Isaías 66 - Bible in Tzeltal Bachajón

Castigohetic yu'un Jehová soc ya xcha' yich yip Sión

¹ Hich ya yal te Jehová: Ha huctajibal cu'un te ch'ulchan, soc ha scajtajib coc te bahlumilal. ¿Banti ay te na te yac apasbonique? ¿Banti ay te awilal yu'un ya jcux co'tan a?

² Ha pasticlambil ta jc'ab spisil ini, hich chicnaj spisil, xchi te Jehová. Pero ha ya quil te mach'a pobre soc te ya xnihc yu'un te jc'ope.

³ Te mach'a ya yac' toro scuenta milbil mahtanil hich c'ohem te bin ut'il mach'a ya smil jtuhl winic; te mach'a ya yac' tuminchij scuenta milbil mahtanil hich c'ohem te bin ut'il mach'a ya swac'be snuc' ts'i'; te mach'a ya yac' harina scuenta mahtanil hich c'ohem te bin ut'il mach'a ya yac' mahtanil sch'ich'el chitam; te mach'a ya schic' pom hich c'ohem te bin ut'il mach'a ya sch'uhuntay loc'omba. Ha nix la stsahic te behetic yu'unic, soc la smulanic te bintic ihlaybilic,

⁴ ha nix hich ya jtsahbe wocoletic yu'unic, soc ya jticon ta stojolic te bin ya xi'ique; como te c'alal la jquic', mayuc mach'a la sjac', c'opojon, mayuc mach'a la ya'iybon jc'op; ha la spasic te bin chopol ta jtojol soc la stsahic te bintic ma jmulan, xchi.

⁵ A'iybeya awa'iyic te sc'op Jehová, ha'ex te ya xnihquex ta stojol te sc'ope: Te awermanotac te ya sp'ajex soc te parte ya yaq'uex ta scaj te jbihile, hich la yalic: Ac'a yich' halbeyel yutsil sc'oblal te Jehová, yu'un hich ya quiltic a te stse'elil awo'tanic, xchihic. Pero ya me stahic q'uexlal.

⁶ ¡Xjuyet ya xchicnaj c'op ta pueblo, ya xchicnaj c'op ta Templo, ha sc'op te Jehová te ya ya'be stoj te scontratac!

⁷ ¡Ma to xhahch sc'uxul a, ayin yal; ma to xhahch sc'uxul a la yayintes querem!

⁸ ¿Mach'a hich ya'iyej? ¿Mach'a hich yiloj? ¿Ya bal x'ayin jun pueblo ta junax c'ahc'al? ¿Ya bal xchicnaj jun nación ta jts'ihn nax? Pero c'alal hahchel to sc'uxul yu'un alajel te Sión, la yayintes yalatac.

⁹ Ho'on te ya cac' te ya x'alaj, ¿ma bal yacuc cac' te ya x'ayin? xchi te Jehová. Ho'on te ya cac' te ya x'ayin, ¿ya bal jcom yu'un ma x'ayin? xchi te Dios awu'une.

¹⁰ Bayeluc me yutsil awo'tanic soc Jerusalén, tse'eluc me awo'tanic yu'un, apisilic te c'ux yac awa'iy ta awo'tanic; nojeluc me yutsil awo'tanic, apisilic te yac amel awo'tanic ta scuenta,

¹¹ yu'un ya xchu'unex soc ya xnoj ach'uhtic yu'un te ch'u'ul te ya yac' muc'ul-o'tanil; yac awuch'ic soc yac amulambeyic te yutsilal te c'ax bayele.

¹² Como hich ya yal te Jehová: Ho'on ya ca'be lamal q'uinal ta stojol hich te bin ut'il muc'ul-ha', soc te sc'ulejal te nacionetic ya cac' te ya xtal ta stojol hich te bin ut'il snojel ha' te ya xmahl loq'uel; ya me xchu'unex, ya xpetotex bahel ta sc'ab, soc ya xhuhcanotex ta sjol yacan.

¹³ Hich te bin ut'il nanil te ya smuc'ubtesbe q'uinal ya'iy te yale, hich ya jmuc'ubtesbeyex q'uinal awa'iyic te ha'exe, soc ta Jerusalén ya xmuc'ubtesot q'uinal yac awa'iyic, xchi.

¹⁴ Te c'alal yac awilic ini, tse'el awo'tanic yu'un, soc te abaq'uetalic hich ya x'ach'ub te bin ut'il te ha'male. Ya x'a'bot yilic te sc'ab Jehová te a'batetic yu'une, soc ya x'a'bot yilic te yilimba te scontrataque.

¹⁵ Como ilawil, te Jehová ya xtal soc c'ahc', te carretahetic yu'un hich ayic te bin ut'il sutu-ic', yu'un ya yac' tal sc'ahc'al te yilimba, soc ya xtal soc yat c'ahc' te utel yu'une.

¹⁶ Como te Jehová ya schahpan soc c'ahc' soc espada spisil ants-winiquetic; bayel mach'atic ya xlajinotic yu'un te Jehová.

¹⁷ Te mach'atic ya sch'ultes sbahic soc te ya slecubtes sbahic yu'un ya x'ochic ta nichimaltic, te ya st'unic ochel te mach'a ay ta yohlil, soc te mach'atic ya sti'ic chitam, ch'o soc bintic ilobtic sba, pajal ya xlajic, xchi te Jehová.

¹⁸ Como jna'oj bin yilel te ya'telic soc te bin snopojic; ya sta yorahil te ya yich' tsobel spisil te nacionetic soc c'opiletic: ya xtalic soc ya me yilbonic te cutsilale.

¹⁹ Ya cac' jun seña ta yohlilic, soc te mach'atic cuxul hilic ya jticon bahel ta stojol te nacionetic: ha ta Tarsis, ta Put soc te Lud (te ya sna'ic yaq'uel t'ihmalte'), ta Tubal, ta Javán, soc ta ti'ti'mar te namal ayic te ma ba ya'iybeyejonic jc'oblal soc ma ba yilojic te cutsilale. Ya me spuquic ta halel te cutsilal ta stojol te nacionetique.

²⁰ Ya me yiq'uic tal spisil te awermanotac ta bayuc ta nacionetic scuenta mahtanil ta stojol Jehová ta ch'ul wits cu'un; ya xtalic ta cawuhetic, carretahetic, sillahetic te q'uechbilic, ta mula soc camellohetic, xchi te Jehová. Ya me yiq'uic tal hich te bin ut'il te israeletic ya yich'ic tal mahtaniletic yu'un harina ta pocticlambil yawiletic ta sna te Jehová.

²¹ Soc ya jtsa ta yohlilic mach'atic ha sacerdotehetic soc levitahetic ya xc'ohtic, xchi te Jehová.

²² Hich te bin ut'il stalel ya xhil ta jtojol te yach'il ch'ulchan soc bahlumilal te ya jpas, hich stalel ya xhil te ats'umbalic soc te abihilique, xchi te Jehová.

²³ Ta yach'il u c'alal ta yan yach'il u, soc ta sc'ahc'alel cux-o'tan c'alal ta yan sc'ahc'alel cux-o'tan, spisilic ya me xtal squejan sbahic ta jtojol, xchi te Jehová.

²⁴ Ya me xloq'uic bahel soc ya me yilbeyic te chamen sbaq'uetalic te ants-winiquetic te la stoy sbahic ta jtojol; como ma ba ya xcham te shahalic, soc ma ba ya xtup' te sc'ahc'alique. Ihlaybil ya xc'ohtic yu'un spisil ants-winiquetic, xchi te Jehová.