Isaías 8 - Bible in Tzeltal Bachajón

Ha me xiwel awu'unic te Jehová

¹ Hich la yalbon te Jehová: Ich'a muc'ul tabla, ts'ihbaya tey a ta letrahetic te ya xhu' ta ilel: Maher-salal-hasbaz, te xchihe.

² La jquic' tal te sacerdote Urías soc te Zacarías snich'an Jeberequías scuenta testigohetic te jun yo'tanic.

³ Patil la joquin ta wayel te quihnam te jal-c'op ants, hahch yal, ayin squerem-al. Hich la yalbon te Jehová: A'beya sbihilin Maher-salal-hasbaz.

⁴ Como te c'alal ma to sna' yalel a: jtat soc jnan, te quereme, te sc'ulejal te Damasco soc te bintic pojbil yu'un Samaria ya me x'ich'otic bahel ta stojol te ajwalil yu'un Asiria, xchi.

⁵ La sc'oponon yan buelta te Jehová, hich la yal:

⁶ Te pueblo ini, ta scaj te ma ba la sc'an te ha' te ay ta Siloé te c'un ya xbehen, soc te tse'el yo'tan yu'un te Rezín soc te snich'an Remalías,

⁷ ha yu'un te Jehová ya me yac' mohuc tal ta stojolic snojel ha' yu'un te muc'ul-ha' Éufrates te bayel yipic, ha te ajwalil yu'un Asiria soc spisil te yipe. Ya xmahl loq'uel ta be-ha' yu'un, ya xloc' bahel spisil ta sti'il,

⁸ ya xc'ax bahel ta stojol Judá, ya xmulot yu'un, ya xnoj c'alal ta snuc'. Ya slich' bahel xic', ya snojesbat sjamalil aq'uinal, ha'at Emanuel, xchi.

⁹ Tsoba abahic pueblohetic, ya me awich'ic jinel; a'iya awa'iyic apisilic te ayex ta namal q'uinal: chuca ach'uhtic, ya me awich'ic lajinel; chahpana abahic, ya me awich'ic jinel.

¹⁰ Nopa bin yac apasic, pero ya me yich' jinel; c'opojanic, pero ma ba ya xc'oht ta pasel, como sjoquinejotcotic te Diose.

¹¹ Hich la sc'oponon te Jehová soc yip sc'ab, soc la yalbon te ma me jt'un te be yu'un te pueblo ini, hich la yalbon:

¹² Ma me hichuc yac awalic te ha muquen chapbil-c'op spisil te bin ya yal te pueblo ini te ha muquen chapbil-c'op. Ma me xaxi'ic te bin ya xi'ic, ma me xiwat.

¹³ Ya me awalic te ha Ch'ul Dios te Jehová te scuentahinej spisil; ha me xaxi'ic, ha me xiwel awu'unic ya xc'oht.

¹⁴ Ha ch'ul awilal ya xc'oht; pero ha ton scuenta c'ohchinojibal ya xc'oht soc ha jyahlteswanej ya xc'oht ta stojol te cheb na yu'un Israel, ha lazo soc syacol te mach'a nahinem ta Jerusalén.

¹⁵ Bayel mach'atic ya sc'ohchinic, ya xyahlic soc ya xjihnotic; ya yich'ic chuquel, tsacbil ya xhilic, xchi.

¹⁶ Chuca te testigo-c'op, a'beya sellohil te ley ta yohlil te jnopojeletic cu'une.

¹⁷ Ya jmahliy te Jehová te la snac' sit yelaw ta stojol te sna Jacob; ha ya smuc'ulin co'tan stuquel.

¹⁸ Ho'on soc te jnich'nab te la ya'bon te Jehová ha señahotic soc jchahp a'telilotic ta stojol Israel te la yac' te Jehová te scuentahinej spisil, te nahinem ta wits Sión.

¹⁹ Teme hich ya yalbeyex: Joc'obeyahic te jmonawetic soc te jna'ojeletic te ya xc'opojic ta sajsaj-c'op, teme xchihique, hich yac awalbe: Te pueblo ¿ma bal yacuc sjoc'obe te Dios yu'une? ¿Ya bal sjoc'obe te mach'atic chamenic ta scuenta te mach'atic cuxulic? xchihan me.

²⁰ ¡Ac'a bahtuquic ta stojol te ley soc te testigo-c'op! Teme ma hichuc ya xc'opojic, ha ta scaj te ma ba sacuben q'uinal yu'unique.

²¹ Ay swocolic soc swi'nalic a ya xc'axic ta q'uinal; c'alal ay swi'nalic a ya me x'ilinic, ya x'ilinic soc ya yalbeyic chopol sc'oblal te ajwalil soc te Dios yu'unique.

²² Ya me yilic te q'uinal, ha ya yilic wocol soc yihc'al q'uinal, pimil yihc'al q'uinal soc mel-o'tan; ya xch'ojotic bahel ta yihc'al q'uinal.