Isaías 4 - Bible in Tzeltal Bachajón

¹ Ta hich ora huctuhl antsetic ya me stsacbe sc'ab jtuhl winic, hich ya yalbeyic: Te ho'otcotic ya jwe'cotic te we'elil cu'uncotic soc ya jlapcotic te jc'u'-jpac'cotic, ha nax a'botcotic quich'cotic te abihile; loq'uesawotcotic ta q'uexlal, xchihic.

Te yutsilal Jerusalén ta patil

² Ta hich ora te spuhl te Jehová ha t'ujbil soc ay yutsilal ya xc'oht, soc te sit ya yac' te lumq'uinal ha toybeyel sc'oblal soc ich'el ta muc' ya xc'oht yu'un te mach'atic hilemic ta Israel.

³ Te mach'atic cuxul ya xhilic ta Sión, te mach'atic hilemic ta Jerusalén, ch'uhltesbilic, xchi sbihilic ya xc'oht, spisil te mach'atic ts'ihbabil hilel sbihilic ta yohlil te mach'atic cuxulic ta Jerusalén,

⁴ c'alal te Jehová ya spocbe loq'uel sbohlil te antsetic yu'un Sión, soc te ch'ich' la yich' malel ta Jerusalén ya spocbe loq'uel ta scuenta te espíritu yu'un castigo soc te espíritu yu'un c'ahc'.

⁵ Ta stojol te wits Sión soc te banti ya stsob sbahic, te Jehová ya schicnajtes hahchel pimil tocal ta c'ahc'alel, soc sjahts' yat c'ahc' ta ahc'abal. Soc ta sba spisil, ha te yutsilal te Cajwaltic, te hich ya xc'oht te bin ut'il smahquil;

⁶ ha smahquil scuenta axinal yu'un te sq'uixinal te c'ahc'al, soc ha ahnibal soc snac'omba yu'un te tulan ic' soc te ha'ale.