Isaías 43 - Bible in Tzeltal Bachajón

Ha nax J'ac'aw ta libre stuquel te Jehová

¹ Pero yo'tic, hich ya yal te Jehová, te mach'a la schicnajtesat, Jacob, te mach'a la spasat, Israel: Ma xiwat, como ho'on la jcac'at ta libre; la jquic'at ta abihil, ha'at cu'unat.

² Te c'alal ya xc'axat ta ha'etic, ho'on ya joquinat; te c'alal ya c'axat ta muc'ul-ha'etic, ma ba ya smulat. C'alal ya xc'axat ta c'ahc', ma ba ya xchic'at; ma ba ya spetat te yat c'ahq'ue.

³ Como ho'on Jehovahon, te Dioson awu'unic, te Ch'ul Dios yu'un Israel, te Jcoltaywanej awu'unique; la jcac' te Egipto scuenta stojol te colat ta libre, te Etiopía soc Sabá scuenta ajelol.

⁴ Como bayel ac'oblal ya ca'iy ta jtojol, ich'bilat ta cuenta cu'un soc c'uxat ta co'tan; ha yu'un ya cac' winiquetic ta acuenta, soc nacionetic ta scuenta acuxlejal.

⁵ Ma me xiwat, como joquinejat; ya quic'bat tal awal-anich'nabic ta stojol banti ya xloc' tal c'ahc'al soc ya jtsobat tal c'alal ta smahlib c'ahc'al.

⁶ Hich ya calbe te norte: La' li'i, xchihon, soc hich ya calbe te sur: Ma me xacom. Ic'bon tal ta namal te jnich'nab queremetic, soc te ach'ixetic c'alal ta sti'il te bahlumilal,

⁷ spisil te mach'atic yich'beyejonic te jbihile, te la jchicnajtes yu'un ya xchicnaj a te cutsilale, ha te mach'atic la jpas soc te la jchahpan, xchihon.

Ha jtestigo te Israel

⁸ Loq'uesahic tal te pueblo te ts'o'sit aunque ay sitic, te cohquetic aunque ay schiquinic.

⁹ Ac'a stsob sbahic tal spisil te nacionetic, ac'a stsob sbahic te pueblohetic. ¿Mach'a ta yohlilic te nahil la yalbe sc'oblal ini, mach'a la yalbotic sc'oblal te bintic c'ohemix ta pasele? Ac'a taluc te testigohetic yu'unic, yu'un ya yaq'uic ta na'el te melel te bin la yalic, ac'a ya'iyic soc hich ac'a yalic: Melel nix a, xchihuquic.

¹⁰ Hich ya yal te Jehová: Ha'ex testigohex cu'un, soc a'batex cu'un te la jtsahex, scuenta yu'un yac ana'bonic jba soc yac ach'uhunic soc yac ana'ic te ho'on abi. Mayuc yan dios pasbil te ha nahil cu'un, soc mayuc yan te ha patil cu'un.

¹¹ Ho'on, ho'on nax jtuquel te Jehová, mayuc yan mach'a ya xcoltaywan.

¹² Ho'on la jcal soc la jcoltay, la jpuc ta halel, ma ha'uc yan dios ta awohlilic. Ha'ex testigohex cu'un te ho'on Dioson, xchi te Jehová.

¹³ C'alal ma to ayuc a te c'ahc'ale, ayonix a; mayuc mach'a ya xhu' ya scoltay loq'uel sba ta jc'ab. Te bin ya jpas ho'on, ¿mach'a ya xhu' ya sjin? xchi.

¹⁴ Te Jehová, te J'ac'aw ta libre awu'unic, te Ch'ul Dios yu'un Israel, hich ya yal: Ta acuentahic la jticon bahel winiquetic ta Babilonia, ya cac' ya xjahm spisil te puertahetic, soc te yutsil q'uinal ya ya'iyic te caldeohetic ya xc'atp'uj ta mel-o'tan.

¹⁵ Ho'on Jehovahon, te Ch'ul Dioson awu'unic, te Jpaswanej yu'un Israel, te Ajwalil awu'unic, xchi.

¹⁶ Hich ya yal te Jehová, ha te mach'a ya sjam be ta yohlil mar, te ya sjam be ta yohlil ha'etic te c'ax bayel yip;

¹⁷ te mach'a ya sloq'ues carreta soc cawu, soldadohetic soc jtsalawetic; ya xyahlic, ma xhu' ya xhahchiquix, ya xtup' sc'ahc'alic hich te bin ut'il mecha.

¹⁸ Ma xana'iquix te bintic c'axemiquix, ma xana'ulanic te bintic nameyix.

¹⁹ Ilawil, ay bin yach'il ya jpas, ora ya xloc' tal ta sacal q'uinal, ¿ma bal ana'ojic? Ya jam be ta jochol taquin q'uinal soc muc'ul-ha'etic ta jochol q'uinal.

²⁰ Ya me yich'onic ta muc' te ha'mal chambahlametic, te ha'mal ts'i'etic soc te avestruz-mutetic, como ya cac' te ay ha' ta jochol taquin q'uinal, muc'ul-ha'etic ta jochol q'uinal, scuenta yu'un ya ca'be yuch' te pueblo te tsahbil cu'une.

²¹ Ha te pueblo te la jchicnajtes yu'un cu'un ya xc'ohtic, scuenta yu'un ya spuquic ta halel te yutsil jc'oblale.

²² Pero ma ba la ac'oponon, Jacob, luhbat ta jtojol, Israel.

²³ Ma ba la awic'bon tal tuminchijetic scuenta scohtol chic'bil mahtaniletic, ma ba la awich'on ta muc' a te ta chic'bil mahtaniletic awu'une. Ma ba la jcuts'inat yu'un sc'anel mahtaniletic soc ma ba la jluhbtesat yu'un sc'anel pom.

²⁴ Ma ba la amambon tal jalal te sumet yic', soc ma ba la awac' nojuc jch'uht yu'un sjuhp'el te chic'bil mahtaniletic awu'une. Pero la awa'bon jcuch te muliletic awu'un, soc la alubteson yu'un te chopoliletic awu'une.

²⁵ Ho'on, ho'on nix ta jcuenta, te ya jtup'beyex ac'axun-mandariletic, soc ma ba ya jna'beyex xan te muliletic awu'une.

²⁶ A'bon jna' bin c'ohemix ta pasel, pajal ochucotic ta chahpanel. ¡Ac'a ta ilel te lec ayat!

²⁷ Te shahchibal tatil awu'un la sta smul, te jc'asesej-c'opetic awu'un jelawic ta jtojol.

²⁸ Ha yu'un la jbohlobtesbe sc'oblal te príncipaletic yu'un te templo, la jcac' te jc'axel ya xjihn te Jacob soc te ya yich' p'ajel te Israel.