Isaías 9 - Bible in Tzeltal Bachajón

Ya x'ayin te Mesías soc ya x'och ta Ajwalil

¹ Pero ma spisiluc ora ay yihc'al q'uinal yu'un te mach'a ay ta mel-o'tan. Ta namey Dios la spehc'an te sq'uinal Zabulón soc te sq'uinal Neftalí, pero ta patil ya me ya'be yutsilal te sbehlal te mar, ta jehch ha' Jordán, te Galilea yu'un te jyanlumetique.

² Te pueblo te behen ta yihc'al q'uinal la yiliquix muc'ul sacal q'uinal; te mach'atic nahinemic ta q'uinal yu'un yaxinal lajel, tihl sacal q'uinal ta stojolic.

³ La awac' p'ohluc te ants-winiquetic soc la awa'be bayel yutsil yo'tanic. Tse'el yo'tanic ta atojol hich te bin ut'il ta yorahil stsobel sit awal-ts'unubil, hich te bin ut'il c'alal ya spucbe sbahic te bintic pojbile.

⁴ Como la alajimbe te yugo yu'unic te al, ha te te' ay ta snehquelic soc te bastón yu'un te mach'a uts'inot yu'un, hich te bin ut'il ta yorahil te jihn te Madián.

⁵ Spisil te step slapojic te soldadohetic ta guerra soc spisil sc'u' spaq'uic mulbilic ta ch'ich', ya me yich'ic chiq'uel, ha si' ya xc'ohtic yu'un c'ahc'.

⁶ Como ayinemix jtuhl alal ta jcuentatic, a'bilotic jtuhl nich'anil, ha ya xc'oht ta stojol te cuentahinwanej. Hich ya x'a'bot sbihil: C'ax lequil J'ac'-o'tanil, Dios te ay yu'el, Tatil sbahtel q'uinal, Snich'an ajwalil yu'un lamal q'uinal.

⁷ Te ya xmuc'ub te cuentahinel yu'un soc te lamal q'uinal yu'une, mayuc slajibal ta shuctajib David soc ta ban c'alal scuentahinej; ha ya shach soc ya ya'be yip ta scuenta stojil chahpanel soc toj bin ay ta pasel ta ora ini soc ta sbahtel q'uinal. Ha ya sc'ohtes ta pasel ini te xut'et yo'tan te Jehová te scuentahinej spisil.

Yilimba Jehová ta stojol Israel

⁸ Te Cajwaltic la sticon bahel c'op ta stojol Jacob, ha c'oht ta stojol Israel.

⁹ Ya me sna'ic spisil te pueblo, ha te Efraín soc te mach'atic nahinemic ta Samaria, te hich ya yalic ta scuenta toybahil soc ta scuenta te stoyoj sbahic ta yo'tanic:

¹⁰ Ch'ayemiquix cohel te ladrillohetic, pero ya jcha'pastic xan soc walubil tonetic. La sbojticlambeyic te sicómoro-te', pero ya ca'betic sjelolin ta cedro, te xchihique.

¹¹ Pero te Jehová ya shachbe tal scontra te Rezín, ya stsobticlan te scontratac:

¹² ha te siriahetic ta banti ya xloc' tal c'ahc'al soc te filisteohetic ta smahlib c'ahc'al; jamal yehic ya me sbiq'uic cohel te Israel. Ta spisil ini, ma ba lahmaj yilimba te Jehová, shachoj to te sc'ab ta yaq'uel castigo.

¹³ Pero te pueblo ma ba la suhtes yo'tanic ta stojol te mach'a a'bot castigo yu'une, ma ba la slehic te Jehová te scuentahinej spisil.

¹⁴ Ha yu'un te Jehová ta junax c'ahc'al ya me xot'be sjol soc sne, ya'binal xahn soc jalal ta Israel.

¹⁵ Te sjol, ha te mamaletic soc te mach'atic ich'bilic ta cuenta, te sne, ha te jalwanejetic te ya yaq'uic ta nopel lot.

¹⁶ Te jcuentahinwanejetic ya showiytesic te pueblo ini ya xch'ayic te mach'atic cuentahimbil yu'unique.

¹⁷ Ha yu'un te Jehová ma ba lec yo'tan yu'un te ach'ix-queremetic yu'unic, soc ma ba ya sna'be yo'bolil sbahic te me'ba' alaletic soc te me'ba' antsetic, como ta spisilic ma lecuc yo'tanic soc chopolic, spisilic mayuc scuentahil bin ya yalic. Ta spisil ini, ma ba lahmaj yilimba te Jehová, shachoj to te sc'ab ta yaq'uel castigo.

¹⁸ Como te bin chopol, ya xtihl hich te bin ut'il c'ahc', ya slajin pimil ch'ixileltic soc ch'ixetic, ya schic' te pimil tohyem te'etic, xtomet ya xmo bahel hich te bin ut'il sutu-ic'.

¹⁹ Ta scuenta yilimba te Jehová te scuentahinej spisil ya stsac c'ahc' te lumq'uinal, ha ya'malel c'ahc' ya xc'oht te pueblohe; mayuc mach'a ya sna'be yo'bolil sba te yermano.

²⁰ Ya slajinic te bin ay ta swa'el-c'ab, pero ay to swi'nalic; ya swe'ic bin ay ta sq'uexam-c'ab, pero ma ba ya xnoj sch'uhtic yu'un. Jujutuhl ya swe'be sbaq'uetal te spat-xuhc:

²¹ te Manasés ya slajin te Efraín, te Efraín ya slajin te Manasés, schebalic ya scontrahinic te Judá. Ta spisil ini, ma ba lahmaj yilimba, shachoj to te sc'ab ta yaq'uel castigo.