Isaías 40 - Bible in Tzeltal Bachajón

Jehová ya ya'be smuc'ul yo'tan Sión

¹ Muc'ubtesbeyahic q'uinal, muc'ubtesbeyahic q'uinal ya'iy te pueblo cu'un, xchi te Dios awu'unique.

² C'oponahic soc yutsil awo'tanic te Jerusalén, halbeyahic te ts'acayix te yorahil yu'une, te pasbotix perdón yu'un te smule, te cheb buelta stojol spisil smul la yich' ta sc'ab Jehová.

³ Ay mach'a yac ta aw: ¡Ta jochol taquin q'uinal chahpambeyahic be yu'un Jehová, ta jochol q'uinal tojobtesbeyahic muc'ul be yu'un te Dios cu'untique!

⁴ Ac'a yich' hachel mohel spisil sjuclejetic soc ac'a cohuc bahel spisil witsiltic soc tsehletic; te banti lomajtic ac'a yich' but'el, te chuhcul q'uinal ac'a yich' pahmanel.

⁵ Hich ya xchicnaj te yutsilal te Jehová, soc spisil ants-winiquetic pajal me ya yilic, como c'opojix te Jehová, xchi.

⁶ Ay c'op te hich la yal: awonan, xchi. Ho'on la jac': ¿Bin a te ya cal ta aw? xchihon. La yalbon: Spisil te ants-winiquetic hich ayic te bin ut'il ac, soc spisil te yutsilalic hich ay te bin ut'il snich ha'mal ta q'uinal.

⁷ Ya xtaquij te ac soc ya sayub te nichim, como ya xhu'xiyot ta yic'al ye te Jehová. ¡Ta mero melel, ha ac te ants-winiquetique!

⁸ Ya xtaquij te ac soc ya sayub te nichime, yan te sc'op te Dios cu'untic stalel ay sbahtel q'uinal, xchihat.

⁹ Mohan ta toyol wits, ha'at jal-c'opat yu'un Sión, tulan me x'awonat, ha'at jal-c'opat yu'un Jerusalén; toya ac'op, ma xiwat; halbeya te pueblohetic yu'un Judá: ¡Li' ay te Dios awu'unique! xchihat.

¹⁰ Ilawil, tal soc yu'el te Jehová, ya xcuentahinwan ta scuenta yip sc'ab. Ilawil, ya xtal soc smahtan, joquimbil tal soc te stojole.

¹¹ Hich te bin ut'il jcanan-tuminchij ya scanantay te tuminchijetic yu'une; ya stsac hahchel ta sc'ab te tut tuminchijetic, ya spet bahel ta stahn, c'un ya yic' bahel te tohquelic to.

Mayuc ta pajel te Dios yu'un Israel

¹² ¿Mach'a la sp'is ta stahn sc'ab te ha'etic, o la sp'is ta sc'ab te ch'ulchane? ¿Mach'a la sp'is ta sp'isojbil te ts'ubilum yu'un te bahlumilal, o te la slicbe yalal ta balanza te witsiltic soc te la slicbe yalal te tsehletique?

¹³ ¿Mach'a sna'oj te bin snopoj te Jehová, o te la ya'be snop?

¹⁴ Te Jehová ¿mach'a la sjoc'obe yu'un hich ya sna' a? ¿Mach'a la ya'be sna' te sbehlal bin toj ta pasel, o te bintic ay ta na'el, o la ya'be yil te sbehlal sna'beyel scuentahil?

¹⁵ Te nacionetic hich ayic ta stojol te bin ut'il t'ojob te ay ta balde, hich c'ohemic te bin ut'il ts'u'lum ta balanza; hich ya slic te q'uinal joybilic ta ha' te bin ut'il ts'u'lum.

¹⁶ Ma tic'uc a te si' ta Líbano soc spisil te chambahlametic yu'un scuenta chic'bil mahtanil.

¹⁷ Ta spisil te nacionetic mayuc sc'oblalic ta stojol, hich c'ohemic ta yo'tan te jc'axel ma xtuhun, te mayuc bin ay tey a.

¹⁸ Ha yu'un ¿mach'a yac apajic soc a te Diose? ¿Bin loc'ombahil te yac apajic soc a?

¹⁹ Te mach'a ya spas loc'omba ya yuhltes ta c'ahc' te taq'uine, yan mach'a ya spots ta oro soc ya spasbe cadenahetic ta plata.

²⁰ Te mach'a pobre, ya stsabe ste'el te ma xjoch'ob; ya sle te mach'a p'ijuben ta spasel, yu'un ya spasbe loc'omba te ma xpuch'.

²¹ ¿Ma bal lajuc ana'ic? ¿Ma bal lajuc awa'iyic? ¿Ma bal halbotuquex ta shahchibal? ¿Ma bal ana'ojicuc c'alal ta shahchibal te bahlumilale?

²² Te Dios hucul ta smuc'ul huctajib ta stoyolil te bahlumilal, te mach'atic nahinemic tey a hich ayic te bin ut'il c'ulubetic. Ha ya slim bahel te ch'ulchan hich te bin ut'il pac', ha ya sjam bahel hich te bin ut'il nahilpac'.

²³ Ha ya sutp'in ta bin mayuc sc'oblal te mach'atic ay yipic, soc ya yac' te mayuc scuentahil ya xc'ohtic te jcuentahinwanejetic ta bahlumilal.

²⁴ Ts'uhnelic to, lajel to yich'bel lihlinel, yaquic to nax ta c'ubel slohp' ta lumq'uinal, c'alal ya xhu'xiyot yu'un, ya xtaquij, soc ya xlichot bahel yu'un sutu-ic' hich te bin ut'il taquin ha'mal.

²⁵ ¿Mach'a yac apajonic soc a? ¿Mach'a pajalon soc? xchi te Ch'ul Dios.

²⁶ Toyahic mohel asitic, ilawilic: ¿mach'a la schicnajteslan spisil ini? ha te mach'a scholet ya sloq'ues te eq'uetic yu'un, ya yic'ticlan tal ta sbihil te jujune. Te bin ut'il c'ax muc' te yu'el soc te c'ax bayel yip, hich mayuc junuc ya xch'ay.

²⁷ ¿Bin yu'un hich yac awal, Jacob, bin yu'un hich ya xc'opojat, Israel: Te be cu'un nac'bil ta stojol Jehová, te Dios cu'un mayuc sc'oblal ta yo'tan bin ut'il ayon, te xchihate?

²⁸ ¿Ma bal ana'ojicuc, ma bal ayuc awa'iyejic te Jehová, ha Dios te sbahtel q'uinal ay, te la schicnajtes swohlol te bahlumilal? Ma xluhb soc ma xpehc'aj yip, mayuc mach'a ya xhu' sna'bel te bin ya sna'e.

²⁹ Ha ya ya'be yip te mach'a luhben, soc ya ya'be xan yip te mach'a mayuc yip.

³⁰ Te ach'ix-queremetic ya xluhbic soc ya xlaj yipic, te jcolel queremetic ya sc'ohchin yoquic, ya xyahlic;

³¹ pero te mach'atic ya smuc'ulin yo'tanic te Jehová ya me sta xan yipic, ya xwihlic mohel ta xiq'uic hich te bin ut'il muc'ul jxiquetic; ya x'ahnimajic, ma ba ya xluhbic, ya xbehenic, ma ba ya xlaj yipic.