Isaías 58 - Bible in Tzeltal Bachajón

Scomel we'elil ta melel

¹ ¡Tulan x'awonat, ma xacom aba, toya ac'op hich te bin ut'il corneta! ¡Halbeya ya'iy te pueblo cu'un te stoybahil, soc te smulic te mach'atic yu'un Jacob!

² Jujun c'ahc'al ya slehonic, yo'tanuc yilel te ya sna'be sba te behetic cu'un, hich c'ohemic te bin ut'il jun pueblo te ya spas te bin stojil ta pasel soc te ma ba hilem yu'unic te ley yu'un te Dios yu'unique. Ya sc'ambonic stojil chahpanel, soc ya sc'anic yilel te ya xnohpojic ta stojol Dios.

³ Hich ya yalic: ¿Bin yu'un ya jcom jwe'elcotic, pero ma ba yac awich' ta cuenta; ya jpehc'an jbahcotic pero mayuc ta cuenta awu'un? xchihic. Ilawil, ta sc'ahc'alel te yac acom awe'elic yac alehic bin yac amulanic soc yac atenic ta a'tel te j'a'teletic awu'unique.

⁴ Ha nax yac acom awe'elic yu'un yac awa'iyic tijtamba c'op soc tsaltamba c'op, soc yu'un yac amaj abahic ta ac'abic te c'ax chopole; teme yac ac'anic te ya x'a'iyot ac'opic ta toyol, coma awe'elic, pero ma hichuc te bin ut'il yaquex ta spasel ta ora ini.

⁵ ¿Hich bal scomel we'elil te la jc'an, te ay jun c'ahc'al te ya spehc'an sba te winic, te ha nax ya snijan sba hich te bin ut'il jalal soc te ya xway ta ch'ixal-pac' soc ta tan? ¿Ha bal scomel we'elil sbihil awu'unic soc sc'ahc'alel te lec yo'tan yu'un te Jehová?

⁶ Te lequil scomel we'elil te ya jc'an: ¿ma bal ha'uc te yac aloq'ues te scadenahil te pasel te bin chopol, te yac atihl te ihcatsiletic yu'un uts'inel, te yac awac' ta libre te mach'atic tembilic ta uts'inel, soc te yac awac'ticlan spisil yugohetic?

⁷ ¿Ma bal ha'uc te yac awa'be awe'el te mach'a ay ta wi'nal, te yac awa'be smajan ana te pobrehetic te mayuc sna; te yac awa'be sc'u'-spac' te mach'a yac awil te mayuc yu'un, soc te ma ba yac anac' aba ta stojol te awermanohe?

⁸ Hich me ya xtihl te sacal q'uinal awu'un te bin ut'il ya sacub tal te q'uinale, soc ora ya xchicnaj te lecubtesel awu'une; ya xnahilij bahel ta atojol te bin stojil ta pasel awu'un, soc te yutsilal te Jehová ya scanantayat ta apat.

⁹ Hich yac ac'opon Dios, ya me ya'iybat ac'op te Jehová; yac awawtay ta sc'anel coltayel, hich me ya yalbat: Li' ayoni, xchi. Teme yac aloq'ues ta atojol te yugo, te yal c'abal yu'un le-mulil soc te yalel bin chopol,

¹⁰ teme yac awa'be te mach'a ay swi'nal te we'elil awu'un, soc teme yac awa'be te bin ya xtuhun yu'un te mach'a ay swocol, ya me xchicnaj ta yihc'al q'uinal te sacal q'uinal awu'un, soc te yihc'al q'uinal awu'un hich ya xc'oht te bin ut'il ohlil c'ahc'al.

¹¹ Te Jehová ya stojobtesat bahel spisil ora, ta taquin q'uinal ya ya'bat bin ya xtuhun awu'un, soc ya ya'be yip te abaquele. Hich ya xc'ohat te bin ut'il ts'umbil nichimetic te a'bibil ya'lel, hich te bin ut'il sloq'uib-ha' te jc'axel ma xtup'.

¹² Te mach'atic ay awu'un ya me scha'pasic xan te namey jihnem ts'ahquetic, yac acha'hach xan te yich'o-ip te namey pasbile; soc ya ya'bat abihil: Jcha'pas ts'ahquetic, xchi, soc: Jcha'pas nahetic banti jimbilic, xchi ac'oblalic.

Yich'el ta cuenta te sc'ahc'alel cux-o'tanil

¹³ Teme yac awich' ta muc' te sc'ahc'alel cux-o'tan teme ma ba yac apas te bintic ya sc'an awo'tan ta ch'ul c'ahc'al cu'un, teme yac awal te ha mulantic sba, te ch'ultesbil, soc te ha yutsilal te Jehová; teme yac awich' ta muc', teme ma ba yac at'un te behetic awu'un, o teme ma ba yac apas te bin ya sc'an awo'tan o teme ma ba yac awal te bin mayuc sc'oblale,

¹⁴ hich me yac ata yutsil awo'tan ta stojol Jehová, soc ho'on ya cac' te ya xmohat bahel ta toyol q'uinaletic soc ya ca'bat awe' te bin yich'oj hilel te atat Jacob. Hich yaloj te Jehová.