Jeremías 1 - Bible in Tzeltal Bachajón

Te iq'uel soc ticonel yu'un Jeremías

¹ Ha sc'op Jeremías snich'an Hilcías, jtuhl sacerdote yu'un te sacerdotehetic ta Anatot te ay ta sq'uinal Benjamín.

² Ha te sc'op Jehová te tal ta stojol Jeremías ta yoxlajunebal (13) ha'bil ay ta ajwalil yu'un Judá a te Josías snich'an Amón.

³ Ha nix hich tal ta yorahil te ay ta ajwalil yu'un Judá te Joacim snich'an Josías, ha to c'alal ta slajibal te sbuluchebal (11) ha'bil ay ta ajwalil Sedequías snich'an Josías, te c'alal ic'otic bahel ta chuquel te swinquilel Jerusalén, ta yo'ebal u.

⁴ Tal ta jtojol te sc'op Jehová, hich la yal:

⁵ Te c'alal ma to pasbilat cu'un ta sch'uht a te anan, la jna'bat aba; te c'alal ma to x'ayinat a, parte la jcac'at; la jca'bat awa'tel ta jalwanej ta stojol te nacionetique, xchi.

⁶ Hich la jcal: ¡Ay, Cajwal Jehová! Ma jna' c'op, como queremon to, xchihon.

⁷ Pero la yalbon te Jehová: Ma me xawal te queremat to; yu'un ya me xbahat ta stojol spisil mach'atic ya jticonat bahel, soc ya me awal spisil te bin ya calbat ta mandar.

⁸ Ma me xiwat ta stojolic, como joquinejat yu'un ya jcoltayat, xchi te Jehová.

⁹ Hich te Jehová la yac' tal sc'ab, la spicbon que soc hich la yalbon: La jca'bat te jc'op ta awe.

¹⁰ Ilawil, yo'tic ya ca'bat awa'tel ta stojol nacionetic soc ta banti ya xcuentahinwan ajwaliletic, yu'un yac abul loq'uel soc yac ajin cohel, yu'un yac alajin soc yac atuhquiy, yu'un yac apas soc yac ats'un, xchi.

¹¹ Tal sc'op Jehová ta jtojol, hich la yal: Jeremías, ¿bin yac awil? xchi. Ya quil sc'ab almendro, xchihon.

¹² La yalbon te Jehová: Lec la awil, yu'un ya me quil te ya xc'oht ta pasel te jc'ope, xchi.

¹³ Tal sc'op Jehová ta jtojol ta schebal buelta, hich la yal: ¿Bin yac awil? xchi. Ya quil oxom te yac ta buhl, ya c'an maluquix tal yilel c'alal ta stojol norte, xchihon.

¹⁴ La yalbon te Jehová: C'alal ta stojol norte ya xmal tal te bin chopol ta stojol spisil mach'atic nahinemic ta q'uinal ini.

¹⁵ Yac quic'bel tal spisil ta chahp ants-winiquetic te ban c'alal ya xcuentahinwan ajwaliletic ta stojol norte, xchi te Jehová. Ya me xtalic te ajwaliletic yu'unic, ya me schahpan shuctajibic ta yochibal te Jerusalén ta stojol spisil sts'ahcul te ay ta sjoyobal soc ta scontrahinel spisil te pueblohetic yu'un Judá.

¹⁶ Ya cal te castigo ya xc'oht ta stojolic ta scaj spisil schopolilic yu'un te la yihquitayon ta yo'tanic, la schic'beyic pom yantic diosetic soc la sch'uhuntayic te bintic la spas ta sc'abic.

¹⁷ Te ha'ate, chahpana aba, tehc'ana aba soc halbeya spisil te bintic ya calbat ta mandar. Ma me xiwat ta stojolic, yu'un teme yac axi'e, ya jxiwtesat ta stojolic.

¹⁸ Yo'tic hich ya cac'at te bin ut'il pueblo te ay sts'ahcul, hich te bin ut'il oy-taq'uin soc ts'ahc pasbil ta bronce, yu'un scontrahinel spisil te q'uinal ini, te ajwaliletic yu'un Judá, te príncipaletic, sacerdotehetic soc spisil te swinquilel te q'uinale.

¹⁹ Ya me ya'bat guerra, pero ma ba ya stsalat, como ya joquinat yu'un ya cac'at ta libre, xchi te Jehová.