Isaías 49 - Bible in Tzeltal Bachajón

Ha ya'bat Jehová te Israel

¹ A'iya awa'iyic, ha'ex te ayex ta ti'ti'mar, a'iya awa'iyic ini, nacionetic ta namal: Te Jehová la yic'on te c'alal ma to x'ayinon a; c'alal swolojon to a te jnane la yalbon te jbihile.

² Hich la ya'bon que te bin ut'il espada te huxbil ye, la snac'on ta yaxinal te sc'abe; hich la yac'on te bin ut'il sjayal sni' ya'tejibalul t'ihmalte', la sq'uejon ta yawil.

³ Hich la yalbon: Ha'at a'batat cu'un, Israel, ha'at ta acuenta ya cac' ta ilel te cutsilale, xchi.

⁴ Pero hich la jcal: Tojol nax a'tejemon; tojol la jlajin quip, mayuc bin la jta a. Pero te bin ut'il ayon, ay ta scuenta Jehová, te stojol jc'ab ay ta scuenta te Dios cu'une, xchihon.

⁵ Yo'tic hich ya yal te Jehová, te mach'a la schahpanon ta yawil alal yu'un jnan yu'un ya'bat ya xc'ohon, yu'un ya cac' suhtuc tal te Jacob ta stojol soc yu'un ya jtsob Israel ta stojol, (como lec c'ohon ta sit Jehová soc ha quip te Dios cu'une),

⁶ hich ya yal: Jteb nax ya ca'iy te ha a'bat cu'un yu'un yac ahach te chahpalchahp sts'umbal Jacob, soc te yac apas te ya suhtic xan tal te mach'atic hilemic yu'un Israel; ha nix ya cac' te ha sacal q'uinal ya xc'ohat ta stojol te nacionetic, yu'un yac awich'bon bahel te colel cu'un c'alal ta sti'il te bahlumilale, xchi.

⁷ Hich yaloj te Jehová, te J'ac'aw ta libre, te Ch'ul Dios yu'un Israel, hich ya yalbe te mach'a ihlaybil, te p'ajbil yu'un te nacionetic, te a'bat yu'un te tulan jcuentahinwanejetic: C'alal ya yilex ajwaliletic, ya me xhahchic, ya me squejan sbahic príncipaletic, ta scaj Jehová te stalel jun yo'tan, te Ch'ul Dios yu'un Israel te la stsahate, xchi.

Dios ya yal ya scha'pas xan Sión

⁸ Hich ya yal te Jehová: Ta yorahil c'uxultayel la jca'iybat ac'op, ta sc'ahc'alel colel la jcoltayat. Ya jcanantayat, ya cac' te ha chapbil c'op ya xc'ohat ta stojol te pueblo, yu'un yac acha'pas xan te lumq'uinal soc yac awa'be yich'ic te lumq'uinal te jihneme;

⁹ yu'un hich yac awalbe te mach'atic chuculic: ¡Loc'anic! xchihat, soc te mach'atic ayic ta yihc'al q'uinal: ¡Ac'a abahic ta ilel! xchihat. Ya me sta swe'elic ta behetic, soc ya me sta aquiltic ta spisil toyol q'uinaletic te mayuc bin colem tey a.

¹⁰ Ma ba ya ya'iyic wi'nal o taquinti'il, soc ma x'uts'inotic yu'un te c'ahc'al o q'uixin q'uinale, como te mach'a c'uxultayotic yu'un ya me stojobteslan bahel, soc ya me stojobteslan bahel ta sloq'uib-ha'etic.

¹¹ Ya jsutp'in ta be spisil te witsiltic cu'un, soc te muc'ul behetic cu'un ya yich'ic pahmanel.

¹² Ilawil, ya xtalic ta namal q'uinal: ay ya xtalic ta stojol norte, ay ya xtalic ta stojol smahlib c'ahc'al, soc ay ya xtalic ta banti sq'uinal Sinim.

¹³ ¡Awonan soc yutsil awo'tan, ha'at ch'ulchan, ayuc yutsil q'uinal yac awa'iy, ha'at lumq'uinal! Ha'ex witsiltic, hahchanic ta aw yu'un yutsil q'uinal yac awa'iyic, como te Jehová la smuc'ubtesbe q'uinal ya'iy te pueblo yu'un soc ya me sna'be yo'bolil sba te mach'atic yu'un te ay swocolique.

¹⁴ Pero hich la yal te Sión: La yihquitayon te Jehová, ch'ayon ta yo'tan te Cajwaltic, xchi.

¹⁵ ¿Ya bal xch'ay ta yo'tan te ants te yal te la ya'be schu', yu'un ma ba ya sc'uxultay te mach'a la yalatay? ¡Aunque ya xch'ay ta yo'tan te yale, mayuc bin ora ya xch'ayat ta co'tan te ha'ate!

¹⁶ Ilawil, bojbil ochel ta ts'ihbayel ta jc'ab te abihile; spisil ora ay ta jtojol te ts'ahquetic awu'une.

¹⁷ Te mach'atic ya scha'pasat, ya xtalic ta ora, ya xloq'uic bahel ta atojol te mach'atic la sjinate.

¹⁸ Toya mohel asit, ilawil ta ajoyobal, spisil ya stsob sbahic, ya xtalic ta atojol. Ho'on cuxulon, xchi te Jehová, ya cal ta jamal, ya me alapic spisil ini hich te bin ut'il ch'albil c'u'ul; ha yac ach'al aba a hich te bin ut'il ach'ix te ya xnuhpune.

¹⁹ Como te q'uinal awu'un te lajem, te jimbil soc te jochol hil, yo'tic tut ya xc'oht ta scaj te bayel mach'atic ya xnahinic tey a, soc namal ya xhilic te mach'atic la sjinex.

²⁰ Te anich'nab te ayinic te c'alal ayat ta mel-o'tan hich me ya yalbat ta achiquin: Ha tut te lugar ini; a'bon banti ya xnahinon, xchihic me.

²¹ Hich yac awal ta awo'tan: ¿Mach'a la yalataybon te alaletic ini? como mayuc calatac soc jma'alon, loq'uesbilon bahel soc p'ajbilon. Ha yu'un ¿mach'a la scoltes ini? Jtuquel ihquitaybilon, ¿banti talemic ini? xchihat.

²² Hich yaloj te Cajwaltic Jehová: Ilawil, ya jach jc'ab ta stojol te nacionetic, ya jtoy te jbandera ta stojol te pueblohetique; ya me spetbeyex tal te anich'nabic, soc ya me sq'uechbeyex tal ta snehquelic te awantsil-nich'nabique.

²³ Te ajwaliletic hich ya xc'ohtic te bin ut'il atatic, soc te ajwalil-antsetic yu'unic ha jcanan-alal ya xc'oht awu'unic. Ya me spahcan sbahic ta lum ta atojolic, soc ya me sleq'uic te stanul awoquic. Hich yac ana'ic a te ho'on Jehovahon; soc ma ba ya xq'uexawic te mach'atic smuc'ulinejon yo'tanic, xchi te Jehová.

²⁴ Te bintic pojbil ¿ya bal xhu' ya yich' loq'uesel ta sc'ab te mach'a ay yip? O te mach'a chucul ¿ya bal xhu' ya xcol loq'uel ta sc'ab te mach'a ya x'uts'inwan?

²⁵ Pero hich ya yal te Jehová: Te mach'a chucul ya me xpojbot loq'uel ta sc'ab te mach'a ay yip, soc te bintic pojbil ya xpojbot loq'uel ta sc'ab te mach'a ya x'uts'inwan. Pero ya jcontrahin te mach'a ya scontrahinat, soc ya jcoltaybat te awal-anich'nabe.

²⁶ Te mach'atic la yuts'inat ya cac' te ha nix ya sti' te sbaq'uetalic, soc hich ya xyacubic yu'un te sch'ich'elic te bin ut'il vino. Hich me ya sna'ic spisilic te ho'on Jehovahon, Jcoltaywanejon awu'un soc J'ac'awon ta libre awu'un, te Mach'a yu'un Jacob te ay yip.