Isaías 60 - Bible in Tzeltal Bachajón

Te utsilal ya xc'oht yu'un Sión

¹ Hahchan, tihlan, como talix te sacal q'uinal awu'un, soc te yutsilal Jehová hulix ta atojol.

² Como ilawil, ya xmucot ta yihc'al q'uinal te lumq'uinal, ta pimil yihc'al q'uinal te nacionetique; pero te Jehová ya xtihl ta atojol soc ya xchicnaj ta atojol te yutsilale.

³ Ya xbehenic tal nacionetic ta stojol te sacal q'uinal awu'un, soc ajwaliletic ta banti yac ta tihlel te sacuben q'uinal awu'une.

⁴ Toya asit, ilawil ta ajoyobal: spisilic ya stsob sbahic soc ya xtalic ta atojol. Te queremetic awu'un namal ya xtalic, soc te awantsil-nich'nab petbil ya xtalic.

⁵ Yac awil, hich ya xtihl yutsil awo'tan, bayel yutsil awo'tan yu'un, como ya x'ich'botat talel te sc'ulejal te mar, ya xtal ta atojol te sc'ulejalic te nacionetique.

⁶ Ya xnoj aq'uinal yu'un bayel camellohetic, ha jcolel camellohetic yu'un Madián soc Efa. Ya xtal spisil mach'atic ayic ta Sabá, ya yich'ic tal oro soc pom, soc yac yalbeyic yutsil sc'oblal te Jehová.

⁷ Spisil te tuminchijetic yu'un Cedar ya stsob sbahic ta atojol, te tat tuminchijetic yu'un Nebaiot ayic ta acuentahic; ha mahtanil te lec co'tan yu'un ya xc'ohtic ta scajtajib ta chiq'uel mahtanil cu'un, soc ya jtoybe yutsilal te jna te ay yutsilale.

⁸ ¿Mach'atic a ini te ya xwihlic bahel hich te bin ut'il tocal, hich te bin ut'il stsuhmutetic ta snahique?

⁹ Ha barcohetic te yacalic ta talel ta ti'ti'mar, ha nahil yu'unic te barcohetic yu'un Tarsis, ya yiq'uic tal ta namal te anich'nab, soc oro soc plata yu'unic, scuenta yich'el ta muc' te Jehová, te Dios awu'un, te Ch'ul Dios yu'un Israel, te la ya'bat awutsilal.

¹⁰ Jyanlumetic ya scha'pasbat te ts'ahquetic awu'un, soc te ajwaliletic yu'unic ya yac' sbahic ta a'batinel awu'un; como soc quilimba la jca'bat castigo, pero soc yutsil co'tan ya jna'bat yo'bolil aba.

¹¹ Te ochibaletic awu'un spisil ora jamal, ma ba ya xmahc ta c'ahc'al ahc'abal, scuenta yu'un ya xhu' ya yich'beyex tal sc'ulejalic te nacionetic, soc ic'bil ya xtalic te ajwaliletic yu'unique.

¹² Como te nación o te ban c'alal cuentahimbil te ma ba ya yac' sba ta a'batinel awu'un ya me xch'ay bahel; spisil ya yich' jinel ta jc'axel.

¹³ Te yutsilal te Líbano ya me xtalic ta atojol: ha te ciprés, taj soc te abeto-te', yu'un sch'ahlel te ch'ul awilal cu'un, soc ho'on ya ca'be yutsilal te banti ya cac' te coque.

¹⁴ Te snich'nab te mach'atic la yuts'inex ya me xtal snijan sbahic ta atojol, spisil mach'atic la sp'ajex ya me xtal squejan sbahic ta ye'tal awoc; soc hich me ya ya'beyex abihilic: Pueblo yu'un Jehová, xchihic, soc: Sión yu'un te Ch'ul Dios yu'un Israel, xchihic ta atojol.

¹⁵ Ta nahilal ch'aybilat hilel soc p'ajbilat, mayuc mach'a behenic c'axel ta atojol, pero ho'on ya cac' te ay awutsilal sbahtel q'uinal, te ha'at tse'el-o'tanilat yu'un cajalcaj ts'umbalil.

¹⁶ Yac awuch'be te leche yu'un te nacionetic, soc yac achu'umbe te schu' ajwaliletic; hich me yac ana' a te ho'on, Jehovahon, ha Jcoltaywanejon awu'un, te J'ac'aw ta libre awu'un, te Mach'a yu'un Jacob te ay yip.

¹⁷ Scuenta sjelol bronce ya quich'bat tal oro, scuenta sjelol hierro ya quich' tal plata; scuenta sjelol te' ya quich' tal bronce, scuenta sjelol ton ya quich' tal hierro. Ya cac' te ha jcuentahinwanej awu'un te lamal-o'tanil, soc ha jtojobteswanej awu'un te bin stojil ta pasele.

¹⁸ Mayuquix bin ora ya x'a'iyot sc'oblal uts'inel ta alumal, o jinel o lajinel ta aq'uinal, pero ya me awa'be sbihilin Colel te ts'ahquetic awu'un, soc te ochibaletic awu'un, ha Halbeyel yutsil sc'oblal Dios, xchi me sbihilic.

¹⁹ Te c'ahc'al ma xtuhunix awu'un scuenta sacal q'uinal, soc ma ba ya sacubtes q'uinal ta atojol te sts'anabul te u, como te Jehová stalel sacal q'uinal awu'un ya xc'oht, soc te Dios awu'un ha awutsilal ya xc'oht.

²⁰ Te c'ahc'al awu'un ma ba ya xmahlix bahel, soc ma ba ya xch'ayix bahel te u awu'une; como te Jehová stalel sacal q'uinal awu'un ya xc'oht, soc ya xlaj te sc'ahc'alel mel-o'tan awu'une.

²¹ Spisil te pueblo awu'un toj yo'tanic ya xc'ohtic, ya me a'bot yich'ic te q'uinal sbahtel q'uinal. Ha spuhl ya xc'ohtic te la jts'un, ha ya'tel jc'ab, scuenta yu'un hich ya cac' ta ilel a te cutsilale.

²² Te mach'a tut, ta mil ya xc'oht; te ihts'inal ya xc'oht ta jun nación te ay yip. Ho'on Jehovahon, ta yorahil ya jc'ohtes ta pasel ta ora.