sti'il te bahlumilale. Ma ba ya yich'ic oq'uetayel, ma ba ya yich'ic tsobel o muquel, limil ya xhilic ta lum hich te bin ut'il stsa' chambahlam.

³⁴ ¡Oc'anic, jcanan-tuminchijetic, awonanic! ¡Bahlana abahic ta sts'ubil lum, ha'ex jtsobawex yu'un te jtsohb tuminchijetic! yu'un c'ohtix yorahil te yac awich'ic milel soc puhquel bahel. Ya me xyahlex hich te bin ut'il t'ujbil vaso.

³⁵ Te jcanan-tuminchijetic mayuc banti ya x'ahnic, te jtsobawetic yu'un te jtsohb tuminchijetic mayuc banti ya x'ahnic bahel.

³⁶ A'iybeya awa'iy yaw te jcanan-tuminchijetic, te ahcan yu'un te jtsobawetic yu'un te jtsohb tuminchijetic, como te Jehová la slajimbe te aquiltic yu'unique.

³⁷ Te t'ujbil aquiltic ya yich'ic lajinel ta scaj sc'ahc'al yilimba te Jehová.

³⁸ Hich loc' tal te bin ut'il choj ta sch'en, jc'axel jihn te q'uinal yu'unic ta scaj yilimba te j'uts'inwanej, ta scaj sc'ahc'al te yilimbahe.