Jeremías 14 - Bible in Tzeltal Bachajón

Sc'oblal ya xtaquij te q'uinal

¹ Ha te sc'op Jehová te tal ta stojol Jeremías sc'oblal te ya xtaquij te q'uinale:

² Yac ta oq'uel te Judá, te ochibaletic yu'un ya xlaj yipic; huculic ta lum ta mel-o'tan soc ya xtohy mohel yawic te Jerusalén.

³ Te mach'atic ay sc'oblalic ya sticonic bahel te a'batetic yu'unic ta yich'el tal ha'; ya xbahtic ta yawil ha', pero ma ba ya stahic ha' tey a. Jochol yawil ha' yu'unic ya suhtic tal; ya xq'uexawic, ma sna'ic bin ya spasic, ya smuc sjolic yu'un.

⁴ Ya sjam sba te q'uinal ta scaj te ma ba la yac' ha'al; te j'a'teletic ma sna' bin ya spasic, ya smuc sjolic yu'un.

⁵ Te yantsilel chij ta ha'maletic ya xtohc soc ya yihquitay hilel yalatac, como mayuc aquiltic.

⁶ Te ha'mal burrohetic ya scohtan sbahic ta toyol jochol q'uinal, ya yich'ic ic' hich te bin ut'il ha'mal ts'i'etic; ya x'ihc'ub q'uinal ya yilic, como mayuc ha'maletic, xchi te Jehová.

⁷ Aunque ya yalotcotic te jmulcotic, ¡pasa, Jehová, ta scuenta yich'el ta muc' te abihile! Como p'ohlem te toybahil cu'uncotic, jtahoj jmulcotic ta atojol.

⁸ Ha'at smuc'ulat-o'tanil yu'un Israel, ha Jcoltaywanejat yu'un ta yorahil wocol, ¿bin yu'un te hich c'ohemat te bin ut'il jyanlum ta q'uinal, te hichat te bin ut'il jbehyom te junax ahc'abal ya xwayat?

⁹ ¿Bin yu'un hichat te bin ut'il jtuhl winic te ma sna' bin ya spas, te hichat te bin ut'il jtuhl soldado te ma xhu' ya xcoltaywan? Pero ayat ta cohlilcotic, Jehová, quich'ojbatcotic te abihile, ma me xapihtesotcotic.

¹⁰ Te Jehová hich la yalbe sc'oblal te pueblo ini: Bayel la smulanic te bayuc nax ya xbahtic, ma ba la scom yoquic. Ha yu'un te Jehová ma lecuc yo'tan yu'unic; ya me sna'beyix te smulic soc ya me yac'ticlambe castigo yu'un, xchi.

¹¹ Hich la yalbon te Jehová: Ma me xac'oponon yu'un te lecuc ya xc'oht te pueblo ini.

¹² Aunque ya scom swe'elic, ma ba ya ca'iybe yawic, aunque ya yaq'uic scohtol chic'bil mahtaniletic soc mahtanil harina ma ba ya jtsac. Ya me jlajinlan ta espada, ta wi'nal soc ta jmilawal-chamel, xchi te Jehová.

¹³ Hich la jcal: ¡Ah, Cajwal Jehová! hich ya xhalbotic yu'un te jalwanejetic: Ma ba yac awilic te espada soc ma ba ya xtal wi'nal ta atojolic, ho'on ya ca'beyex te smelelil lamal q'uinal ta lugar ini, xchihic.

¹⁴ Ha yu'un hich la yalbon te Jehová: Lotil te bin ya yalic te jalwanejetique. Ma ba jticonej, ma ba calbeyej mandar, soc ma ba jc'oponej. Ha ya yalbeyex lotil nahalsitil, na'ojel, tojol c'op soc lo'loywanej te ay ta yo'tanique.

¹⁵ Ha yu'un hich yaloj Jehová sc'oblal te jalwanejetic te ay bin ya yalic ta scuenta te jbihil, te ma ba jticonej, soc te hich ya yalic: Ma xtal espada o wi'nal ta q'uinal ini, te xchihique. ¡Ya xlajic ta espada soc ta wi'nal te jalwanejetic ini!

¹⁶ Soc te pueblo te la yalbeyic te c'op ini ya me yich'ic ch'ojel loq'uel ta callehetic yu'un Jerusalén ta scaj wi'nal soc espada, mayuc mach'a ya xmucotic yu'un o te yihnamic o te ach'ix-queremetic yu'unique. Ya jmalbe ta stojolic te schopolilique.

¹⁷ Ya me awalbe te c'op ini: Ac'a maluc loq'uel ya'lel jsit ta c'ahc'al ahc'abal, ma xquehchaj, como te ach'ix yu'un te pueblo cu'un c'ax xiweltic sba swocol, como bayel sc'uxul te yehchene.

¹⁸ Teme ya xloc'on bahel ta aquiltic, ya quilticlan te mach'atic lajic ta espada; teme ya x'ochon bahel ta pueblo, ya quilticlan te jchameletic ta scaj wi'nal. Te jalwanej soc te sacerdote bayuc ya xbehenic ta q'uinal, mayuc bin ya sna'ic, xchi.

¹⁹ ¿Jc'axel bal ach'ayoj bahel te Judá? ¿Ap'ajoj bal te Sión? ¿Bin yu'un la awehchentesotcotic scuenta yu'un ma xhu' ya xlecubotcotic? La jmahliycotic lamal q'uinal, pero mayuc bin lec la jtahcotic. La jmahliycotic yorahil poxtayel, pero ha nax ay tulan xiwel.

²⁰ Jehová, jna'ojcotic te bin chopol jpasojcotic soc te smul te jme'jtatcotic, como jtahoj jmulcotic ta atojol.

²¹ Ta scuenta yich'el ta muc' abihil ma xach'ayotic bahel, ma me xapehc'ambe sc'oblal te huctajibal awu'un te ay yutsilal. Na'a me te c'op la achap ta jtojolcotic, ma me xalajimbe sc'oblal.

²² ¿Ay bal loc'ombahetic yu'un te nacionetic te ya xhu' ya yac' tal ha'al? ¿Ya bal sticon tal ha'al te ch'ulchan ta stuquel nax? ¿Ma bal ha'ucat, Jehová, te Diosat cu'untique? Ha'at nax atuquel te yac aticon talel, ha yu'un ya jmahliyatcotic como ha'at yac apas spisil ini.