Isaías 53 - Bible in Tzeltal Bachajón

¹ ¿Mach'a sch'uhunej te bin calojcotic, soc mach'a a'bot yil te sc'ab Jehová?

² Te ya'bat ha uhnen spuhl te hich ya xmuc'ub bahel ta stojol te bin ut'il slohp' ta taquin q'uinal. Mayuc st'ujbilal o yutsilal yu'un ya jmulantic yilel, mayuc bin mulantic sba ta ilel cu'untic.

³ Ha ihlaybil soc p'ajbil yu'un te ants-winiquetique, ha jtuhl winic te bayel bin c'ux ya ya'iy, ya sna' bin ut'il ay wocol; hich c'ohem te bin ut'il mach'a ma ba la sc'an ya quilbetic sit yelaw, ha p'ajbil, soc ma ba la jquich'tic ta cuenta.

⁴ Pero ha la scuchbotic te jchameltic, ha la scuchbotic te bin c'ux ya ca'iytic, ¡pero la jcuytic te ehchentesot yu'un Dios, te majbil soc a'bibil swocol yu'un!

⁵ Pero la yich' lowel ta scaj jtoybahiltic, juch'bil c'oht ta scaj jmultic. Ha c'oht ta stojol te castigo te ya ya'botic lamal q'uinal, soc ta scuenta yehchen la jquich'tic lecubtesel.

⁶ Jpisiltic howiyemotic hich te bin ut'il tuminchijetic, jujutuhl la jt'untic bahel te be cu'untique; pero te Jehová la ya'be scuchbotic jmultic ta jpisiltic.

⁷ La yich' uts'inel soc c'ax swocol, pero ma ba la sjam ye; ic'ot bahel hich te bin ut'il alal tuminchij ta banti ya yich' milel; soc hich te bin ut'il ma xc'opoj te tuminchij ta stojol mach'a ya sjoxbe loq'uel stsotsel, ha nix hich ma ba la sjam ye.

⁸ Ta scuenta uts'inel soc chahpanel te ic'ot bahele. ¿Mach'a ya xhu' ya yalbe sc'oblal te sts'umbale? Como la yich' loq'uesel ta yohlil mach'atic cuxulic, ehchentesot ta scaj te c'axun-mandar yu'un te pueblo cu'une.

⁹ A'bot smuquenal ta yohlil te mach'atic chopolic, baht ta muquel soc jc'ulejetic, aunque mayuc bin chopol spasoj soc mayuc la ya'iy lo'loywanej.

¹⁰ Pero te Jehová la sc'an te ya yac' ta uts'inel, te ya ya'be swocol. Te c'alal yac'ojix sba scuenta milbil mahtanil yu'un mulil, ya me yil te sts'umbal soc ya me xcuxaj bayel c'ahc'al, soc te bin ya sc'an yo'tan te Jehová ya me xc'oht ta pasel ta scuenta.

¹¹ Ya me yil te bin ya xloc' yu'un a te swocol te sch'uhlel, lec me ya ya'iy yu'un; te ca'bat te toj yo'tan ya me yac' te toj ya xc'oht tsobolic ta scuenta te bintic sna'oj, soc ya me scuchbe te smulique.

¹² Ha yu'un ya cac' te ya sjoquin te mach'atic ich'bilic ta muc', soc pajal ya spucticlan bintic pojbil soc te mach'atic ay yipic, como ha la yac' scuxlejal ta lajel, soc ahtaybil c'oht soc te jmulawiletic, como la scuchbe smul tsobolic, soc c'opoj yu'un te jc'axun-mandaretique.