Isaías 7 - Bible in Tzeltal Bachajón

Sc'op Isaías ta stojol Acaz

¹ C'alal ay ta ajwalil yu'un Judá a te Acaz snich'an Jotam, snich'an Uzías, te Rezín ajwalil yu'un Siria, soc Peka snich'an Remalías, ajwalil yu'un Israel, mohic bahel ta ya'beyel guerra te Jerusalén, pero ma ba hu' yu'unic te la yu'untayique.

² C'oht c'op ta stojol te sts'umbal David, hich halbot: Te Siria schapoj sc'op soc Efraín, xchi. Ha yu'un te ajwalil soc te pueblo yu'un hahchic ta nihquel hich te bin ut'il ya xyuc'ot ta ic' te te'etic ta ha'mal.

³ Ha yu'un te Jehová hich la yalbe te Isaías: Loc'an bahel ta stahel Acaz, ha'at soc anich'an Sear-jasub, ta slajibal bahel te pasbil be-ha' yu'un te estanque ta ahc'ol, ta sbehlal te Sq'uinal Jsac'omajel,

⁴ hich me xawalbe: Tsahtaya aba soc lamaluc q'uinal yac awa'iy; ma me xiwat, ma me xnihc awo'tan yu'un te cheb xutunte' ini te xtomet sch'ahilel, yu'un te sc'ahc'al yilimba te Rezín soc te Siria soc te snich'an Remalías.

⁵ Te Siria, Efraín soc te snich'an Remalías, la schahpanic te ya spasbat te bin chopol, hich la yalic:

⁶ Ochucotic bahel ta Judá, ya jxiwtestic; ya jpuc jbahtic a soc ya cotsestic ta ajwalil yu'unic te snich'an Tabeel, xchihic.

⁷ Ha yu'un hich ya yal te Jehová, te Cajwaltic: Ma hichuc ya xc'oht ta pasel; ma hichuc ya xc'oht.

⁸ Como te jolal yu'un Siria, ha te Damasco, soc te jolal yu'un Damasco, ha te Rezín. Ma to sta ho'eb schanwinic (65) ha'bil a ya yich' jinel te Efraín, ma pueblohuc ya xhil.

⁹ Te jolal yu'un Efraín, ha te Samaria, te jolal yu'un Samaria, ha te snich'an Remalías. Teme mayuc sch'uhunel awo'tanic, ma ba ya xhilex, xchi.

¹⁰ Yan buelta te Jehová hich la yalbe te Acaz:

¹¹ C'ambeya seña te Jehová te Dios awu'un, chican teme ta sc'ubulil bahlumilal o ta stoyolil ch'ulchan, xchi.

¹² La sjac' te Acaz: Ma ba ya jc'ambe; ma ba ya jtsaj te Jehová, xchi.

¹³ Ha yu'un hich la yal te Isaías: A'iya me awa'iy ta ora, sna David: ¿Ma bal tic'uc yac awa'iy a te yac awuts'in te ants-winiquetic, ya bal awuts'in ec te Dios cu'une?

¹⁴ Ha yu'un, ha nix Jehová ya ya'beyex señahil: Ya me xhahch yal te ach'ix, ya me x'ayin squerem-al, Emanuel sbihil ya xc'oht yu'un.

¹⁵ Ya me slo' tatuben leche soc chab te c'alal ya sna' stsahtayel te bin ma lecuc soc te bin leque.

¹⁶ Te c'alal ma to sna' tsahtayel a te banti lec soc te banti ma lecuc, jochol ya xhil sq'uinal te cha'tuhl ajwaliletic te axi'oje.

¹⁷ Te Jehová ya me yac' tal wocol ta atojol, ta stojol alumal soc ta stojol te sna te atat te mayuc banti hich c'ohem ta pasel a te c'alal bin ora te Efraín la spit sba soc Judá. (Ha ya yalbe sc'oblal te ajwalil yu'un Asiria.)

¹⁸ Ta hich ora te Jehová ya me xuxubtay tal te us te ay ta sti'il te muc'ul ha'etic yu'un Egipto soc te schanul chab te ay ta sq'uinal Asiria.

¹⁹ Ya xtalic ta nahinel ta sjuclejetic, ta sc'ub tontiquil, ta ch'ixileltic soc ta spisil banti ya yuch'ic ha' te chambahlametique.

²⁰ Ta hich ora te Jehová ya me smajan navaja ta jehch muc'ul-ha' Éufrates (ha te ajwalil yu'un Asiria), ya me squits'be stsotsel sjol soc stsotsel yoc, soc ya me sloq'uesbe yisim.

²¹ Ta hich ora, jtuhl winic ya scoltes jcoht wacax soc cha'coht me' tuminchij,

²² hich ya slo' tatuben leche ta scaj te bayel leche ya yaq'uic. Te mach'atic cuxul ya xhilic ta q'uinal ya me swe'ic tatuben leche soc chab.

²³ Soc ta hich ora, te banti ta nahil to ay lajunwinic yoxbahc' (1,000) ta peht ts'usubiltic te ha lajunwinic yoxbahc' (1,000) ta sehp plata stojol, ha xanix ay pimil ch'ixileltic soc ch'ixetic tey a.

²⁴ Ya me xbahtic tey a soc t'ihmalte' soc ya'tejibalul, como ha pimil ch'ixileltic soc ch'ix spisil te q'uinale.

²⁵ Ta tsehletic banti la yich' joq'uel soc azadón ma ba ya xbahex tey a ta scaj te yac axi'ic te ch'ixileltic soc ch'ix. Ha nax ya xtuhun yu'un ya xwe'ic tey a te wacaxetic soc te tuminchijetique.