Isaías 51 - Bible in Tzeltal Bachajón

Smuc'ubtesbeyel q'uinal ya'iy Sión

¹ A'iybon awa'iyic jc'op, ha'ex te at'unojic te bin toj ta pasel, ha'ex te yac alehic te Jehová. Ilawil te ton banti la awich'ic wuyel loq'uel tal, te yawil ton te banti la awich'ic loq'uesel.

² Ilawil te Abraham te atatic, soc te Sara te la yalatayex; como te c'alal stuquel ay a, la jquic' talel, la jca'be bendición soc la jcac' p'ohluc.

³ Te Jehová ya me smuc'ubtesbe q'uinal ya'iy te Sión, ya smuc'ubtesbe q'uinal ya'iy spisil te bintic jihnem yu'un. Ya me yac' te hich ya xc'oht te bin ut'il Edén te jochol taquin q'uinal yu'un, te hich ya xc'oht te bin ut'il t'ujbil ts'umbil q'uinal yu'un Jehová te jochol q'uinal yu'un. Tey ay yutsil q'uinal a soc tse'el-o'tanil, yalel wocol soc c'ayoj.

⁴ A'iya awa'iy, pueblo cu'un, a'iybon awa'iyic jc'op, nación cu'un; como ya xloc' tal ta jtojol te Ley, soc te stojil chahpanel cu'un ha sacal q'uinal ya xc'oht yu'un te pueblohetique.

⁵ Ya xnohpoj tal ta ora te bin toj ya jpas, loq'uemix tal te colel cu'un, soc ya schahpan te pueblohetic te jc'abe. Te mach'atic ayic ta ti'mar ya me smahliyonic, ha ya smuc'ulin yo'tanic te jc'abe.

⁶ Toya mohel asitic ta ch'ulchan, soc ilawilic te lumq'uinal ta ye'tal; ya xtup' te ch'ulchan hich te bin ut'il ch'ahil, ya xlaj te lumq'uinal hich te bin ut'il c'u'ul, soc te mach'atic nahinemic tey a hich ya xlajic te bin ut'il us. Pero sbahtel q'uinal ay te colel cu'un, mayuc slajibal te bin toj ya jpas.

⁷ A'iybon awa'iyic, ha'ex te yac ana'ic te bin stojil ta pasel, pueblohex te ay ta awo'tanic te ley cu'une. Ma me xaxi'ic te bin ya yalbeyex ta utel te ants-winiquetic, ma me xpehc'aj awo'tanic yu'un te labanel yu'unique.

⁸ Como ya xlajinotic yu'un sulup hich te bin ut'il c'u'ul, ya xlajinotic yu'un yol hich te bin ut'il stsotsel-tuminchij. Pero stalel ya xhil te bin stojil ya jpas, soc te colel cu'un ya xhalaj ta cajalcaj ts'umbalil, xchi.

⁹ ¡Hahchan, hahchan, lapa awu'el, ha'at c'abalat yu'un Jehová! Hahchan hich te bin ut'il ta namey, hich te bin ut'il ta cajalcaj ts'umbalil ta namey. ¿Ma bal ha'ucat te la asesen te Rahab, te la alow te dragón?

¹⁰ ¿Ma bal ha'ucat te la ataquijtes te mar, te ha'etic yu'un te muc'ul xahab, te la ac'atp'un ta be te sc'ubulil te mar scuenta yu'un ya xc'axic bahel te mach'atic ac'bilic ta libre?

¹¹ Ya me suhtic tal te mach'atic ac'bilic ta libre yu'un Jehová; ya me x'ochic bahel ta Sión soc c'ayoj, soc ha corona ya xc'oht yu'unic te tse'el-o'tanil te stalel ay. Ya me stahic yutsil yo'tanic soc tse'elil yo'tanic, ya x'ahn loq'uel te bin c'ux soc te ahcane.

¹² Ho'on, ho'on te ya jmuc'ubtesbat q'uinal yac awa'iyic. ¿Mach'ahat a te yac axi' te ants-winiquetic te ya xchamic, te ants-winiquetic te hich ayic te bin ut'il ac?

¹³ ¿Ch'ayem balix ta awo'tan te Jehová te Jpaswanej awu'un, te la slim bahel te ch'ulchan soc te la ya'be yich'o-ip te bahlumilale? Spisil ora ya xiwat ta scaj te yilimba te j'uts'inwanej, te schahpanej sba yu'un ya xlajinwan. Pero ¿banti ay te yilimba te j'uts'inwaneje?

¹⁴ Ya xcol ta libre ta ora te mach'a chucul te ay swocol; ma ba ya xlaj ta banti chucbil, soc ma ba ya spas falta te swe'ele.

¹⁵ Como ho'on Jehovahon te Dioson awu'un, te ya jyuc' te mar soc ya cac' ya x'awon te stselajan, ha Jehová te scuentahinej spisil te jbihile.

¹⁶ La jca'bat ta awe te jc'op soc la jmucat ta yaxinal jc'ab, la jlim bahel te ch'ulchan soc la jca'be yich'o-ip te bahlumilal, soc hich ya calbe te Sión: Ha'at pueblohat cu'un, xchihon.

¹⁷ Wic'a asit, wic'a asit, hahchan, Jerusalén, ha'at te la awuch'be yilimba ta copa te ay ta sc'ab te Jehová, te la awuch' spisil te copa te ya yac' te xhanlajanic ya xbehenic yu'une.

¹⁸ Ta spisil te alaletic te la yalatay, mayuc jtuhluc te ya stojobtes bahel; ta spisil te yalatac te la scoltes, mayuc jtuhluc te ya snit bahel ta sc'ab.

¹⁹ Ay cheb te bin c'ohem ta stojol: jinel soc lajinel, wi'nal soc espada. ¿Mach'a a te ya sna'bat yo'bolil aba? ¿Mach'a a te ya smuc'ubtesbat q'uinal yac awa'iy?

²⁰ Tup' yiq'uic te awalatac, metsajtic ta jujuxuhc callehetic, hich te bin ut'il ha'mal chij te ochem ta yaquil. Nojelic ta yilimba te Jehová, nojel ta spisil te utel yu'un te Dios awu'une.

²¹ Ha yu'un, a'iya awa'iy ini, ha'at te ay awocol, te yacubenat, pero ma yu'un vino:

²² Hich ya yal te Jehová te Ajwalil, te Dios awu'un, te ya xc'opoj ta scuenta te pueblo yu'une: Ilawil, la jloq'uesbat ta ac'ab te copa te la yac'at te ya xhanlajanat yu'un, mayuc bin ora yac awuch'ix xan te copa yu'un te quilimbahe.

²³ Ha ya ca'be ta sc'ab te j'uts'inwanejetic awu'un, te mach'atic hich la yalbat: Pahc'ana aba ta lum, yu'un ya xc'axotcotic ta aba, te xchihique. Hich la awac' apat te bin ut'il lum, hich te bin ut'il be yu'un ya xbehenic tey a.