Jeremías 10 - Bible in Tzeltal Bachajón

Te lotil diosetic soc te cuxul Dios

¹ A'iya awa'iy, pueblo Israel, te sc'op Jehová te ya yalbate.

² Hich ya yal te Jehová: Ma me xanopbeyic stalel te yantic nacionetic, soc ma me xaxi' te señahiletic ta ch'ulchan, aunque ha ya xi'ic te nacionetique.

³ Como ma xtuhun te stalel te pueblohetic: Ya sts'etic te' ta tohyem te'etic, te mach'a ya sna', ya schahpan ta cincel;

⁴ ya sch'alic ta plata soc ta oro, ya ya'be yich' yip ta lawux soc martillo scuenta yu'un ma ba ya stij sba a.

⁵ Te loc'ombahetic yu'unic ma xc'opojic hich te bin ut'il xutax ta banti ts'umbil melón; ya x'ich'otic bahel yu'un ma xhu' ya xbehenic. Ma me xaxi'ic, mayuc bin chopol soc mayuc bin lec ya xhu' ya spasic, xchi te Jehová.

⁶ Mayuc mach'a pajalat soc, Jehová, muc'at atuquel, soc ay bayel yu'el te abihile.

⁷ ¿Ay bal mach'a ma ba ya xi'at, ha'at te Ajwalilat yu'un te nacionetique? Ha'at awu'un te xi'ele, como ta yohlil spisil mach'atic p'ijic ta nacionetic soc ta spisil slumalic, mayuc mach'a pajalat soc.

⁸ Spisilic sonsohetic soc ma sna'ic q'uinal; nohptesbilic yu'un loc'ombahetic pasbil ta te' te ma xtuhunique.

⁹ Ya yich' tal tembil plata ta Tarsis soc oro ta Ufaz; ha ya'tel te jten-taq'uin soc j'ultesej-taq'uin; ya ya'beyic slap yax soc chi'in-yaxal c'u'ul, ta spisilic chahpambilic yu'un te mach'atic ya sna'ic spasele.

¹⁰ Yan te Jehová ha Dios ta melel, ha cuxul Dios soc Muc'ul Ajwalil scuenta sbahtel q'uinal. Ya xnihc te lumq'uinal c'alal ya x'ilin, te nacionetic ma xcuhch yu'unic te yilimbahe.

¹¹ Hich me xawalbeyic: Te diosetic te ma ba la spasic te ch'ulchan soc te bahlumilal, ya me xch'ayic ta jc'axel ta bahlumilal soc ta ye'tal ch'ulchan, xchihat.

¹² Dios la spas ta yu'el te lumq'uinal, ta scuenta sbihil la ya'be yich' yip te bahlumilal soc ta scuenta sp'ijil yo'tan la slim bahel te ch'ulchane.

¹³ C'alal ya xc'opoj, xju'et ya xc'opoj ha'etic ta ch'ulchan; ya yac' te ya xmo bahel tocal c'alal ta sti'il bahlumilal. Ya yac' te ya xtihl tsantsehwaletic ta yohlil te ha'al, soc ya sloq'ues tal ic' ta yawil.

¹⁴ Spisil ants-winiquetic sonsohic, ma sna'ic q'uinal; spisil te j'ultesej-taq'uin ya xq'uexawanic yu'un te loc'omba yu'une; como lotil te bin spasoje, ma ba cuxul.

¹⁵ Ma xtuhun, tojol a'tel; ta yorahil yich'el castigo, ya xlaj.

¹⁶ Ma hichuc ay te Mach'a yu'un Jacob, como ha Jpaswanej yu'un spisil te bintic ay, soc te Israel, te ha mero yu'un stuquel; ¡Jehová te scuentahinej spisil, xchi te sbihile!

Jinel yu'un Judá

¹⁷ Tsoba abiluc, ha'at te joytaybilat ta guerra,

¹⁸ yu'un hich yaloj te Jehová: Ta ora ini hich ya jch'oj bahel te bin ut'il jihmuch'il te mach'atic nahinemic ta lumq'uinal; ya cac'ticlambe tulan swocolic scuenta yu'un ya ya'iyic, xchi.

¹⁹ ¡Obol jba yu'un te jwocole! Mero c'ux te quehchene. Pero hich la jcal ta co'tan: Ha chamel cu'un ini, ya sc'an ya xcuhch cu'un.

²⁰ Jihnemix te nahilpac' cu'un, tuch'emiquix spisil te jchihale; la yihquitayonic hilel te jnich'nab, ch'ayiquix bahel; mayuc mach'a ya shachbon te jnahilpac', mayuc mach'a ya sjohc'ambon te paq'uetic cu'un.

²¹ Te jcanan-tuminchijetic ma sna'ic q'uinal, ma ba ya slehic te Jehová; ha yu'un ma ba ya stahic yutsil slequilic soc puhquemiquix bahel spisil te tuminchijetic yu'unique.

²² ¡A'iya awa'iyic, ay bin hul ta halel! Bayel xjuyet yac ta talel ta q'uinal ta stojol norte, yu'un ya sutp'inic ta jochol q'uinal te pueblohetic yu'un Judá, ha sna ha'mal ts'i'etic ya xc'oht.

²³ Jna'oj, Jehová, te ants-winic ma ha'uc scuentahinej te be yu'une, ma ha'uc yu'un te ya yal banti ya xbehen.

²⁴ ¡Tojobtesawon, Jehová, pero soc stojil chahpanel, ma socuc awilimba, yu'un ma ba yac alajinon!

²⁵ Mala cohel awilimba ta stojol te nacionetic te ma sna'bat aba, ta stojol te pueblohetic te ma ba ya sc'oponat ta abihile; como la slajinic te Jacob, jc'axel la sbiq'uic soc la sjochambeyic hilel te slumale.