Isaías 59 - Bible in Tzeltal Bachajón

Yalel smul Israel

¹ Ilawil, ma ba comuben sc'ab te Jehová yu'un ya xcoltaywan, soc ma ba macal schiquin yu'un ya'iyel c'op;

² pero ta scaj amulic la smaquex ta stojol te Dios awu'unic; te amulic la yac' te ya snac' sit yelaw Dios ta atojolic te hich ma ba ya ya'iyex a.

³ Como bohloben ac'abic yu'un ch'ich', bohloben yalatac ac'abic yu'un bintic chopol; ya yalic lot te awehic, ya yal bintic chopol te awaq'uique.

⁴ Mayuc mach'a yac sc'ambel stojil chahpanel, mayuc mach'a toj ya xc'opoj ta chahpanel. Ha smuc'ulinej yo'tanic te c'op te mayuc scuentahil, soc ya yalic lot; ya swolic bintic chopol, ya yayintesic mulil;

⁵ ya sluts'ic ston chanetic soc ya sjalic sna ametic. Te mach'a ya slo'be te stone, ya xcham yu'un, soc teme ya st'usticlan, ya xloc' ti'awal chanetic tey a.

⁶ Te sna ametic yu'unic ma xhu' ta c'u'inel; ma xhu' ya smuc sbahic a te bin ya sjalique. Te ya'telic ha ya'telic te bin chopol, soc ay uts'inel ta sc'abic.

⁷ Te yoquic ya x'ahnimajic ta stojol te bin chopol, ya suj sbahic ta smalbeyel sch'ich'el te mach'a mayuc smul. Te bin snopojic, ha te bin chopol, ay jinel soc lajinel ta behetic yu'unic.

⁸ Ma ba sna'beyejic sba te sbehlal lamal-o'tanil, mayuc stojil chahpanel ta behetic yu'unic; ha chuhcul be te behetic yu'unique; mayuc mach'a ya xbehenic tey a te ya ya'iy lamal-o'tanil.

⁹ Ha scuentahil te namal ay ta jtojoltic te stojil chahpanel, soc te ma ba la stahotic te bin stojil ta pasele; la jmahliytic sacal q'uinal, pero ha nax ay yihc'al q'uinal; la jmahliytic xojobal q'uinal, pero yacotic ta behel ta pimil axinal.

¹⁰ Xpicponotic ta pahc' hich te bin ut'il ts'o'sitetic, yacotic na'etel bahel hich te bin ut'il te mach'atic mayuc sitic. Ya jc'ohchin coctic ta ohlil c'ahc'al hich te bin ut'il ta ahc'abal; ayotic ta yihc'al q'uinal hich te bin ut'il mach'atic chamenic.

¹¹ Jpisiltic ya x'oc'otic hich te bin ut'il osohetic, ay yo'bolil jbahtic ta ahcan hich te bin ut'il stsuhmutetic. La jmahliytic stojil chahpanel, pero mayuc; la jmahliytic aq'uel ta libre, pero namal ay.

¹² Como bayel toybahil cu'uncotic ta atojol, soc ya yalotcotic te jmulcotique. Ay ta co'tancotic te c'axun-mandar cu'uncotic soc ya jna'cotic te mulil cu'uncotic:

¹³ ha te toybahil soc te la jmuc ta co'tantic te Jehová, la jsut jpatic ta stojol te Dios cu'untic; ha te yalel uts'inel soc toybahil, soc yalel lot te chicnaj ta co'tantic.

¹⁴ Hich suht bahel te stojil chahpanel, soc namal hil te bin stojil ta pasele; como te bin smelelil la sc'ohchin sba ta plaza, soc ma ba hu' ya xtal te toj-o'tanile.

¹⁵ Ch'ayix bahel te bin smelelil, soc la yich' chuquel te mach'a ma ba ya spas te bin chopole. Ha la yil te Jehová, ma lecuc yo'tan yu'un te bin ut'il mayuc stojil chahpanel.

¹⁶ La yil te mayuc mach'a ay, xcham yo'tan yu'un te mayuc mach'a ya xc'opoj yu'un; ha yu'un ta sc'ab nix la scoltay loq'uel, soc a'bot yip yu'un te bin stojil la spas.

¹⁷ La slap bin stojil ta pasel hich te bin ut'il smahquil stahn, soc la smac sjol a te ta colele; la slap c'u'ul yu'un ya'beyel spacol soc hich la smuc sba ta xut'et yo'tan te bin ut'il smahquil pac'.

¹⁸ Ha chican bintic spasojic, hich ya ya'be stojic: ha ya yilintay te scontratac, soc ya ya'be spacol te mach'atic ya xcontrahinot yu'unic, ¡Ya me ya'be stoj te mach'atic nahinemic ta ti'ti'mar!

¹⁹ Hich ya xi'ic te sbihil Jehová c'alal ta stojol smahlib c'ahc'al, soc c'alal ta banti ya xloc' tal c'ahc'al ya me yich'ic ta muc' te yutsilale; yu'un hich ya xtal te bin ut'il snojel ha' te ya xtenot bahel yu'un te hu'xiyel yu'un Jehová.

²⁰ Ya me xtal ta Sión te Mach'a ya x'ac'awan ta libre soc ta stojol te sts'umbal Jacob te ya suhtes yo'tanic yu'un smulic, xchi te Jehová.

²¹ Ha ini te chapbil-c'op cu'un ta stojolic, xchi te Jehová: Te espíritu cu'un te ay ta atojol, soc te c'opetic cu'un te la jca'bat ta awe, ma ba ya xch'ay ta awe soc ta ye te anich'nab o te amamatac, yo'tic soc ta spisil ora, xchi te Jehová.