Isaías 5 - Bible in Tzeltal Bachajón

Sloc'ombahil c'op yu'un ts'usubil

¹ Ya jc'ayojtaybe c'ayoj te mach'a c'ux ta co'tan, ha c'ayoj sc'oblal te sts'usubile: Te mach'a c'ux ta co'tan ay ts'usubil yu'un ta lequil q'uinal ta ch'uht wits.

² La shotbe slumil, la sloq'uesbe stonal soc la sts'un te tsahbil ts'usubetic. Ta yohlil la spas toyol ilo-q'uinal soc la spasbe yawil spits'ojbil. La smahliy te ya sitin lequil ts'usub, pero la yac' ha'mal ts'usubetic.

³ Yo'tic, winiquetic yu'un Jerusalén soc winiquetic yu'un Judá, halahic mach'a ay smul, ho'on o te ts'usubil cu'une.

⁴ ¿Binti xan yan pasel la sc'an ta stojol te ts'usubil cu'un te ma ba jpasoje? ¿Bin ut'il ay a te la jmahliy te ya yac' lequil ts'usubetic pero la yac' ha'mal ts'usubetic?

⁵ Ya calbeyex bin ya jpasbe te jts'usubil: Ya jloq'uesbe scorralil-ton, hich ya xjihn; ya jch'ojbe cohel te sts'ahcul, hich ya yich' ts'o'ts'o' teq'uel.

⁶ Ya cac' te jochol taquin q'uinal ya xc'oht; ma ba ya yich' c'abayel o aq'uintayel, ya xcol ch'ixetic soc ha'maletic tey a. Ya jpas ta mandar te tocaletic te ma me xyaq'uic ha'al ta stojol.

⁷ Te ts'usubil yu'un te Jehová te scuentahinej spisil, ha te sna Israel, soc te winiquetic yu'un Judá ha te ts'umbil q'uinal te mulambil yu'une. Ha la smahliy bin toj ta pasel, pero ay ta malel ch'ich'; la smahliy stojil chahpanel, pero la ya'iy aw yu'un wocol.

Swocol mach'atic chopolic

⁸ ¡Ay me swocolic te mach'atic ya slehticlan nahetic yu'unic, soc ya slehticlan q'uinaletic, ha to c'alal ya yich'ic spisil! ¿Atuquelic bal ya x'ayinex ha'ex ta q'uinal?

⁹ Te Jehová te scuentahinej spisil la yalbon ca'iy ta jchiquin te ya me yich'ic jinel bayel nahetic, mayuc yajwal ya xhil te muc'ul nahetic soc t'ujbil nahetic.

¹⁰ Te oxeb hectárea ts'usubil ha nax ya yac' jun bato, te jun homer sbac' sts'unubil ya yac' jun efa.

¹¹ ¡Ay me swocolic te mach'atic sab ya xhahchic yu'un ahnimal ya slehic tulan uch'balil, soc hich ya xc'ub ahc'abal yu'unic ha to ya xch'ay yo'tanic yu'un te vinohe!

¹² Ta q'uinetic yu'unic ay arpahetic, salteriohetic, c'ayobetic, amayetic soc vino, pero ma ba ya yilic te bin ya spas Jehová, mayuc sc'oblal ta yo'tanic te ya'tel te sc'abe.

¹³ Ha yu'un ya x'ic'otic bahel ta chuquel te pueblo cu'un ta scaj te mayuc snopojibal yu'unique. Te winiquetic yu'un te ay sc'oblalic ya xlajic ta wi'nal, soc te tsobolic yu'un, ya ya'iyic bayel taquinti'il.

¹⁴ Ha yu'un muc'ub te yutil te yawil mach'atic chamenic soc ma p'isbiluc la sjam ye; tey ya xcohic bahel a te mach'atic yu'un Jerusalén te ay sc'oblalic soc te tsobolic yu'un, te mach'atic xjuyetic soc te mach'atic tse'el yo'tanic yu'un.

¹⁵ Ya xpehc'anot te ants-winic, peq'uel ya xc'oht te winic, ya xpehc'ambot sitic te jtoybahetique.

¹⁶ Pero te Jehová te scuentahinej spisil ya xtohybot sc'oblal ta scuenta bin stojil ta pasel, soc te Ch'ul Dios ya yac' sba ta ilel ta scuenta stojil ya'tel te ha Ch'ul Dios.

¹⁷ Te tuminchijetic ya sle swe'elic hich te bin ut'il ay ta aquiltic yu'unic; te jyanlumetic tey ya xwe'ic a ta jimbil q'uinaletic yu'un te jc'ulejetique.

¹⁸ ¡Ay me swocolic te mach'atic ya snitic tal ta scuenta lot te bin chopol, soc te ya snitic tal mulil hich te bin ut'il mach'a ya stas carreta!

¹⁹ te hich ya yalic: ¡Ac'a suj sba te Diose, ac'a spas ta ora te ya'tel yu'un ya quilcotic! ¡Ac'a nohpojuc tal bin schapoj te Ch'ul Dios yu'un Israel scuenta yu'un ya jna'cotic a! te xchihique.

²⁰ ¡Ay me swocolic te mach'atic ya yalic te lec te bin ma lecuc soc te ma lecuc te bin leque; te ya sc'atp'unic ta yihc'al q'uinal te sacal q'uinal, soc ta sacal q'uinal te yihc'al q'uinale; te ya sc'atp'unic ta ch'a te bin chi', soc ta chi' te bin ch'a!

²¹ ¡Ay me swocolic te mach'atic ya scuy sbahic ta p'ij, te ya scuy sbahic te ya sna'ic q'uinal!

²² ¡Ay me swocolic te mach'atic ay yipic ta yuch'el vino, soc te winiquetic te ay yipic yu'un scapel te uch'balil,

²³ te mach'atic ta scaj taq'uin ya yalic te mayuc smul te mach'a ay smul, soc mayuc ta cuenta yu'unic te mach'a mayuc smule!

²⁴ Ha yu'un, hich te bin ut'il ya slajin c'ajben te yat c'ahc', soc te ya slajin ac te c'ahq'ue, ha nix hich ya xc'a' te slohp'ic, soc ya xch'ay bahel snichic hich te bin ut'il ts'ubilum; como la sp'ajbe te ley yu'un Jehová te scuentahinej spisil, soc la yihlayic te sc'op te Ch'ul Dios yu'un Israel.

²⁵ Ha scuentahil te tihl yilimba Jehová ta stojol te pueblo yu'un, soc te la shach sc'ab ta scontrahinel soc te la yehchentes; nihc te witsiltic, te schamen-baq'uetalic ch'ojbilic hilel ta callehetic. Ta spisil ini, ma ba quehchaj te yilimba Jehová, shachoj to te sc'ab ta yaq'uel castigo.

²⁶ Ya stoy mohel bandera yu'un yiq'uel tal te nacion te namal ay, ya xuxubtay te mach'a ay ta sti'il te bahlumilal. Ilawil, ahnimal ya xtal ta ora.

²⁷ Mayuc mach'a ya xluhb o te ya sc'ohchin yoc, mayuc mach'a ya xway; mayuc mach'a ya xtihl schuhquil sch'uht, o te ya xtuch' sc'ab step.

²⁸ Ay ye te ya'tejibalul st'ihmalte'ic, niticlambil spisil te st'ihmalte'ic; te slots' scawuhic hich te bin ut'il tulan ton, soc te yoc te carretahetic yu'unic hich te bin ut'il sutu-ic'.

²⁹ Te sjahts' hich te bin ut'il yaw choj, ya x'awonic hich te bin ut'il jcolel choj; ya x'awonic soc ya stsac swe'elic, ya yich'ic bahel, mayuc mach'a ya xpojbot yu'un.

³⁰ Ta hich ora ya x'awonic ta stojol hich te bin ut'il sc'op te mar. Ya yilic te lumq'uinal, ya me yilic yihc'al q'uinal soc wocol, ya x'ihc'ub te sacal q'uinal yu'un te tocale.