Isaías 48 - Bible in Tzeltal Bachajón

Dios ya stij ta c'op te ma junuc yo'tan Israel

¹ A'iya awa'iyic ini, ha'ex yu'unex Jacob, te abihilinej Israel, te ha sts'umbalex Judá, te ay bintic yac awalic ta jamal ta scuenta sbihil Jehová, soc te yac ac'oponic te Dios yu'un Israel, pero ma ba smelelil soc ma stojiluc.

² Pero yac awalic te ha alumalic te ch'ul pueblo soc te smuc'ulinej awo'tanic te Dios yu'un Israel, te ha sbihil te Jehová te scuentahinej spisil.

³ Nahil caloj te bin c'axemix ta pasel, loc' ta que, la jpucbe sc'oblal; la jpas ta ora, hich c'oht ta pasel.

⁴ Como jna'oj te tulan awo'tan, te ha bahlal taq'uin te anuc', soc ha bronce te ati'bahe.

⁵ Ha scuentahil te nameyix la jcalbat; te c'alal ma to xc'oht ta pasel a la jcalbat scuenta yu'un ma xhu' te hich yac awal: Ha la spas te jcahcanan, te loc'omba te pasbil ta te' soc ta uhltesbil taq'uin, ha la yac' ta pasel ini, ma me xchihucat.

⁶ Awa'iyej soc awiloj spisil ini, ¿ma bal yac awalbe sc'oblal? Yo'tic ya calbat awa'iy bintic yach'il, te bintic muquen te ma ba ana'oj.

⁷ Chicnajem ta ora ini, ma ha'uc ta namey, c'alal ora yo'tic ma ba awa'iybeyej sc'oblal, scuenta yu'un ma xhu' te hich yac awal: Jna'ojix, ma me xchihucat.

⁸ Mayuc bin ora awa'iyej soc mayuc bin ora ana'beyej sc'oblal, mayuc bin ora jamal achiquin. Como jna'oj te ma junuc awo'tan, soc te toybahat c'ohem abihil c'alal ta awayinab.

⁹ Ta scuenta sc'uxul ta co'tan te jbihil ya jcom te quilimba, ta scuenta halbeyel yutsil jc'oblal la jcom ta atojol, scuenta yu'un ma ba ya jlajinat.

¹⁰ Ilawil, la jlecubtesat, pero ma hichuc te bin ut'il plata; la jtsajat ta horno yu'un wocol.

¹¹ Ta jcuenta, ho'on nix ta jcuenta, ya jpas, Como ¿bin ut'il c'an cac' te ya xbohlob jc'oblal? Mayuc yan mach'a ya ca'be te cutsilale.

¹² A'iybon awa'iy, Jacob, soc ha'at Israel te la jquic'ate: Ho'on me, ho'on shahchibalon soc ho'on slajibalon.

¹³ Te jc'ab la ya'be te yich'o-ip te bahlumilal, te jwa'el-c'ab la slim bahel te ch'ulchane; te c'alal ya calticlambe sbihilic, pajal ya stehc'an sbahic.

¹⁴ Tsoba abahic apisilic, a'iya awa'iyic: ¿Mach'a a te loc'ombahetic la yalbe sc'oblal ini? Te mach'a c'ux ta yo'tan Jehová ha te ya spas te bin ya sc'an yo'tan Dios ta stojol Babilonia, ya shach sc'ab ta scontrahinel te caldeohetique.

¹⁵ Ho'on, ho'on nix c'opojon, ho'on la jquic', la jquic' talel, lec ya xc'oht ta loq'uel te bin ya spase.

¹⁶ Nohpojanic tal ta jtojol, a'iya awa'iyic ini: C'alal ta shahchibal mayuc banti muquen c'opojon; c'alal hich c'oht ta pasel, tey ayon a, xchi te Jehová. Yo'tic te Cajwaltic Jehová la sticonon bahel soc te Espíritu yu'une.

¹⁷ Hich yaloj te Jehová, te J'ac'aw ta libre awu'un, te Ch'ul Dios yu'un te Israel: Ho'on Jehovahon, te Dioson awu'un, te ya ca'bat anop te bin lec ya xc'ohat yu'un, te ya jtojobtesat ta be te banti ya sc'an yac at'un bahele.

¹⁸ ¡Te lajuc awich' ta cuenta te mandariletic cu'un, hich c'oht te lamal q'uinal awu'un te bin ut'il muc'ul-ha', soc te bin toj ta pasel awu'un hich c'oht te bin ut'il ya xbehen yip te mar te hichuque!

¹⁹ Te ats'umbal hich c'oht te bin ut'il hi', te awal-anich'nab hich c'oht te bin ut'il hi' te ma xhu' ta ahtayel; mayuc bin ora ya xlajimbot sbihilic o te ya yich' tup'el ta jtojol te hichuque, xchi te Jehová.

²⁰ ¡Loc'anic ta Babilonia! ¡Ahnanic loq'uel ta stojol te caldeohetique! ¡Pucbeyahic sc'oblal ta aw soc yutsil awo'tanic, halbeyahic sc'oblal c'alal ta sti'il te q'uinale! Hich me yac awalic: Te Jehová la yaq'uix ta libre te Jacob te a'bat yu'une, chihanic me.

²¹ Ma ba la ya'iyic taquinti'il c'alal la yic'ticlan bahel ta jochol taq'uin q'uinaletic; la yac' t'ohmuc loq'uel ha' ta ton, la sjam te ton, t'ohm loq'uel ha' tey a.

²² Mayuc lamal q'uinal ya ya'iyic te mach'atic chopolic, xchi te Jehová.