Isaías 41 - Bible in Tzeltal Bachajón

Dios ya scanantay Israel

¹ Ch'abanic ta jtojol, ha'ex te ayex ta ti'ti'mar. Ac'a yich' xan yipic te nacionetic; nopojanic talel soc c'opojanic; ya jtsob jbahtic ta schahpanel.

² ¿Mach'a la stij hahchel te mach'a toj yo'tan te talem ta banti ya xloc' tal c'ahc'al, te la yic' tal yu'un ya xt'unot yu'un, te la ya'be ta sc'ab nacionetic soc la ya'be scuentahin ajwaliletic? ¿Mach'a la sutp'imbe ta ts'u'lum ta espada yu'un, te ta ya'tejibalul st'ihmalte' la spucbe bahel hich te bin ut'il suhlil trigo?

³ La snuts bahel, jun yo'tan c'ax xan bahel ta be te mayuc bin ora c'axem tey a.

⁴ ¿Mach'a la spas ini, mach'a la sc'ohtes ta pasel? ¿Mach'a ya yic'ticlan tal jujucaj ts'umbalil c'alal ta shahchibal? Ho'on Jehovahon, shahchibalon, soc ho'on nix ya joquin te mach'atic slajibal ayic.

⁵ Te mach'atic ta ti'ti'mar la yilic soc xiwic; nihquic te sti'il te lumq'uinale; stsoboj sbahic, nohpojic talel.

⁶ Jujutuhl ya scoltay te spat-xuhc soc hich ya yalbe te yermano: Ayuc me yip awo'tan, xchihic.

⁷ Te carpintero ya ya'be smuc'ul yo'tan te j'ultesej taq'uin, te mach'a ya sch'ul ta martillo ya ya'be smuc'ul yo'tan te mach'a ya sten taq'uin ta stenojibal, hich ya yalbe: Lec ay banti lap'bil, xchi. Patil ya ya'be clavo yu'un ma syuc' sba a.

⁸ Pero ha'at, Israel, ha a'batat cu'un, ha'at, Jacob, te tsahbilat cu'un, sts'umbalex Abraham te mach'a jun co'tan soc;

⁹ yu'un la jloq'uesat tal c'alal ta sti'il te q'uinale, la jquic'at loq'uel tal ta namal q'uinal, hich la jcalbat: Ha'at a'batat cu'un, la jtsahat, ma ba la jch'ojat bahel.

¹⁰ Ma me xiwat, como joquinejat; ma me xamel awo'tan, como ho'on te Dioson awu'une; ya ca'bat awip, ya jcoltayat, ya jtsacat ta jwa'el-c'ab te ya xtsalawane.

¹¹ Ilawil, spisil te mach'atic ya yilintayat ya me xq'uexawic soc ya xpehc'ajic; te mach'atic ya scontrahinat mayuc sc'oblal ya xc'oht soc ya xch'ayic bahel.

¹² Yac ale te mach'atic yac scontrahimbelat, ma ba yac ata; te mach'atic ya ya'bat guerra, hich ya xc'ohtic te mayuc ban chicnajemic.

¹³ Como ho'on Jehovahon, te Dioson awu'un, ya jtsacbat te awa'el-c'ab soc ya calbat: Ma me xiwat, ho'on ya jcoltayat, xchihon.

¹⁴ ¡Ma me xiwat, yolat Jacob, ha'ex te mayuc tsobolex yu'un Israel! Ho'on ya jcoltayat, xchi te Jehová; te Ch'ul Dios yu'un Israel, ha te J'ac'aw ta libre awu'unique.

¹⁵ Ilawil, ya cac'at ta sloq'uesojibal spat trigo te ha yach'il soc te ay bayel ye. Ya me awuy te witsiltic soc ya me ajuch', yac ac'atp'un ta suhlil trigo te tsehletique.

¹⁶ Yac ach'ojticlan mohel, ya x'ich'otic bahel ta ic', te sutu-ic' ya spucticlan bahel. Pero te ha'ate tse'el awo'tan ta stojol te Jehová, lec q'uinal yac awa'iy yu'un te Ch'ul Dios yu'un Israel.

¹⁷ Te pobrehetic soc te mach'atic mayuc bin ay yu'unic ya slehic ha', pero ma ba ya stahic; c'ax taquij yehic yu'un. Pero ho'on te Jehovahon ya jac'be sc'opic; ho'on te Dioson yu'un Israel ma ba ya jpihtes.

¹⁸ Ya jam bahel muc'ul-ha'etic ta toyol taquin q'uinal, soc sloq'uib-ha'etic ta spamlejetic. Ya jc'atp'un ta yawil ha' te jochol taquin q'uinal, soc ya c'atp'un ta sloq'uib-ha'etic te taquin q'uinale.

¹⁹ Ya cac' ta jochol taquin q'uinal te cedro, acacia-te', arrayan soc te olivo; ta banti taquin q'uinal ya cac' te ciprés, te taj soc te abeto-te',

²⁰ scuenta yu'un ya yilic soc ya sna'ic spisilic, ya snop ta yo'tanic soc ya xc'oht ta yo'tanic te ha spasoj te sc'ab Jehová ini, te chicnajtesot yu'un te Ch'ul Dioson yu'un Israel, xchi.

Dios ya yal ma xtuhun te lotil diosetic

²¹ Halahic bin ut'il ayex, xchi te Jehová; Ac'a ta ilel bin ut'il ayex, xchi te Ajwalil yu'un Jacob.

²² Ac'a taluc te loc'ombahetic, ac'a yalic te bin ya xc'oht ta pasel, te bin c'ohemix ta pasel c'alal ta shahchibal, yu'un hich ya jnoptic soc hich ya jna'tic a bin ut'il ya xc'ohtic ta loq'uel. ¡Hala ca'iycotic bin ya xc'oht ta pasel!

²³ Halbotcotic bintic ya xc'oht ta pasel ta patilal, yu'un hich ya jna'cotic a te ha'ex diosex. Ayuc bin yac apasic, teme lec o teme ma lecuc, scuenta yu'un ya xiwotcotic soc ya xnihcotcotic yu'un.

²⁴ Pero te ha'exe mayuc atuquic ta jc'axel, soc ma xtuhun te awa'telique; ilobtic sba te mach'atic ya stsahex.

²⁵ Ay mach'a la jtij hahchel ta stojol norte, ya me xtal; ta stojol sloq'uib c'ahc'al ya sc'oponon ta jbihil. Ya sts'o' ta teq'uel ajwaliletic hich te bin ut'il ahch'al, hich te bin ut'il te jpac'ojom ya sts'o' ta teq'uel ahch'al.

²⁶ ¿Mach'a la yalbe sc'oblal ini c'alal ta shahchibal to tal, scuenta yu'un hich ya jna'cotic a; o te la yal ta nahilal yu'un hich ya xhu' ya calcotic: Stojil bin la yal, te xchihotcotique? Mayuc mach'a la yalbe sc'oblal, mayuc mach'a la spuc ta halel, mayuc mach'a la ya'iybat ac'opic.

²⁷ Ho'on te nahil hich la jcalbe te Sión: Ilawil, yaquic ta hulel, xchihon, soc la jca'be Jerusalén jtuhl jal-c'op te ya yal bin lec ta a'iyele.

²⁸ La jquil, pero mayuc mach'a ay; mayuc j'ac'-o'tanil ta yohlilic, mayuc mach'a la sjac'bon te bin la joc'obe.

²⁹ Ilawil, mayuc sc'oblalic ta spisilic, soc ma xtuhun te ya'telique. Te loc'ombahetic yu'unic ha nax ic' soc tojol nax.