Isaías 44 - Bible in Tzeltal Bachajón

Mayuc yan Dios, ha nax Jehová

¹ A'iya awa'iy yo'tic, Jacob, a'batat cu'un, ha'at, Israel, te tsahbilat cu'une:

² Te Jehová, te Jpaswanej awu'un, te mach'a la schahpanat ta yawil alal, te ya scoltayat, hich ya yal: Ma xiwat, Jacob, a'batat cu'un, ha'at, Jesurún, te tsahbilat cu'une.

³ Yu'un ya jmal ha' ta taquin q'uinal, be-ha'etic ta taquin lum. Ya jmal te espíritu cu'un ta stojol awal-anich'nab, te bendición cu'un ta stojol ats'umbal;

⁴ hich ya xcolic tal te bin ut'il ha'mal, hich te bin ut'il sauce-te'etic ta ti' muc'ul-ha'.

⁵ Ay mach'a hich ya yal: Ho'on yu'unon Jehová, xchi, yan ya sbihilimbe sbihil te Jacob, yan hich ya sts'ihbay ta sc'ab: Yu'unon Jehová, xchi, soc ya sbihilimbe sbihil Israel, xchi.

⁶ Hich ya yal te Jehová, te Ajwalil soc te J'ac'aw ta libre yu'un Israel, te Jehová te scuentahinej spisil: Ho'on ayon ta shahchibal soc ta slajibal; mayuc yan dios ta jtojol.

⁷ ¿Mach'a pajalon soc? Ac'a yal, ac'a smelbon ca'iy bin la jpas c'alal la jach ta namey te pueblo cu'une. ¡Ac'a yal te bin ya xtal, te bin ya xc'oht ta pasel!

⁸ Ma me xnihc awo'tanic, ma me xiwex. ¿Ma bal lajuc calbeyex awa'iyic, ma bal lajuc calbe sc'oblal c'alal ta namey? Ha'ex testigohex cu'un. ¿Ay bal yan dios ta jtojol? ¡Mayuc yan Muc'ul Ton! ¡Mayuc yan te ya jna'be sba! xchi.

Sonsohil te sch'uhunel loc'ombahetic

⁹ Te mach'atic ya spasic loc'ombahetic, mayuc sc'oblalic, soc ma xtuhun te bintic bayel sc'oblal ta yo'tanic. Ha'ic nix testigohetic te ma xyilic q'uinal te loc'ombahetic soc ma sna'beyic scuentahil, hich ya xq'uexawic yu'un.

¹⁰ ¿Mach'a ya schahpan jun dios o te ya yuhltes ta pasel jun loc'omba te ma xtuhune?

¹¹ Spisil te mach'atic ay yu'unic ya stahic q'uexlal, como winiquetic nax te mach'atic ya sna'ic spasel. Ya stsob sba spisilic, ya stehc'an sbahic, ya xiwic soc ya me xq'uexawic.

¹² Te jten-taq'uin ya stsac te a'tejibal yu'un, ya x'a'tej soc ta banti tsajuben ac'al; ya schahpan ta tenel ta martillo, ya sten ta yip sc'ab; patil ya xtal swi'nal, ya xlaj yip yu'un, ma ba ya yuch' ha', hich ya xch'ay yo'tan.

¹³ Te carpintero ya sp'is ta sp'isojibal, ya sjisbe srayahil; ya schahpan ta cepillo, ya sp'is ta compás. Ya spas ta sloc'omba winic, yich'beyej st'ujbilal winic, yu'un ya yac' nahinuc ta na.

¹⁴ Ya sts'et cedrohetic, o ya stsa ciprés o jihte', ya yac' muc'ubuc ta yohlil te tohyem te'etic; o ya sts'un taj te ya xmuc'ub yu'un te ha'ale.

¹⁵ Ha ya xtuhun yu'un te winic yu'un ya schic', ha ya sc'atin, soc ya ya'be si'ilin te horno, ya spas pan a; soc ya spas jun dios a, ya sch'uhuntay; ya spas jun loc'omba, ya squejan sba ta stojol.

¹⁶ J'ohlil te si' ya xchic' ta c'ahc', ya swo ti'bal a, ya swe', ya xnoj sch'uht yu'un. Patil ya sc'atin soc hich ya yal: Mero c'atinonix, xchi.

¹⁷ Te si' te hilem ya spas jun dios a, ha loc'omba yu'un, ya squejan sba ta stojol, ya sch'uhuntay soc ya yalbe wocol: Coltayawon, como ha'at diosat cu'un, xchi.

¹⁸ Ma sna'ic q'uinal, ma xc'oht ta yo'tanic; como macal sitic scuenta yu'un ma xyilic q'uinal, soc macal te yo'tanic scuenta yu'un ma sna'beyic scuentahil.

¹⁹ Ma ba ya spasic pensar, ma sna'ic q'uinal, mayuc snopojibal yu'unic te hich ya yalic: J'ohlil la jchic', la jpas pan ta yac'alel, la jwo ti'bal a soc la jwe'. Te j'ohlil xane ¿ya bal jpas te bin ilobtic sba a? ¿Ya bal jquejan jba ta stojol schumante'el te te'e? ma xchihuquic.

²⁰ Ya swe' stanul c'ahc', ya xhowiytesot yu'un te yo'tan te ya xlo'loywan; ma xhu' ya scoltay sba soc ma ba ya yal: ¿Ma bal ha'uc lotil te bin ay ta jwa'el-c'ab? ma xchihuc.

Jehová ha J'ac'aw ta libre yu'un Israel

²¹ Na'a me ini, Jacob, como ha'at a'batat cu'un, Israel. Ho'on la jpasat, ha'at a'batat cu'un, Israel, ¡ma ba ya xch'ayat ta co'tan!

²² Hich la jmes bahel te ac'axun-c'opic te bin ut'il tocal, te muliletic awu'un hich te bin ut'il sahb ha'. Suhtanic tal ta jtojol, como la jcac'at ta libre, xchi.

²³ Ha'at ch'ulchan, c'ayojinan soc yutsil q'uinal yac awa'iy, yu'un hich spasoj te Jehová; awonanic, sc'ubulil bahlumilal. Hahchanic ta c'ayoj, ha'ex witsetic, tohyem te'etic soc spisil te'etic ayic tey a, como te Jehová la yac' ta libre Jacob, soc ya xchicnaj yutsilal ta scuenta Israel.

²⁴ Hich ya yal te Jehová, te J'ac'aw ta libre awu'un, te la schahpanat ta yawil alal: Ho'on Jehovahon, te jpasoj spisil bintic ay, jtuquel la jlim bahel te ch'ulchan, jtuquel la jlim bahel te lumq'uinal;

²⁵ te ya cac' te ma xc'oht ta pasel te señahiletic yu'un te lotil jalwanejetic; te ya cac' te sonso ya xc'oht te jna'ojeletic; ya cac' ya sut ta spatic te mach'atic ay sp'ijilic soc ya jsutp'in ta sonsohil te sp'ijil yo'tanique.

²⁶ Ho'on te ya cac' ya xc'oht ta pasel te sc'op te a'batetic cu'un, te ya jc'ohtes ta pasel te bintic chahpambil yu'un te mach'atic jticonej, te hich ya calbe te Jerusalén: Ya me xtalic ta nahinel tey a, xchihon, soc te hich ya calbe te pueblohetic yu'un Judá: Ya me yich'ic xan pasel soc ya jcha'pas te jihnem ts'ahquetic yu'une, xchihon.

²⁷ Ho'on me te ya calbe te sc'ubulil te mar: ¡Taquijan! ¡Ya jtaquijtes te be-ha'etic awu'un! xchihon.

²⁸ Ho'on me te ya calbe sc'oblal te Ciro: Ha jcanan-tuminchij cu'un, ya spas spisil te bintic ya sc'an co'tan, hich ya yalbe te Jerusalén: Ya me awich' xan pasel, xchi, soc hich ya yalbe te templo: Ya me yich' pasel awich'o-ip, xchi.